Առջեւում պատերազմն է
Իշխանության եւ Բարգավաճ Հայաստանի միջեւ փոխհարաբերությունները սրվել են: Լարվածությունն առաջ եկավ երկու օր առաջ, երբ օրակարգ բերվեց ԲՀԿ-ական Գեւորգ Պետրոսյանի՝ միասեռականների մասին հայտնի նախագիծը: Իմքայլականները բավական չէ չընդունեցին այն նիստերի օրակարգ, այլ ԱԺ հայտարարությունների ժամը եւ ընդհանրապես ամբողջ օրը նվիրեցին ԲՀԿ-ի բմբուլները քամուն տալուն: Սեքսի ու սեռականության մասին ելույթներ, թաքնված գեյ լինելու մասին մեղադրանքներ. ահա այն ամենը, ինչը ծնվեց նրանց վառ երեւակայությունում՝ առ Գեւորգ Պետրոսյանը: Փառքի հետ էլ ապտակներ հասցրեցին ԲՀԿ-ին:
Սա բավական չէր, կառավարություն-ԱԺ հարցուպատասխանի ժամանակ սկսված գրոհը շարունակեց վարչապետ Ննիկոլ Փաշինյանը: Առիթը ԲՀԿ-ական Վարդան Ղուկասյանի հայտարարություններն էին քրեական ենթամշակույթը կրողների վերաբերյալ օրենսդրական նախաձեռնության մասին: Ղուկասյանն ասել էր, որ նրանք մեր հասարակության ամենախելոք խավն են: Նիկոլ Փաշինյանին այդ հայտարարությունը այն աստիճան էր վրդովվեցրել, որ նա հերթական անգամ հիշեցրեց ու սպառնաց իր սիրելի պատժիչ մեթոդով, խոստացավ ասֆալտին փռել բոլոր նրանց, ովքեր կպաշտպանեն ու կոմպրոմիսի կգնան այդ շերտերի հետ: Բայց սա ամենը չէր, նա բացահայտ մեղադրանքներ ուղղեց Ղուկասյանին՝ ասելով, որ Գյումրիի կեսը թալանել է իր քաղաքապետության ժամանակ: Սակայն մեկ օր հետո պարզ դարձավ, որ ԲՀԿ-ն նահանջելու մտադրություն չունի, իսկ Վարդան Ղուկասյանն էլ չի վախենում ծեփվելուց: «Չեն զգո՞ւմ, որ ես այդպիսի մարդ չեմ, որ ասֆալտին փռելուց, պատերին ծեփելուց վախենամ, վախենում եմ միայն Աստծու ահեղ դատաստանից»,-ԱԺ-ում լրագրողների հետ զրույցում ի պատասխան հայտարարեց Վարդան Ղուկասյանը .«Ինչ-որ սխալ բան չեմ ասել, յուրաքանչյուր պատգամավոր իր կարծիքն իրավունք ունի հայտնել, զգում եմ՝ կարծիքներին արտահայտվելուն բռնանում են մանավանդ հանրապետության առաջին համարի կողմից»:
Ավելին՝ Ղուկասյանն անցավ հակահարձակման եւ հայտարարեց, որ Գյումրին ոչ թե ինքն է թալանել, այլ Նիկոլ Փաշինյանի քաղաքական եղբայր ու հենարան ՀՀՇ-ն:
«Գիտե՞ք դրա ապացույցը որն է. ոչ թե պարոն վարչապետն է հիմա առանց կաշառքի ու կեղծիքի ընտրվել, այլ ես եմ ընտրվել էն ժամանակ առանց կեղծիքի և առանց կաշառքի: Իր քաղաքական հենարան, մեծ եղբայր հանդիսացող ՀՀՇ-ն 1996 թ., երբ մենք հաղթեցինք, ամբողջ պետական ապարատով էդ արկղերը վերցրին ու դրեցին աջ կողմը ու անցավ մեկ այլ թեկնածու: Եվ թալանը կատարվել է ՀՀՇ-ի ժամանակ, ՀՀՇ-ի բարձրաստիճան բոլոր ղեկավարների: Էնքան գումար էր եկել ՀՀ, որ ոչ միայն Գյումրին կկառուցվեր, այլ երեք անգամ ՀՀ-ն կկառուցվեր, 37 գործարան թալանվեց: Ինքը, որտեղից որ ծնվել է, նրանք ենք թալանել»:
Առճակատումը շարունակեց նաեւ ԱԺ նախագահ Արարատ Միրզոյանը՝ լրագրողների հետ ճեպազրույցներում կրկին մեղադրանքներ ուղղելով Ղուկասյանի նկատմամբ: Դիտարկմանը, որ եթե Ղուկասյանը հանցագործ է, ինչ գործ ունի ԱԺ-ում, Միրզոյանը հորդերեց հարցն ուղղել իրավապահներին:
Ակնհայտ է, որ իշխանություն-ԲՀԿ փոխհարաբերություններն այլ ընթացք են ստացել, քան նախկինում էին եւ վերջին օրերի առճակատումները հուշում են, որ պատերազմը դեռ առջեւում է:
Անի Սահակյան
Հետևեք մեզ Viber-ում
