Տիկին, ձեր կյանքն է ձեզ հերքում

Վարչապետի տիկին Աննա Հակոբյանը իր «չնաշխարհիկ» մուծման երեկոյի ընթացքում նույնքան չնաշխարհիկ ելույթ է ունեցել:

Խոսքը ընթրիքի մասին է՝ «Ժպիտների քաղաք» բարեգործական հիմնադրամի համար կազմակերպված: Չնայած այս դեպքում բարեգործւթյուն անվանելը նույնիսկ մեղք է, որովհետեւ տիկինը նախապես սահմանել էր, թե ինչքան պետք է մուծվեն հիմնադրամի ընկեր, ինչքան՝ բարեկամ եւ հարազատ դառնալու համար:
Այլոց նկատմամբ հարկադրանքը չի խանգարել սակայն տիկնոջը մի քիչ դերասանություն անել: <<Մի քանի օր առաջ ես մասնակցում էի «Հայ մայրեր» բարեգործական կազմակերպության դրամահավաք ընթրիքին, որտեղ իմ սիրելի զարդերից մեկը նվիրաբերեցի աճուրդի համար: Այն շատ գեղեցիկ կախազարդ էր Շուշիի Սուրբ Ղազանչեցոց եկեղեցու մանրաքանդակով, ճիշտ է՝ ոսկուց, բայց ոչ այնքան թանկարժեք: Զարդը գնվեց 1 միլիոն դրամով, և ես մտածեցի, որ դա ավանդույթ կդարձնեմ: Որովհետև մի ականջօղ ավելի, մի ականջօղ պակաս, մի կախազարդ ավելի, մի կախազարդ պակաս՝ շատ բան չի փոխի իմ կյանքում: Ճիշտ է՝ հաճելի է գեղեցիկ զարդ կամ իր ունենալը, բայց իմ օրինակով կասեմ՝ հարյուրապատիկ հաճելի է այն նվիրելը: Մի քիչ ավելի գումար, մի քիչ պակաս գումար… իսկապես շատ բան չի փոխում մեր կյանքում…>>,- ելույթ է ունեցել նա:

Որքան կուզենայինք հավատալ տիկին Աննա ձեր այս խոսքերին, որ մի ականջօղ ավել, մեկը պակաս, ձեր կյանքում բան չի փոխվի: Եթե նույնիսկ հավատանք էլ, ապա, այո, գուցե այդ զարդը ձեր կյանքում բան չի փոխի, որովհետեւ ինչպես դուք եք ասում ՝ այն այնքան էլ թանկարժեք չէ… Բայց մենք տեսնում ենք չէ՞ ձեր նիստուկացը, ձեր վարքն ու բարքը ու թե թանկարժեք իրերն ինչքան բան են փոխում ձեր կյանքում: Մենք տեսնում ենք չէ՞, որ ձեր կյանքը փոխում է առանձնատան շքեղ վերանորոգումը, 500 հազար դոլարանոց գերթանկարժեք ավտոմեքենան, մենք տեսնում ենք չէ՞, որ եթե ուղղաթիռ չլինի, դուք ոտքներդ գետնին չեք դնի, մի մետրից մյուսը չեք գնա: Մենք տեսնում ենք ձեր հագուկապը, ձեր նիստուկացը, ճոխ վոյաժները, շուրջերկրյա ճանապարհորդությունները: Այո, հավատում ենք, որ այդ մատանին, ականջօղը ձեր կյանքում բան չեն փոխում, գուցե միայն այն պատճառով, որ դրանք ինչպես դուք եք ասում, այնքան էլ թանկ չեն…Բայց հակառակը պնդել դուք պարզապես չեք կարող, քանի որ ձեր կյանքն ամեն օր ձեր խոսքերի հակառակն է ապացուցում:

Անի Սահակյան