Ռուսները, փաստորեն, դժգոհ են հեռացել Երևանից. Փաշինյանի բացահայտումը
Մոսկվան ու Երևանը չեն կարող գործել միմյանց դեմ, քանի որ նրանք ռազմավարական գործընկերներ են, այս մասին հայտարարել է Հայաստանի վարչապետ Նիկոլ Փաշինյանը ռուս լրագրողների հետ հանդիպմանը:
«Այդպիսի բան չի կարող լինել, որ մենք ցանկանանք վնասել Ռուսաստանին: Համենայն դեպս դա մեր պատկերացումն է ռազմավարական գործընկերության մասին… Մենք չենք կարող ոչ մի տեղ և երբեք գործել միմյանց դեմ»,- հայտարարել է Փաշինյանը՝ անդրադառնալով այն մտահոգություններին, որ ԱՄՆ ֆինանսավորմամբ Հայաստանում բացված կենսաբանական լաբորատորիաները կարող են գործել Ռուսաստանի դեմ: Փաշինյանը նաև նշել է, որ այդ լաբորատորիաները, թեև ստեղծվել են ԱՄՆ-ի ֆինանսավորմամբ, բայց այսօր Հայաստանի Հանրապետության բացառիկ սեփականությունն են:
«Ոչ մեկ դրսից առանց մեր երկրի իշխանության ներկայացուցիչների թույլտվությամբ չի կարող ներթափանցել այդ օբյեկտների տարածք»,- ասել է նա: Փաշինյանը նաև խոսել է այն մասին, թե ինչու Լավրովի՝ երևանյան այցի ժամանակ չի ստորագրվել նախատեսվող հուշագիրը, որով թույլատրվում էր ռուս մասնագետների մուտքը լաբորատորիաներ:
«Մենք Ռուսաստանի հետ ունեինք պայմանագրի նախագիծ, մենք պատրաստ էինք այն ստորագրել, բայց ռուս գործընկերները որոշեցին դրա վրա էլի աշխատել: Կաշխատենք դրա շուրջ, ու երբ երկու կողմերն էլ համաձայն կլինեն՝ կստորագրենք»,- ասել է Փաշինյանը:
Փաստորեն, Լավրովի վերջին այցի ժամանակ, Հայաստանում բացված կենսաբանական լաբորատորիաների շուրջ հուշագիր չի ստորագրվել: Նշանակում է, մնում են չհամաձայնեցված հարցեր:
Ըստ ամենայնի, ռուսական կողմին ինչ-որ հարցեր դեռ չեն բավարարում, նրանք ձգտում են մեծ լիազորություններ ստանալ հայկական կողմից: Կարելի է ուրեմն եզրակացնել, որ ռուսական կողմը Լավրովի վերջին հանդիպման ժամանակ Երևանից դժգոհ են հեռացել:
Միևնույն ժամանակ Փաշինյանը ռուս լրագրողների հետ հանդիպմանը հայտնել է, որ ռուսական գազի գինը Հայաստանի համար մինչև 2020թ. գարուն չի բարձրանա. «Ռուսական գազի գինը մինչև գարուն չի բարձրանա»,- ասել է Փաշինյանը:
Նա հավելել է, որ Ռուսաստանի նախագահ Վլադիմիր Պուտինի հետ այդ հարցի քննարկումների արդյունքում կողմերը պայմանավորվել են, որ սակագինը պետք է լինի այնպիսին, որ չհարվածի Հայաստանի տնտեսությանը:
Այսինքն, այս հարցում ևս՝ առայժմ վերջնական որոշում չկա, և գարնանը սակագները կարող են փոփոխվել:
Փոխարենը Փաշինյանի կողմից կան միայն հավաստիացումներ, թե որքան լավն են հայ-ռուսական հարաբերությունները: Նա առիթ բաց չի թողնում Ռուսաստանի ուղղությամբ ռևերանսներ անել:
Թամար Բագրատունի
Հետևեք մեզ Viber-ում
