Ինչ է տեղի ունեցել իրականում. մանրամասներ «մարզպետի և վարսավիրի միջև եղած միջադեպից»

SHAMSHYAN.com-ի տեղեկություններով՝ ոստիկանության Արարատի մարզային վարչության, ոստիկանության Արարատի բաժնի քրեական հետախուզության և համայնքային ոստիկանության բաժանմունքների ծառաողները, ձեռնարկված միջոցառումների շնորհիվ պարզել են օրեր առաջ էլեկտրոնային լրատվամիջոցներում հրապարակված «Մարզպետի կանտովկան արտահերթ չդզելու համար ծեծել են վարսավիրին և արտաքսել գյուղից» վերտառությամբ հոդվածի մեջ առնչվող մարդկանց ինքնությունը: Ինչպես հայտնում է ֆոտոլրագրող Գագիկ Շամշյանը, Արարատի մարզի ոստիկանները պարզել են, որ մարզպետի վարորդը հանդիսանում է Նոր Կյանք գյուղի բնակիչ, 34-ամյա Արտակ Դավթյանը, վերջինիս եղբայրը՝ նույն գյուղի բնակիչ, 32-ամյա Արմեն Դավթյանը, իսկ վարսավիրը եղել է Տափերական գյուղի բնակիչ, 39-ամյա Սերոբ Բարֆյանը: Գ. Շամշյանի տեղեկություններով՝ նյութերի նախապատրաստման ընթացքում պարզվել է, որ ոչ մի վիճաբանություն-ծեծկռտուք տեղի չի ունեցել, քանի որ թե՛ նշված անձինք և թե՛ ականատես այլ անձինք հերքել են տեղի ունեցածը: Ավելի վաղ զանգվածային էլեկտրոնային միջոցներով տեղեկություն էր տարածվել, որ Արարատի մարզպետ Գարիկ Սարգսյանը վարչապետ Նիկոլ Փաշինյանին դիմավորելուց առաջ ցանկացել է նշված վարսավիրանոցում «զուգվել-զարդարվել», սակայն վարսավիրը հրաժարվել է, ասելով, որ պետք է հերթ պահի, ինչն էլ առաջացրել էր մարզպետի զայրույթը ու իր հանձնարարականով Ա. և Ա.Դավթյանները ծեծի են ենթարկել վարսավիրին: