Իրավական գործընթաց կսկսվի եւ Տեր-Պետրոսյանի եւ Սերժ Սարգսյանի դեպքում

Թավշյա հեղափոխությունից հետո Նիկոլ Փաշինյանի հասցեին հաճախ են մեղադրանքներ հնչում, որ նա Լեւոն Տեր-Պետրոսյանի «հոգեզավակն» է եւ շարունակում է նրա քաղաքականությունը: Արդյոք Փաշինյանի՝ Տեր-Պետրոսյանին չարիք որակելու հայտարարությունը սոսկ այդ կապի բացառումը չէ, հակառակ պարագայում պետք է նաեւ այս ուղղությամբ իրավական գործընթացներ ծավալել, ինչպես Ռոբերտ Քոչարյանի դեպքում է, ում իշխանությունը մեղադրում է սահմանադրական կարգի տապալման մեջ:
1996–ից, այսինքն՝ Լևոն Տեր–Պետրոսյանի կողմից սահմանադրական կարգի տապալումից հետո է, որ վերջինս կրկին շարունակել է իր իշխանությունը:

ԱԺ նախկին պատգամավոր, ընդդիմադիր Արշակ Սադոյանը միանշանակ համաձայն է Փաշինյանի հնչեցրած գնահատականին եւ հորդորում է սպասել, վստահեցնելով, որ այն իրավական հետեւանք է ունենալու.<<Եթե Նիկոլ Փաշինյանը մեղադրում է Լեւոն Տեր-Պետրոսյանին իշխանության բռնազավթման մեջ, եթե Նիկոլ Փաշինյանը մեղադրում է նաեւ 2008-ին նույն փաստի մեջ, ուրեմն պետք է կասկած չունենալ, որ հաջորդաբար նաեւ պրոցեսներ են սկսվելու: Ի վերջո, կարեւորն այն է, որ նա մեղադրում է, դատապարտում բոլոր անարդարությունները՝ սկսած 1996 թվականից>> մեզ հետ զրույցում ասաց Արշակ Սադոյանը:

Մեր դիտարկմանը՝ իսկ ինչու Քոչարյանի դեպքում կա իրավական գործընթաց, իսկ մյուսների դեպքում՝ ոչ, եթե բոլորն էլ մեղավոր են այսպես կոչված սահմանադրական կարգի տապալման մեջ.<<Եթե չկա, դա չի նշանակում, թե չի լինի, ես վստահ եմ, որ լինելու է>>, ասաց Սադոյանը հիմնավորելով իր համոզմունքը.<<Փաշինյանն ասաց՝ այո, սկսել ենք ու պատժելու ենք բոլոր ընտրությունների կեղծարարներին, սահմանադրական կարգի խախտողներին: Բնական է, որ սկսել ենք համեմատաբար թարմից, բայց դա չի նշանակում, որ չենք անդրադառնալու 96 թվականին>>: Հիշեցրեցինք, որ ամենաթարմը Սերժ Սարգսյանն է, ոչ թե Ռռոբերտ Քոչարյանը, բայց Սադոյանը չնահանջեց.<<Ինչ է Սերժ Սարգսյանին մեղադրանքներ չի ներկայացվելու՞: Ինչ է չսկսի՞ նրանից, ով տաս հոգու մահվան մեղավոր է>>: Սադոյանի պնդմամբ պետք է սկսել նրանից, ում մեղքն ամենածանրն է.<<Տեր Պետրոսյանի մեղքը համեմատաբար քիչ է, իր ժամանակ գոնե ես փախած եմ եղել, բայց ինձ չեն սպանել>>:

Ի պատասխան Փաշինյանի հայտարարության ՀԱԿ շրջանակների հակադարձ մեղադրանքներին, որ եթե առաջին նախագահը չարիք է, ապա չարիք է նաեւ Փաշինյանը, ով 2008-ին կանգնեց նրա կողքին եւ ուզում էր վերադարձնել իշխանության, Սադոյանը նշեց.<<Մտածում էր հետեւյալը՝ կարող է պատահի Լեւոն Տեր-Պետրոսյանը փոշմանել է իր կողմից արված հանցանքների համար ու հիմա ուզում է վերադառնալ իշխանության եւ փոխի այն, որովհետեւ փոշմանել է>>:

Անի Սահակյան