Մետրոյի նախագծից խեր-խաբար չկա
Երևանի ավագանու «Լույս» խմբակցության անդամները ֆեյսբուքյան գրառումներում բարձրաձայնում են, որ տրանսպորտային նոր հանգույցների կառուցման և ճանապարհային ցանցի զարգացմանն ուղղված բոլոր ծրագրերը միֆ են:
Թեհմինա Վարդանյանը ֆեյսբուքյան իր էջում գրում է, որ «Հայրենիք» կինոթատրոնի հարակից հրապարակի տրանսպորտային հանգույցի նախագծը, որի մասին հայտարարել էր քաղաքապետ Հայկ Մարությանը, ներառված չէ Երևանի հնգամյա զարգացման ծրագրում. «Հարգելի համաքաղաքացիներ, պետք է Ձեզ հերթական անգամ հիասթափեցնեմ։ Մոռացեք այս նախագիծը։ Քաղաքապետի կողմից ներկայացված հնգամյա զարգացման ծրագրում չկա այս նախագիծը, ինչպես եւ չկա որեւէ ստորգետնյա կամ վերգետնյա անցում կառուցելու տեսլական։ Չկա երթեւեկությունը թեթեւացնող որեւէ էստակադայի /հանգույցի կառուցում!!!
Ալեեեեեե հոպ, կա նախագիծ, չկա նախագիծ»,- գրել է նա:
«Լույս» խմբակցության անդամ Անի Խաչատրյանն էլ բարձրացրել է մետրոյի նոր կայարանի և ճոպանուղու հարցը` նշելով, որ դրանք ևս միֆ են: Ըստ ավագանու անդամի` մետրոյի և ճոպանուղու էսքիզները, որոնք կայունորեն գովազդվեցին, կարող էին անել ճարտարապետական ավարտած կամ նույնիսկ դեռ սովորող ցանկացած մեկը.
«Բայց այ իրագործման համար Ձեր նշած ներդրումներին սպասում էին նաեւ քաղաքապետեր Համբարձում Գալստյանը, Վահագն Խաչատրյանը, Աշոտ Միրզոյանը, Վանո Սիրադեղյանը, Սուրեն Աբրահամյանը, Ալբերտ Բազեյանը, Ռոբերտ Նազարյանը, Երվանդ Զախարյանը, Գագիկ Բեգլարյանը, Կարեն Կարապետյանը, Տարոն Մարգարյանը....»,- գրել է նա` ընդգծելով, որ քաղաքային նոր իշխանության հնգամյա ծրագրում մետրոյի եւ ճոպանուղու մասին գրված է. սկիզբ՝ 2019, ավարտ՝ կախված ներդրումներից: Իսկ ներդրումներ, քանի որ չկան, հետևաբար, դրանք թղթի վրա մնացած նախագծեր են:
Մեր կողմից ավելացնենք, որ գեղեցիկ ու դիտարժան նախագծեր ու էսքիզներ «Երևաննախագիծ» ինստիտուտի արխիվներում, մշակված դեռևս խորհրդային տարիներից, շատ կան: Անկախության շրջանում ևս Երևանի զարգացման բազմաթիվ հետաքրքիր նախագծեր են մշակվել, դրանցից որոշներն անգամ ներկայացվել են հանրությանը: Օրինակ` Գլխավոր պողոտայի մի հատվածում պիտի կառուցվեր Հին Երևան պատմաճարտարապետական հատվածը, որտեղ պետք է համախմբվեին Երևանի կենտրոնի հուշարձան շենքերը, որոնք տարբեր տարիներին քանդվել ու կոնսերվացվել են: Ճարտարապետ Լևոն Վարդանյանը նախագիծը վաղուց է ավարտել, բայց ներդնողներ այդպես էլ չկան: Կար գաղափար` Հաղթանակ կամրջից դեպի Իսակովի պողոտա ձգվող Հրազդանի ձորի և Կիլիկիա թաղամասի հատվածում կառուցել նոր Երևան կամ Երևան սիթի թաղամասը, որը կլիներ ժամանակակից գործարար կենտրոն: Այսպիսի նախագծերի օրինակներ շատ կարելի է բերել, ավելին` այդ գաղափարներով կարելի է անվերջ հիանալ: Բայց երբ դրանք մնում են թղթի վրա, դա առնվազն նշանակում է` քաղաքային իշխանությունը չի կարողանում լավ աշխատել: Երևանը մշտապես ունեցել է շատ մեծ ներդրումային պոնտենցիալ, որի արդյունավետ օգտագործումը ապահովել է նաև տնտեսական աճ: Հայկ Մարությանը, իր աշխատակազմի աշխատավարձերը բարձրացնելուն զուգահեռ, պարտավոր է նաև հանրությանը զեկուցել, թե ինչու են մետրոյի, ճոպանուղու և այս կարգի մնացած նախագծերը մնացել թղթի վրա:
Հայկ Դավթյան
Հետևեք մեզ Viber-ում
