Պատային իրավիճակ ԼՂ խնդրում

Լարվածությունը պահպանվում է Ադրբեջանա-ղարաբաղյան շփման գծում անցյալ գիշեր լարված է եղել: Ադրբեջանը կրակի դադարեցման մասին պայմանավորվածությունը խախտել է ավելի քան 80 անգամ` օգտագործելով իր զինանոցում գտնվող գրեթե բոլոր տիպի հրետանային միջոցները և զրահատեխնիկա: Հրետանային կրակ է վարվել նաև Մատաղիսի ուղղությամբ (8 արկ): Հակառակորդի կողմից կրակի դադարեցման պայմանավորվածությունների խախտման արդյունքում` մահացու վիրավորումներ են ստացել ՊԲ պայմանագրային զինծառայողներ Տիգրան Մխիթարի Պողոսյանը (ծնվ. 1992թ.) և Արամ Նիկոլայի Առուշանյանը (ծնվ. 1972թ.): «Հակառակորդի ագրեսիվ գործողությունները չեզոքացնելու նպատակով` ղարաբաղյան բանակը դիմել է կանխարգելիչ քայլերի և թիրախային հարվածներ հասցրել նրա առաջնային դիրքերին ու կրակային հենակետերին` պատճառելով կենդանի ուժի և զինտեխնիկայի նշանակալի կորուստներ: Այս պահի դրությամբ հակամարտ զորքերի շփման գծի ողջ երկայնքով իրավիճակը համեմատաբար հանգիստ է», ասվում է ԼՂՀ ՊՆ մամուլի ծառայության այսօր տարածած մամլո հաղորդագրությունում: Փաստացի, Ադրբեջանը շարունակում է իրադրությունը պահել պատերազմական վիճակում պահել ղարաբաղյան գոտին: Սա նշանակում է, որ նա շարունակում է շանտաժի քաղաքականությունը` նպատակ ունենալով մեկ բան ապացուցել աշխարհին` կամ Բաքվի պահանջները պետք է բավարարվեն, կամ` պատերազմ: Բանակցություններն այս պահին` պաշտոնական Երևանին չեն ձեռնտու, քանի դեռ Ադրբեջանը խախտում է հրադադարը: Ու այս առումով, ստեղծվել է պատային իրավիճակ: Սերժ Սարգսյանը երեկոյան ամերիկյան կողմի նախաձեռնությամբ հեռախոսազրույց է ունեցել ԱՄՆ պետքարտուղար Ջոն Քերրիի հետ։ ՀՀ նախագահի պաշտոնական կայքում հրապարակված հաղորդագրությունում, մասնավորապես, ասվում է. «Քննարկվել է Լեռնային Ղարաբաղի հակամարտության գոտում ապրիլի սկզբին Ադրբեջանի կողմից հրադադարի կոպիտ խախտման հետևանքով ստեղծված իրավիճակը: Նախագահ Սարգսյանն ընդգծել է, որ Բաքվի անպատասխանատու քայլերը մեծ վնաս են հասցրել բանակցային գործընթացին: ԱՄՆ պետքարտուղարը վերահաստատել է ղարաբաղյան հիմնախնդրի խաղաղ լուծմանն ուղղված գործընթացին Միացյալ Նահանգների լիակատար աջակցությունը: Երկուստեք ընդգծվել է, որ հիմնախնդրի խաղաղ լուծումն այլընտրանք չունի, և անհրաժեշտ է հիմնարար սկզբունքների հիման վրա գտնել փոխընդունելի լուծման մեխանիզմներ: Կարևորվել է ԵԱՀԿ Մինսկի խմբի համանախագահության դերակատարությունը` նկատի առնելով, որ այն հարցի կարգավորման միակ միջազգայնորեն ճանաչված ձևաչափն է»: Ամերիկյան Bloomberg-ին տված հարցազրույցում Ս.