Ալիևին նյարդայացնելու ու նրա գիծը փլուզելու ճանապարհը

Ադրբեջանում Ռուսաստանի դեսպան Միխայիլ Բոչարնիկովին հրավիրել են Ադրբեջանի ԱԳՆ և բողոքի նոտա հղել՝ կապված Ռուսաստանում Արցախի Հանրապետության ներկայացուցիչների ընդունելության հետ: ԱԳՆ հաղորդագրության մեջ նշվում է, որ նոյեմբերի 6-ին Բոչարնիկովի հետ հանդիպել է Ադրբեջանի փոխարտգործնախարար Խալիֆ Խալիֆովը:

Ռուսաստանի դեսպանին նոտա են հղել՝ կապված Արցախի Հանրապետության արտգործնախարար Մասիս Մայիլյանի և կրթության նախարար Լեռնիկ Հովհաննիսյանի՝ Ռուսաստան իրականացրած այցի հետ: Մայիլյանն ու Հովհաննիսյանը Մոսկվայում էին նոյեմբերի սկզբին: Նոտայում նշվում է, որ «Ադրբեջանի օկուպացված տարածքներում ստեղծված անօրինական միավորման այսպես կոչված «ներկայացուցիչների» այցը Ռուսաստանի Դաշնություն և նրանց հանդիպումները մի շարք ռուս փորձագետների և ակադեմիական կենտրոնների աշխատակիցների հետ ծառայում են մոտ 30 տարի շարունակվող Հայաստանի փորձերին՝ ամրապնդել ստատուս քվոն ադրբեջանական տարածքներում, ինչպես նաև Ադրբեջանի տարածքների օկուպացիայի շարունակությանը»:

Հիշեցնենք, Արցախից այցելել էին Ռուսաստանի Դաշնություն և նրանց հանդիպումները Ռուսաստանի մի շարք փորձագետների ու գիտական կենտրոնների աշխատակիցների:
Բաքվում հիստերիա է: «Այդ կապակցությամբ արտգործնախարարությունը ռուսական կողմին ներկայացրել է իր դիրքորոշումն առ այն, որ նման այցերը վնաս են հասցնում բանակցային գործընթացին և ստվեր են գցում Ադրբեջանի ու Ռուսաստանի միջև գոյություն ունեցող անկեղծության ոգու ու մեծ վստահության վրա, ինչպես նաև չեն համապատասխանում Ադրբեջանի ու Ռուսաստանի միջև 1997 թվականի հուլիսի 3-ին ստորագրված Բարեկամության, համագործակցության և փոխադարձ անվտանգության մասին պայմանագրին», - նշված է բողոքի նոտայում:

Այս ամենից բացի, պաշտոնական Բաքուն նաև գտնում է, որ Ղարաբաղի ներկայացուցիչների այցելությունները Ռուսաստան և նրանց հանդիպումների հնարավորություն ընձեռելը չեն համապատասխանում Ռուսաստանի միջնորդական պարտականություններին՝ որպես ղարաբաղյան հակամարտության կարգավորմամբ զբաղվող ԵԱՀԿ Մինսկի խմբի համանախագահ երկիր ու ՄԱԿ-ի Անվտանգության խորհրդի մշտական անդամ: «Ադրբեջանական կողմը դեսպան Բոչարնիկովի ուշադրությունն է հրավիրել իր ակնկալիքների վրա, որ ռուսական կողմն անհրաժեշտ բոլոր միջոցները կձեռնարկի նման անօրինական այցերը կանխելու համար», - նշված է դեսպանին փոխանցված բողոքի նոտայում:

Բողոքի նոտան Ռուսաստանի դեսպանին է փոխանցել Ադրբեջանի արտաքին գործերի փոխնախարար Խալաֆ Խալաֆովը: Այդ հանդիպմանը դեսպան Բոչարնիկովն ասել է, որ հակամարտության հարցում Ռուսաստանի դիրքորոշումը շատ լավ հայտնի է ու չի փոխվել: Նրա խոսքով՝ չճանաչված սուբյեկտների ներկայացուցիչների ցանկացած այցերը Ռուսաստան չեն արտահայտում երկրի պաշտոնական դիրքորոշումը: Դեսպանը նաև հայտնել է, որ Ռուսաստանի արտգործնախարարությանը կզեկուցի ադրբեջանական կողմի բողոքի մասին:

Նոյեմբերի 4-ին Արցախի Հանրապետության արտաքին գործերի նախարար Մասիս Մայիլյանը՝ Ռուսաստանում Արցախի Մշտական ներկայացուցչությունում հանդիպեց ռուսաստանյան փորձագիտական և ակադեմիական մի շարք կենտրոնների ղեկավարների և ներկայացուցիչների հետ։ Այս մասին տեղեկացնում է Արցախի Հանրապետության ԱԳՆ-ն: Այս հանդիպմանը ԱԳՆ ղեկավարը ներկայացրել է Արցախի արտաքին քաղաքականության առաջնահերթ ուղղությունները, մասնավորապես՝ Արցախի Հանրապետության միջազգային ճանաչման գործընթացը, ադրբեջանա-ղարաբաղյան հակամարտության խաղաղ կարգավորման գործընթացի ներկա փուլը։
Մայիլյանն անդրադարձել է տարածաշրջանային զարգացումներին, ԱՄՆ Կոնգրեսի Ներկայացուցիչների պալատի կողմից Հայոց ցեղասպանության ճանաչման վերաբերյալ ընդունված բանաձևին և դրա նշանակությանը, ինչպես նաև վերջերս Ստեփանակերտում կայացած Արցախի բարեկամների համաժողովին։

Հայկական կողմը պետք է ապահովի միջազգային ասպարեզում Արցախի ակտիվությունը: Դա ամրացնում է թեկուզ առայժմ չճանաչված Արցախի դիրքերը, ու մոտեցնում է Արցախի ինքնորոշման ճանապարհը:

Թամար Բագրատունի