«Ջրել» չհաջողվեց

Ազգային ժողովը երեկ երրորդ ընթերցմամբ ու վերջնական չկարողացավ անցկացնել Հրազդանի ցեմենտի գործարանին հարկային արտոնություն տալու նախագիծը:Նախագիծն արժանացավ պատգամավորների խիստ քննադատություններին, նրանք պնդեցին, որ ստեղծվել է մի իրավիճակ, որ ով ցանկանում է, գալիս է, երկիրը թալանում ու արագ հեռանում է երկրից: Քվեարկությունը 20 րոպե հետաձգվեց, որից հետո որոշում ընդունվեց` խորհրդարանը դեմ քվեարկեց նախագծին: Այս որոշմամբ մոտ 500 մլն դրամի արտոնություն պետք է տրվեր գործարանին, որը գոյացել է չվճարված հարկերի տույժերից ու սոցվճարներից: Նախագծին կողմ քվեարկեց ընդամենը 53 պատգամավոր, մեկ դեմ, 48 պատգամավոր էլ չմասնակցեց քվեարկությանը: Հիշեցնենք, որ գործարանը նախկինում պատկանում էր հայտնի գործարար Միկա Բաղդասարովին, սակայն Արմավիայի սննկացմանը զուգահեռ սննկացան նաեւ գործարարին պատկանող մի շարք կազմակերպություններ, այդ թվում «Հրազդան ցեմենտը»։ Նախագծի վերաբերյալ բոլոր շահագրգիռ գերատեսչությունները դրական եզրակացություն են ներկայացրել, բացի մեկից` ՀՀ ֆինանսների նախարարությունից, որի հիմնավորումն այն է, որ հարկային պարտականությունները չկատարած տնտեսվարողին տուգանքներից ազատելով, կառավարությունը կխրախուսի անպարտաճանաչ հարկատուներին: Հրազդանի ցեմենտի գործարանը իրոք կանգնած է լուրջ ֆինանսական խնդիրների առաջ: Նրա հաշիվները արգելափակված են, ընդհանուր պարտքը կազմում է մոտ մեկ միլիարդ դրամ, գույքը գրավադրված է «ՎՏԲ Հայաստան» բանկում, կառավարության անդամներն ասում են, որ եթե այդ գոյացած պարտքերը չզրոյացվեն, գործարանը չի կարող վաճառվել, չի կարող աշխատել, կփակվեն աշխատատեղեր: Հրանտ Բագրատյանը հայտարարեց, որ այդ տույժերը պետք է վճարի Միքայել Բաղդասարովը: «Գործարանը կարող է վաճառվել՝ տույժերը չվճարելով, դա խայտառակություն է, որ մեզ ներկայացնում են, սուտ: Միքայել Բաղդասարովը ձրի սեփականաշնորհեց Խնայբանկը, երկու տարի հետո այդ Խնայբանկը ծախում է ՎՏԲ-ին, դեռ միաժամանակ մնում է այստեղի ՎՏԲ-ի պրեզիդենտ, ինքը իրան վարկ ա տալիս, հետ չի վճարում այդ վարկը եւ դուք հիմա պարտակո՞ւմ եք այս հանցագործությունը»։Տիգրան Ուրիխայանն էլ նկատեց, որ որ ապրիլյան քառօրյա պատերազմից հետո տպավորություն ուներ, որ պայմանավորվել են գողացողի ձեռքը չկտրել, բայց նրան բռնել ու դատել: «Արտոնություն ենք տալիս հանցագործին՝ խուսանավելու իր արածից և ՎՏԲ-ի ադրբեջանական սեփականատիրոջը՝ եկամուտներ ստանալու»։ՕԵԿ խմբակցության ղեկավար Հեղինե Բիշարյանն էլ առաջարկեց հարկային արտոնություն տալ ու տույժերից ազատել նաև ՀՀ բոլոր քաղաքացիներին, բոլոր նրանց, ում ունեցվածքը հարկերի ու տուրքերի տակ է, ԴԱՀԿ-ը կալանքներ է դրել գույքի վրա:Նա վստահեցրեց, որ գործարանը այսօր էլ աշխատում է, արտադրում է այնքան, որքան պատվեր է ստանում.«Այս գործարանն այսօր աշխատող է, շահույթ է  հետապնդում, գտնվում է շատ լավ վիճակում: Մենք սովոր ենք, ունենք մի ձեռագիր, բոլոր թալանչիներին առոք-փառոք երկրից հանում ենք: Ոչ միայն պետք է այդ մարդկանց ձերբակալել, այլ հետևություն անել: Այս պահին բազմաթիվ փոքր բիզնեսներ փակվում են հարկերի ու տուրքերի, ԴԱՀԿ ազդեցության պատճառով: Ես հորդորում եմ, որ այսօր ԴԱՀԿ-ը մեր քաղաքացիների վրա դրված տույժերը, որոնց պատճառով մարդիկ զրկվում են տներից ու ունեցվածքից, չեղյալ անի, որովհետև, երբ որ մենք մի օլիգարխի հանդեպ զիջումների ենք գնում, պարտավոր ենք աջակցել մեր հայրենակիցներին, ովքեր լքում են հայրենիքը, և մենք կանգնած ենք մեծ արտագաղթի առաջ»,- առաջարկեց Բիշարյանը: Այսպիսով՝հակառակ կառավարության ջանքերի, հնարավոր չեղավ «ջրել» պարտքերը եւ այն, ըստ ամենայնի, կմնա նոր սեփականատիրոջ վրա։