Հակահայկական հիստերիայի սկիզբ՝ Ռուսաստանում

Օրերս սկանդալային միջադեպ է տեղի ունեցել Ռուսաստանում: Ռուսաստանյան լրատվամիջոցները հայտնեցին, որ ռուս պատգամավորը սև ներկով պղծել է եկեղեցու բակում տեղադրված Գարեգին Նժդեհի հուշատախտակը:

Պարզվում է, Արմավիրի քաղաքային դումայի պատգամավոր Ալեքսեյ Վինոգրադովը մտել է ՀԱԵ-ի տարածք և Հայաստանի ազգային հերոս Գարեգին Նժդեհի հուշատախտակը ներկել սև ներկով: «Красная Весна»-ի թղթակցին Ալեքսեյ Վինոգրադովը հայտարարել է, որ ինքը դիմել է այս քայլին, քանի որ նոյեմբերի 11-ին լրացել է երկշաբաթյա ժամկետը, որի ընթացքում մարզային և տեղական իշխանությունները, նաև Ռուսաստանի հայերի միության տեղական մասնաճյուղի ներկայացուցիչները խոստացել էին ապամոնտաժել Նժդեհի հուշատախտակը:

Երեկ Ռուսաստանում Հայաստանի դեսպանությունը հանդես է եկել հայտարարությամբ՝ նշելով, որ Արմավիր քաղաքի հայկական եկեղեցու տարածքում քաղաքային դումայի պատգամավոր Ալեքսեյ Վինոգրադովի արարքը կարող է ազգամիջյան լարվածություն առաջացնել:

«Խորը վրդովմունք ենք հայտնում Արմավիրում տեղի ունեցած միջադեպի կապակցությամբ: Քաղաքային դումայի պատգամավոր Ալեքսեյ Վինոգրադովի գործողությունը գնահատում ենք վանդալիզմի ակտ հայկական եկեղեցու տարածքում և օրինական կարգին հակասող կամայականության դրսևորում: Այդ արարքը չի համապատասխանում հայ-ռուսական փոխհարաբերությունների ոգուն և կարող է ազգամիջյան լարվածություն առաջացնել», - «Ինտերֆաքս»-ի փոխանցմամբ, մեկնաբանել է Ռուսաստանում Հայաստանի դեսպանությունը: Հայաստանի դիվանագիտական ներկայացուցչությունը նաև նշել է, որ Ռուսաստանի համապատասխան մարմիններին կտեղեկացնեն Արմավիրի հայկական եկեղեցու տարածքում տեղի ունեցած վանդալիզմի մասին:

Սա իսկապես, կարող են հանգեցնել ազգամիջյան լարվածության, եթե հաշվի առնենք այն հանգամանքը, որ Ռուսաստանում պաշտոնյաները մի քանի անգամ բարձրաձայնել են Նժդեհի թեման:

Վերջերս էլ մեկ անգամ Ալիևը հարկ համարեց Պուտինի ներկայությամբ ռուսական քարոզչության վրա «յուղ լցնել», Նիկոլ Փաշինյանը ստիպված եղավ պատասխանել:
Ի դեպ, այսօր մեկ այլ քրեական լուր ստացվեց Ռուսաստանից: Թաիլանդական բռնցքամարտի աշխարհի եռակի չեմպիոն (Քիկբոքսինգի համաշխարհային պրոֆեսիոնալ ասոցիացիայի վարկածով) Աշոտ Բոլյանը Մոսկվայի հարավ-արևմուտքում սպանվել է, հայտնում են ռուսական գործակալությունները:

«Նախօրեին՝ երեկոյան ժամերին, 40-ամյա մարզիկը Նախիմովի պողոտայում գտնվող տնից դուրս է եկել և շարժվել դեպի իր ավտոմեքենան, որտեղ անհայտ անձը մի քանի կրակոց է արձակել նրա ուղղությամբ, այդ թվում՝ գլխին, ու դիմել փախուստի», - հայտնել է գործակալության զրուցակիցը։

Այս տեղեկությունը ТАСС-ին հաստատել է երկրի Քննչական Կոմիտեի Մոսկվայի քննչական գլխավոր վարչության պաշտոնական ներկայացուցիչ Յուլյա Իվանովան։
«ՔԳՎ քննչական մարմինները հարուցել են քրեական գործ՝ «Սպանություն» և «Զենքի ապօրինի կրում» հատկանիշներով: «Քննության տվյալներով՝ նոյեմբերի 13-ի երեկոյան՝ բնակելի տան մոտ, որը գտնվում է Նախիմովի պողոտայում, անհայտ անձը մի քանի կրակոց է արձակել 1979 թվականին ծնված տղամարդու ուղղությամբ, որոնցից նա մահացել է դեպքի վայրում», - տեղեկացրել է ՔԳՎ ներկայացուցիչը։ Իրականացվում են քննչական գործողություններ և օպերատիվ-որոնողական միջոցառումներ։

40-ամյա Աշոտ Բոլյանը Քիկբոքսինգի համաշխարհային պրոֆեսիոնալ ասոցիացիայի վարկածով թաիլանդական բռնցքամարտի աշխարհի եռակի չեմպիոն է, միջազգային տարբեր մրցաշարերի 17-ակի չեմպիոն։ Նա գլխավորել է Հայկական մարզական ֆեդերացիաների համաշխարհային ասոցիացիան։ Բացի այդ, եղել է Մոսկվայում գրանցված «Կարատ» ընկերության գլխավոր տնօրենը։

Թամար Բագրատունի