Սարգսյանն ասել է, թե պատերազմը Լեռնային Ղարաբաղում կարող է վերսկսվել ցանկացած պահի և որ հակամարտություն լուծման ուղղությամբ բանակցությունների հեռանկարը մեծ չէ: Սերժ Սարգսյանի խոսքով, Ռուսաստանի միջնորդությամբ ձեռք բերված հրադադարը կարող է բավարար չլինել կանխելու համար «է՛լ ավելի լայնածավալ» բախումները այս ամիս ավելի վաղ ադրբեջանցիների ու հայերի միջև «քառօրյա պատերազմից» հետո՝ «հարյուրավոր տանկերի» և շուրջ 30 հազար հրետանային արկերի գործադրմամբ: Ուշագրավ է, որ Ս.Սարգսյանը ամրագրել է, թե Հայաստանի համար «խելամիտ» չի լինի վերադառնալ Ադրբեջանի հետ խաղաղ բանակցությունների՝ առանց անվտանգության երաշխիքների, քանի որ «իրավիճակն այսօր բոլորովին այլ է»․ «Մինչ մենք բանակցություններ կվարենք, զինվորականներն այստեղ մարտական գործողություններ կծավալեն՝ փորձելով լուծել հակամարտությունը»: Թեև հրադադարի շուրջ բանակցությունները Մոսկվայում անցնում էին ՌԴ Զինուժի Գլխավոր շտաբի պետի միջնորդությամբ, ռուս խաղաղապահները, ըստ Սարգսյանի, անելիք չունեն հակամարտության գոտում: Նշելով, որ նախկինում բանակցությունների ընթացքում ռուսաստանյան ուժերի տեղակայման շուրջ խոսակցությունները «անհիմն չէին»՝ Հայաստանի նախագահն ասել է․ - «Այսօր ես նման հնարավորություն չեմ տեսնում»: «Եթե բանակցություններ չեն վարվում, ինչպե՞ս կարող են ռուսաստանյան ուժերը հայտնվել Ղարաբաղում կամ ադրբեջանական և ղարաբաղյան ուժերի միջև», - ասել է Սերժ Սարգսյանը: Հետաքրքրական է, որ նա հիշեցրել է, որ 2011-ին Կազանում Ալիևի հետ բանակցությունների շրջանակում ինքը պատրաստակամություն էր հայտնել դուրս բերել հայկական ուժերը Ադրբեջանի հինգ շրջաններից և համաձայնել խաղաղապահների տեղակայմանը․ «ՌԴ-ի, ԱՄՆ-ի և Ֆրանսիայի նախագահները երկու երկրների առաջնորդներին հորդորում էին լուծել հակամարտությունը՝ ստորագրելով համաձայնագիրը, որով նաև հետաձգվում էր ԼՂ-ի կարգավիճակի շուրջ վերջնական որոշումը, բայց Ալիևը հրաժարվեց»: «Դա այն ժամանակն էր, երբ Ադրբեջանը հարստանում էր նավթի հաշվին ու խոսում ռազմական բյուջեի չափի մասին»: Ալիևն ու Էրդողանը կրկին` ԼՂ խնդիրն են քննարկում Թուրքիայի նախագահ Ռեջեփ Թայիփ Էրդողանը երեկ աշխատանքային այցով ժամանել է Ադրբեջան: Ավելի վաղ, Թուրքիայի նախագահի վարչակազմի ներկայացուցիչը տեղեկացրել էր, որ Էրդողանը Գլոբալ ֆորումին մասնակցելու համար ապրիլի 26-ին կժամանի Ադրբեջան: Երեկ Բաքվում Ալիևն ու Էրդողանը գոհունակություն են հայտնել բարեկամական և եղբայրական հարաբերությունների հաջող զարգացման առթիվ, որոնք հենվում են երկու երկրների միջև բոլոր ոլորտներում ռազմավարական գործընկերության վրա: Վստահություն է արտահայտվել այն բանում, որ կապերը էլ ավելի կզարգանան: Նրանք նաև մտքեր են փոխանակել տարածաշրջանային խնդիրների և Լեռնային Ղարաբաղի հակամարտությանը առնչվող մի շարք հարցերի վերաբերյալ։ Թամար Բագրատունի