Ինչու Գևորգ Կոստանյանը...

Նախկին գլխավոր դատախազ Գևորգ Կոստանյանը Մարտի 1-ի գործով ներգրավել է որպես մեղադրյալ: Հատուկ քննաչական ծառայությունը, ինչպես ԶԼՄ-ներն հայտնել է այս կառույցի խոսնակը, Կոստանյանին առաջարկել է 48 ժամվա ընթացքում ներկայանալ վարույթն իրականացնող մարմին՝ մեղադրանք առաջադրելու համար։ Կոստանյանն այժմ գտնվում է ՌԴ մայրաքաղաք Մոսկվայում: Նա հայտարարել է, որ զբաղված է դասախոսական աշխատանքով և կվերադառնա քննաշրջանի ավարտից հետո: «Գիտեմ, որ եթե ես այս պահին գամ, ինձ առնվազն թույլ չեն տալու, որ ես հետ գամ, այդ պատճառով էլ կգամ այն ժամանակ, երբ կավարտեմ ընթացիկ դասընթացը»,- 168.am-ի հետ զրույցում նշել է նախկին գլխավոր դատախազը:
Վերադառնակով մեղադրանքին` նշենք, որ ավելի վաղ Հատուկ քննչական ծառայությունը հայտարարություն էր տարածել նախկին ոստիկանապետ Ալիկ Սարգսյանին մեղադրանք առաջադրելու վերաբերյալ, և դրանում շոշափվում էին նաև Կոստանյանի և ոստիկանապետի նախկին տեղակալ Գևորգ Մհերյանի անունները:
<>,- նշել էր ՀՔԾ-ն` Ալիկ Սարգսյանին առաջադրած մեղադրանքի հայտարարության մեջ:
Ըստ էության Կոստանյանին առաջադրվելու է նույն մեղադրանքը` այն է կոծկել է սահմանադրական կարգի տապալման գործիքներն ու միջոցները, ինչպես նաև հանցագործության հետքերը:
Ինքը` Գևորգ Կոստանյանը «Արմնյուզ» ՀԸ «Հայելու առաջ» հաղորդման ժամանակ անդրադառնալով նախկին ոստիկանապետ Ալիկ Սարգսյանին առաջադրված մեղադրանքին և գործի մասով իր առնչությանը նշել էր. «Ըստ Ալիկ Սարգսյանին ներկայացված մեղադրանքի բովանդակության՝ ես՝ որպես արդարադատության նախարարի տեղակալ, ոստիկանապետին և ոստիկանության բարձրաստիճան ծառայողներին տվել եմ հանձնարարություններ՝ կատարելու որոշակի կեղծիքներ կամ ինչ-որ փաստաթղթերի կեղծում: Գաղափարը հետևյալն է, որ 2008 թվականի մարտի 1-ի առավոտվա իրադարձությունների կապակցությամբ ոստիկանները արել են ինչ-որ գործողություններ և 5 ամիս հետո ես՝ որպես արդարադատության նախարարի տեղակալ, նրանց բացատրել եմ, թե նրանք ինչպիսի ձևակերպումներ պետք է տան նրանց 5 ամիս առաջ կատարած գործողություններին»,- ասել էր Կոստանյանը և հիշեցրել, որ ինքը դրանից 5 տարի հետո է միայն նշանակվել գլխավոր դատախազ:
Դիտարկմանը, որ հարցաքննության ժամանակ Ալիկ Սարգսյանը ևս հերքել էր, որ նման հանձնարարական չի եղել, Կոստանյանը պատասխանել էր, որ բնականաբար պետք է հերքեր, քանի որ նման մեղադրանքը, ոչ միայն իրավունքի կողմից է անհնար, այլև՝ տրամաբանության տեսանկյունից: Ըստ Կոստանյանի` այստեղ ավելի խորքային խնդիրներ կան. «Հանրության տեսակետից ավելի հրատապ է 10 մահվան փաստերի կապակցությամբ կատարվող քննությունը և դրանց բացահայտումը: Հետևաբար՝ ես կարծում եմ, որ այս քրեական գործերը, որ հարուցվել են, քննվում են և աղմուկ են բարձրացնում, ըստ էության, նպատակ ունեն ցույց տալ այդ 10 մահերի բացահայտման անկարողությունը: Իրավապահ մարմինները ամեն մի առիթի դեպքում ինչ-որ ծավալուն բացատրություն են տալիս, բայց արդյունքում այդ ամենը նպատակ ունի բուն գործի քննության արդյունքներից շեղելու»,- նշել էր նա և ավեկացրել, որ բուն գործի քննության`10 սպանությունների բացահայտման ընթացքի հետ կապված կա զրո արդյունք :
Նշենք, որ մինչ Գևորգ Կոստանանի գլխավոր դատախազ նշանակվելը Մարտի 1-ի 10 զոհերի գործերն ամբողջական մեկ քրգործի շրջանակում էին քննվում: «Հետո իմ հանձնարարությամբ, որպեսզի յուրաքանչյուր մահվան կապակցությամբ ավելի արդյունավետ քննություն իրականացնենք, գործը 10 մասերի առանձնացրեցինք՝ յուրաքանչյուրն առանձին գործով: Ինչո՞ւ, որպեսզի դա հնարավորություն տա նաև քննիչին, իրավահաջորդների ներկայացուցիչներին, փաստաբաններին և իրավապաշտպաններին ավելի առարկայական պատկերացնել, թե գործը քննության որ փուլում է, ինչ հետևանքներ կան և յուրաքանչյուր քննիչի որոշում, որը ոչ արդյունավետ են համարում, կարողանան սահմանված կարգով բողոքարկել», - մի առիթով լրագրողներին ասել էր Կոստանյանը:
Դժվար է պատկերացնել, թե ինչ կարող է տալ որպես մեղադրյալ Գևորգ Կոստանյանի և Ալիկ Սարգսյանի ներգրավումը Մարտի 1-ի 10 զոհերի սպանության բացահայտմանը: Մարտի 1-ի գործի բացահայտում` առանց սպանությունների բացահայտման պարզապես չկա, հետևաբար գործն այս առումով ավելի շատ քաղաքական է: Կոստանյանը 5 տարի անց է միայն նշանակվել գլխավոր դատախազ: Նրան մեղադրանք առաջադրելուց առաջ ավելի տրամբանական կլիներ նույն մեղադրանքն առաջադրել այդ ժամանակվա գլխավոր դատախազ Աղվան Հովսեփյանին: Քաղաքական մոտիվներով մեղադրանքների առաջադրումը որպես կանոն ստվերում է թողնում գործի իրավական բովանդակությունը, ինչն այս դեպքում ակնհայտ է:

Հայկ Դավթյան