Նիկոլ Փաշինյանը պարտական է նախկինների թողած ստվերին

Տնտեսական 4,9 տոկոսանոց աճը, որը դրված է 2020 թվականի պետական բյուջեի հիմքում ո'րևէ կերպ չի կարող տնտեսական հեղափոխություն ապահովել: Սա այլևս հաստատուն մասնագիտական կարծիք է, որին անգամ իշխանությունները չեն փորձում ընդդիմանալ: Իշխանության թևի տնտեսական գործիչներն, ընդամենը, իրավիճակից դուրս գալու համար արդարանում են, ասելով` եթե կանխատոսումն արված է 4,9 տոկոսի համար, բայց դա ամենևին էլ չի նշանակում, թե դրանից բարձր աճ չի լիելու: Ավելին, որոշ իշխանական պատգամավորներ չեն բացառում, որ աճը կարող է երկնիշ լինել` մինչև 10-12 տոկոս:
2020 թվականին Հայաստանի բյուջեի նախագծով նախատեսվում է ավելի քան 1 տրիլիոն 880 միլիարդ դրամի կամ շուրջ 4 միլիարդ դոլարի ծախս: Եկամուտները ծախսերից պակաս կլինի մոտ 200 միլիարդ դրամով ։ Թե՛ ծախսերը, թե՛ եկամուտները անցած տարվա համեմատությամբ ավելացել են 13-14 տոկոսով: Գալիք տարվա բյուջեն նախորդ տարվա համեմատ 700 միլիոն ԱՄՆ դոլարով ավել է: Այս ավելացումները, ինչպես նաև ընթացիկ` 2019-ի բյուջետային մուտքերի աճն ապահովվել է բացառապես ստվերի դեմ պայքարի հաշվին: Իմ քայլականներն այս մասին մեծ հպարտությամբ են հայտարարում և ինքագոհ տոնով արձանագրում, թե սա հենց տնտեսական հեղափոխությունն է, որ կա: Դասականը կասեր` իսկական լո-լո:
Ստվերի դեմ պայքարն, իհարկե, կարևոր բան է, բայց դրանով տնտեսական հեղափոխություն, իրականում, չես անի: Փաստացի, նախկինում, տնտեսության մեջ բավականին մեծ չհարկված պոտենցիալ է եղել , որն այսօր հարկային դաշտ բերելով, ապահովվում է պետական բյուջեի ավելացում:
Այսինքն` իրականում Նիկոլ Փաշինյանն ու իր թիմն, առայժմ վայելում են նախկինների օրոք ստեղծված տնտեսության արդյունքը: Միջին վիճակագրական ցանկացած կրպակատեր գիտի, որ ստվերի դեմ պայքարը չի կարող հավերժական լինել: Ինչ-որ պահից սկսած, ստվեր կամ որ նույնն է, հարկային դաշտից դուրս գործող բիզնես այլևս չի լինի: Հետաքրքիր է` նոր իշխանություններն ի ՞նչ են անելու այն ժամանակ, ո ՞ւմ կամ ինչի ՞ դեմ են պայքարելու, որ կարողանան բյուջե լցնել:

Հայկ Դավթյան