Երբ կգա նաև ներկաների նախկին դառնալու ժամանակը. Քոչարյանի դատի բարդությունը

Հայաստանի երկրորդ նախագահ, Ռոբերտ Քոչարյանը, որպես սահմանադրական կարգի տապալման գործում ներգրավված է որպես մեղադրյալ և մյուս մեղադրյալների համեմատ գտնվում է անհավասար պայմաններում: Դատական նիստի ընթացքում նման հայտարարություն է արել նախկին պաշտպանության նախարար Սեյրան Օհանյանը, ով նույնպես նույն գործում ներգրավված է որպես մեղադրյալ: Նույն գործի շրջանակում մեղադրանք է առաջադրված նաև գլխավոր շտաբի նախկին պետ Յուրի Խաչատուրովին, նախագահի աշխատակազմի նախկին ղեկավար Արմեն Գևորգյանին: Ռոբերտ Քոչարյանը սակայն միակ մարդն է, ում նկատմամբ այս գործի շրջանակում որպես խափանման միջով ընտրվել է կալանքը: Սեյրան Օհանյանը խոսել է հենց այս տարբերակված մոտեցման մասին` իրավացիորեն նկատելով, որ իրենք անհավասար պայմաններում են և ինքը դրանից իրեն շատ վատ է զգում. <<Որպես իմ նախկին գերագույն գլխավոր հրամանտար, Ռոբերտ Քոչարյանն իր բոլոր խոստումները կատարել է: Այսինքն, եթե նա ասում է, որ չի թաքնվի քննությունից, հենց այդպես էլ կլինի, նրան չվստահելու հիմք էլ չկա>>,- ասել է Օհանյանը:
Պաշտպանները միջնորդել են գրավի դիմաց ազատ արձակել Ռոբերտ Քոչարյանին:
Հայկ Ալումյանն ու Արամ Վարդևանյանը դատական նիստի սկզբում նշել են, որ, այս դեպքում գրավը պետք է կիրառվի որպես այլընտրանքային միջոց, և ամենևին էլ դա չի նշանակում, որ եթե գրավ կիրառվի և Քոչարյանը հայտնվի ազատության մեջ, ապա նա կխոչընդոտի գործի քննությանն ու կթաքնվի քննությունից, ինչպես որ դատավոր Աննա Դանիբեկյանն էր գրել դեռ սեպտեմբերի 20-ի իր որոշման մեջ:
«Շուրջ 5 ամիս գտնվելով ազատության մեջ, Ռոբերտ Քոչարյանը ներկայացել է վարույթ իրականացնող մարմնի կանչով, մասնակցել է դատավարական գործողություններին և դատական նիստերին, չի կատարել վարույթ իրականացնող մարմնից թաքնվելու, քննությունից խուսափելուն ուղղված որևէ գործողություն: Ոչ դատախազությունը և ոչ էլ տուժող կողմը դատարանի այս հետևությունը չեն վիճարկել», - նշեց Ալումյանը:
Մեղադրող դատախազները, սակայն, ինչպես նախկին բոլոր դեպքերում, պնդել են, թե կա ռիսկ, որ Քոչարյանն ազատության մեջ կխոչընդոտի գործի քննությանը, ինչպես նաև կթաքնվի: Դատախազ Գևորգ Բաղդասարյանը նշել է, որ Ռոբերտ Քոչարյանը երկրից դուրս շատ ծանոթներ ունի, շատ կապեր ունի, տևական ժամանակ բնակվել է այնտեղ, և առկա է ռիսկը, որ կթաքնվի և կմեկնի: Նրա ասելով` գործով կան հիմնավոր կասկածներ առ այն, որ Ռոբերտ Քոչարյանը, ով մեղադրվում է սահմանադրական կարգը տապալելու մեջ, իսկապես կատարել է նման արարքը
«Մեր հետևությունը հենց ամենասկզբից կասեմ՝ մենք շարունակում ենք պնդել, որ առկա է քննությանը խոչընդոտելու և վարույթ իրականացնող մարմնից թաքնվելու ռիսկը», - ասել է Բաղդասարյանը:
Դատարանը հեռացել է խորհրդակցական սենյակ քննարկելու Քոչարյանի փաստաբանների միջնորդությունը՝ գրավով ազատ արձակելու մասին:
Դատական ակտը կհրապարակվի նոյեմբերի 7-ին՝ ժամը 12-ին: Դատարանի որոշումն, իսկապես բարդ է լինեու, մի կողմից հիմնավոր փաստերն են, մյուս կողմից օրվա հրամայականով պայմանավորված ճնշումները: Սակայն, դատավորի աշխատանքի ողջ հմայնքն ու բարդությունը կայանում է հենց դրանում` բարձր լինել կողմնակի ճնշումներից:
Ի վերջո, եթե այսօր նախկին նախագահը մեղադրանքը չի ընդունում՝ պնդելով, որ ենթարկվում է քաղաքական հետապնդմա, կնշանակի մի օր կգան նաև ներկաների նախկին դառնալու ժամանակը:

Հայկ Դավթյան