Ի՞նչ ես քեզ թանկացնում, ասելու բան ունես, ասա. Պարույր Հայրիկյանը՝ Արթուր Վանեցյանին (video)

ԱԻՄ առաջնորդ Պարույր Հայրիկյանի կարծիքով՝ վարչապետ Նիկոլ Փաշինյանի հայտարարությունները ՀՀ առաջին նախագահ Լևոն Տեր-Պետրոսյանի հասցեին հնարավոր կլիներ անկեղծ համարել, եթե Փաշինյանը նաև ասեր, որ ինքը ցավում է, որ եղել է Լևոն Տեր-Պետրոսյանի թիմում. «Նիկոլ Փաշինյանը պարզապես սահմանազատվում է առաջին նախագահից: Կա նաև այսպիսի տեսակետ, որ Փաշինյանի այդ հայտարարությունները մերձավորի կամ էլ ուսուցչի նկատմամբ ոչ հարգալից վերաբերմունք է»,- Անժելա Թովմասյանի՝ «Արմնյուզ» ՀԸ եթերում հեռարձակվող հեղինակային «Հայելու առաջ» հաղորդաշարի ժամանակ ասել է Պարույր Հայրիկյանը:

Դիտարկմանը՝ եթե Լևոն Տեր-Պետրոսյանը չարիք է, ուրեմն չարիք է նաև նրա գաղափարակից ընկեր Նիկոլ Փաշինյանը, Հայրիկյանը նշել է, որ Նիկոլ Փաշինյանն ուղղակի պետք է ասի, որ ինքը ժամանակին խորապես չի գնահատել իրավիճակն ու դարձել է Լևոն Տեր-Պետրոսյանի գործիքը:

Հարցին՝ Հայաստանում ներքաղաքական մի շարք զարգացումներ կան և Լևոն Տեր-Պետրոսյանը տարօրինակ կերպով լռում է, ի՞նչն է պատճառը, Հայրիկյանը պատասխանել է, որ սա փոթորիկից առաջ լռություն լինելուց բացի կարող է լինել նաև այն, որ Լևոն Տեր-Պետրոսյանն արդեն ծեր է, ինչպես ինքն է ասել, դրա համար էլ լռում է. «Կա նաև մեկ այլ բան, որ Նիկոլ Փաշինյանը՝ չփոխելով Սահմանադրությունը, շատ ուժեղ հարված հասցրեց Լևոն Տեր-Պետրոսյանին»:

Խոսելով ԱԱԾ նախկին ղեկավար Արթուր Վանեցյանի վերջին հայտարարություններից, Հայրիկյանն ասել է, որ Արթուր Վանեցյանը պետք է ճիշտ գործը, ճիշտ ժամանակին աներ. «Նա իմացել է Հայաստանի անվտանգությանն սպառնացող վտանգների մասին և ոչինչ չի արել:Բան ունես ասելու՝ ասա, ինչու՞ ես քեզ թանկացնում»:
Դիտարկմանը՝ հնարավո՞ր է՝ Վանեցյանըպարզապես վախեցել է, Հայրիկյանը պատասխանել է, որ չգիտի,հազար բան է հնարավոր, բայց Հայաստանի անվտանգությանը սպառնացող վտանգների մասին պետք է անպայման բարձրաձայնել:

Պարույր Հայրիկյանը խոսել է նաև Հայաստանում տիրող ատելության մթնոլորտից և ասել, որ իշխանությունը քայլեր չի անում այդ մթնոլորտը մաքրելու համար: