Նիկոլի համար սրտի օլիգարխ միայն Սամվել Ալեքսանյանն է մնացել. Կարեն Քոչարյան. video
Ես պետք է ասեմ՝ զուսպ լինելը լավ բան է: Աննա Հակոբյանը վարում է դիլետանտ գործունեություն, որը չի բարձրացնում մեր երկրի հեղինակությունը: Ցավում եմ, որ Աննա Հակոբյանի նախկին գործընկերները ծաղրում են նրա գործունեությունը, ու պետք է որ նա այդ ամենից հետևություններ անի: Անժելա Թովմասյանի՝ «Արմնյուզ» ՀԸ հեռարձակվող հեղինակային «Հայելու առաջ» հաղորդաշարի ժամանակ ասել է Հայաստանի Հանրապետական կուսակցության անդամ Կարինե Աճեմյանը՝ անդրադառնալով վարչապետ Նիկոլ Փաշինյանի տիկնոջ՝Աննա Հակոբյանի՝ դիրքեր այցելությանը:
Քաղաքագետ Նարեկ Սամսոնյանը կարծում է, որ Աննա Հակոբյանի նման քայլերը շատ ավելի խորը նպատակներ են հետապնդում և անգամ իշխանական կուլիսներում խոսում են, որ նա ցանկություն ունի քաղաքական ավելի մեծ ներգրավվածություն ունենալու. «Աննա Հակոբյանը բավականին լուրջ ազդեցություն ունի «Քաղաքացիական պայմանագրի» ներսում: Իզուր չեն Մեհրիբան Ալիևայի հետ համեմատությունները և շատ հավանական է, որ նա առաջիկայում կունենա քաղաքական որևէ պաշտոն»:
Քաղտեխնոլոգ Կարեն Քոչարյանն էլ չցանկացավ պատասխանել այս հարցին՝ պատճառաբանելով՝ուզում է լինել «թրենդի» մեջ:
Անդրադառնալով Սուրբ Աթոռում ՀՀ նախկին դեսպան Միքայել Մինասյանի վերջին գրառմանն ու Նիկոլ Փաշինյանի՝ «Վատիկանի պադվալներում թաքնված կոռուպցիոներների» մասին հայտարարությանը և հարցին՝ նման հայտարարություններով արդյոք Հայաստանի տնտեսությունը հնարավո՞ր է զարգացնել, քաղտեխնոլոգ Կարեն Քոչարյանն ասել է, որ բիզնես վստահության խնդիր կա, որի մասին երկար ժամանակ է՝ բարձրաձայնում են թե՛ տնտեսագետները, թե՛ ընդդիմախոսները: Ըստ նրա՝ անկանխատեսելի պայմաններում երբեք ներդրումներ չեն լինի և պարզ էր, որ դրսից ներդրումներ չեն գա այնքան ժամանակ, քանի դեռ ներսում չլինեն լուրջ ներդրումներ:
Քաղաքագետ Նարեկ Սամսոնյանի դիտարկմամբ՝ Նիկոլ Փաշինյանի հնչեցրած տնտեսական թվերը պարզապես ստեր են: Ըստ նրա՝ այս իշխանության համար սովորություն է դարձել օդում թվեր ասելը:
Կարինե Աճեմյանն էլ համոզված է, որ մարդիկ, ովքեր իրենց գործունեության մեջ, իրենց քայլերում ազնիվ են եղել, այսօր հետապնդման են ենթարկվում: Նրա խոսքով՝ միայն տգետ հասարակությունում կարող են այս քայլերը մարսել:
Անդրադառնալով «Մարտի 1»-ի գործի շրջանակներում իրականացվող քաղաքական հետապնդումներին, ու այդ գործի դատավարությանը՝ Կարինե Աճեմյանը նշել է, որ ինքն էլ կիսում է Ֆրանսիայից եկած փաստաբանի տեսակետը, համաձայն որի ՝ «Մարտի 1»-ի գործը վատ բեմադրված թատրոն է. «Ես իսկապես ցավում եմ, որ այս ամենին մասնակցում է ոչ միայն Ռոբերտ Քոչարյանը, այլև Արմեն Գևորգյանը, Սեյրան Օհանյանը»:
Քաղտեխնոլոգ Կարեն Քոչարյանի կարծիքով դատական աղմկահարույց բոլոր գործերը ցույց են տալիս, որ իրավական ոլորտում կադրերի շատ լուրջ խնդիր կա, ինչի պատճառով էլ դատական բոլոր պրոցեսներում տրամաբանություն կամ հետևողականություն չկա:
Հետևեք մեզ Viber-ում
