Տապալված, կեղծ օրակարգ. Ինչի՞ն է օգնելու «հայրենի հողի» ֆոնին ադրբեջանցիների արած լուսանկարները

Նոյեմբերի 17-21-ը կայացավ լրագրողների խմբերի փոխանակում. Հայաստանի և Արցախի լրատվամիջոցների ներկայացուցիչներն այցելել են Ադրբեջան, իսկ ադրբեջանական ԶԼՄ ներկայացուցիչները՝ Հայաստան և Արցախ: Այս մասին հայտնեց Հայաստանի արտգործնախարարության մամուլի խոսնակը:

Հայտնի է, որ ծրագիրը նախապատրաստվել և կյանքի է կոչվել ԵԱՀԿ գործող նախագահի անձնական ներկայացուցչի համակարգմամբ և Հայաստանի, Արցախի և Ադրբեջանի համապատասխան գերատեսչությունների ներգրավմամբ»: Այլ մանրամասներ Հայաստանի արտաքին քաղաքական գերատեսչության խոսնակը չի փախանցել:

Հայտնի է նաև, որ Ադրբեջան էին այցելել «Մեդիամաքս» լրատվական գործակալության խմբագիր Դավիթ Ալավերդյանը, «Շանթ» հեռուստաընկերության մեկնաբան Արտյոմ Երկանյանը և Արցախի հանրային հեռուստաընկերության մեկնաբան Էդգար Էլբակյանը:
Սա առաջին փորձը չէ: Դեռ Ադրբեջանի նախկին նախագահ Հեյդար Ալիևի ժամանակ նման այցեր, շփումներ տեղի են ունեցել:

Առհասարակ շեշտենք, որ մինչև վերջին մի քանի տարիներին՝ Հայաստան ժամանել են լրագրողներ ու իրավապաշտպաններ, ՀԿ ներկայացուցիչներ Ադրբեջանից: Ու նրանք եղել են ընդդիմադիր հայացքներ ունեցող:
Բայց ի՞նչ տեղի ունեցավ նրանք հետ: Այդ մարդիկ դատվեցին Հայաստանի օգտին լրտեսություն անելու մեղադրանքներով, ապա փախան Ադրբեջանից:

Ի՞նչ է փոխվել, ուրեմն այսօր: Փոխվել է այն, որ փոխայցերը, ճիշտ է, իրականացվեցին, բայց վստահաբար դրանք ադրբեջանցի այն լրագրողներն են, որոնք ընդդիմադիր չեն կարող լինել: Այսինքն, նրանք իրենց պատրաստած նյութերում ներկայացնելու են իշխանական տեսակետ: Այն է՝ ռազմատենչ, պահանջատեր քարոզչություն: Նրանք արդեն իսկ համացանցում նկարներ են հրապարակում՝ «հայրենի հողի» ֆոնին արված և համապատասխան գրառումներ արել:

Հետևաբար, պետք է հասկանալ, եթե Ադրբեջանի իշխանությունը ռազմատենչ քաղաքականություն չի փոխել, ամեն 10, 20 օրը մեկ Հայաստանն ու Արցախը գրավելու հայտարարություններ է անում, շարունակում է զինվել՝ ի՞նչ կոպեկի արժեք ունի՝ «ժողովուրդներին խաղաղության նախապատրաստելու» կեղծ օրակարգը:
Ադրբեջանում 2 տասնամյակից ավելի հայատյացության քաղաքականություն է տարվել:

Այնտեղ մեծացել է սերունդ, որը ատում է հային, միայն այն պատճառով, որ նա հայ է:
Հետևաբար՝ այս պայմաններում ինչո՞վ է օգնելու զավթողական քարոզչություն ու քաղաքականություն վարող երկրի լրագրողների այցը:

Թամար Բագրատունի