Շոյգուի հայաստանյան այցի գլխավոր «մեսիջի» ահազանգը

Օրերս Հայաստան ժամանած Ռուսաստանի պաշտպանության նախարար Սերգեյ Շոյգուն՝ Նիկոլ Փաշինյանի հետ հանդիպմանն արձանագրեց, որ Գյումրիում տեղակայված ռուսական 102-րդ ռազմակայանը մարտունակ է և պատրաստ է Հայաստանի Զինված ուժերի հետ համատեղ դիմակայել ծագող մարտահրավերներին ու սպառնալիքներին:

«Մեր ռազմական գերատեսչությունների փոխգործակցության մակարդակը թույլ է տալիս օպերատիվ լուծում տալ ընթացիկ խնդիրներին և ժամանակին արձագանքել տարածաշրջանում տեղի ունեցող փոփոխություններին», նշել էր Ռուսաստանի պաշտպանության նախարարը:

Ռուսաստանի ռազմական գերատեսչության ղեկավարի հայաստանյան այցն նշանավորվեց նրանով, որ Հայաստանում տեղի ունեցած քննարկումներից հետո Երևանում Պաշտպանության նախարար Դավիթ Տոնոյանի հետ բանակցությունների արդյունքում հայտնի դարձավ, որ Կրեմլը կրկնապատկում է Հայաստանում տեղակայված ռուսական ռազմաբազայի ներուժը՝ արդիականացնելով սպառազինությունը, իսկ Հայաստանի ու Ռուսաստանի պաշտպանության նախարարությունների միջև ստորագրվեց համագործակցության 2020 թվականի ծրագիրը, որը ներառում է երկկողմ համագործակցության լայն շրջանակ:

Երևանից Շոյգուն հոկտեմբերի 30-ին մեկնել է Ադրբեջանի մայրաքաղաք՝ մասնակցելու ԱՊՀ պաշտպանության նախարարների խորհրդի նիստին։
Պարզ է, որ Ռուսաստանի պաշտպանության նախարարը հենց այնպես այցելություններ չի կատարում, այդ այցը որոշակի «մեսիջ» է տարածաշրջանային ուժերին, մասնավորապես Թուրքիային և Ադրբեջանին, որ Հարավային Կովկասում շարունակում է տերը մնալ Ռուսաստանը։

Այն, որ Կրեմլը կրկնապատկում է Հայաստանում տեղակայված ռուսական ռազմաբազայի ներուժը՝ նշանակում է, որ Մոսկվան նոր թափով է սկսում Հարավային Կովկասում ազդեցության և ուժի ցուցադրումը թե՛ Արևմուտքին, թե՛ Հայաստանի սահմանակից Թուրքիային ու Ադրբեջանին:

Ինչն էլ իր հերթին նշանակում է, որ Մոսկվայում որոշակի անհանգստություններ ունեն, որ իրավիճակն, ինչ-որ պահից կարող է դուրս գալ վերահսկողությունից:
Հայաստանի ռուսական ռազմաբազան կայունության երաշխավորն է Կովկասյան տարածաշրջանում, սա հիմնական ուղերձն է, որ Մոսկվան նորից շեշտեց: Մոսկվան ցույց է տալիս, որ Հարավային Կովկասում անվտանգության երաշխավորն ինքն է:

Թամար Բագրատունի