Հարազատից էլ հարազատ` հոգևոր եղբայրները

Հոկտեմբերի 27-ի ոճրագործ Նաիրի Հունանյանի հարազատ եղբորից էլ հարազատ, հոգևոր եղբայր Արման Բաբաջանյանը, լրատվամիջոցից լրատվամիջոց է վազում` պատմելու իր` Նաիրի Հունանյանի հետ ունեցած դարակազմիկ, պատմական հանդիպման մասին:

Բաբաջանյանը շտապել է հայտարարել, թե ոճրագործը դեռ անելիք և ասելիք ունի, շատ ու շատերից էլ ադեկվատ ու կուռ տրամաբանող մի անձնավորություն է: Եվ ահա սույն ոճրագործապաշտը իրեն թույլ է տվել համեմատություն անցկացնել Սահմանադրական դատարանի նախագահ Հրայր Թովմասյանի այժմյան գործունեության և Նաիրի Հունանյանի` հոկտեմբերի 27-ի ոճիրի միջև` դրանք դնելով նույն հարթության վրա. «այն, ինչ Նաիրի Հունանյանը նպատակադրվել էր Հոկտեմբերի 27-ին իբրև փրկիչ, իբրև առաքյալ կատարել՝ այդ ոճրագործությամբ փրկել, ազատել հայ ժողովրդին արնախումներից, այդպիսի մի առաքելություն էլ իր վրա վերցրել է Հրայր Թովմասյանն ու նրա աջակիցները՝ խրամատներում հաստատված իրենց դիրքերում։ Եվ կարծում եմ՝ ոչ մի տարբերություն չկա Նաիրի Հունանյանի և Հրայր Թովմասյանի գլխավորությամբ այն մարդկանց միջև, որոնք որոշել են ՍԴ-ն պաշտպանել ժողովրդից, ժողովրդի իշխանությունից, ԱԺ-ից, ժողովրդի իրական իշխանության վստահորդներից»,- factor.am-ի հետ զրույցում հայտարարել է Արման Բաբաջանյանը:
Լրագրողի ճշտող հարցին` Դուք նույն գծի վրա՞ եք դնում Հրայր Թովմասյանին ու Նաիրի Հունանյանին, Բաբաջանյանը պատասխանել է. «Պիտի ասեմ, որ Հրայր Թովմասյանն իրականում այն անձը չէ, որին ես դիտարկեմ որպես կարևոր դերակատար։ Նա զինվոր է։ Իրական պատվիրատուն ՀՀԿ-ն ու Սերժ Սարգսյանն են։ Եվ Սերժ Սարգսյանի պատվերով են իշխանությունը յուրացնելու գործողությունների դիմել Հրայր Թովմասյանն ու նրան աջակցող Արա Բաբլոյանն ու մյուսները։ Հետևաբար՝ ես կարծում եմ, որ առաջին պատասխանատուն Սերժ Սարգսյանն է»։

Բանակից թռած, հարազատ մոր դեմ ոստիկանությունում ցուցմունք տված (ԶԼՄ-ներում այս մասին քանիցս հրապարակվել է) անհասկանալի այս արարածին ասենք, որ Նաիրի Հունանյանի գործողությունները արժեքային իմաստով կարող են համեմատվել միայն իր գործողությունների հետ: Արման Բաբջանյանը միակ արժանի մարդն է, ում անունն ու պատկերը պետք է զետեղել Նաիրի Հունանյանի անվան և պատկերի կողքը և գրել` դուք իրար արժանի եք: Սա, երևի ողջ կյանքում սրա-նրա պատվերները կատարելով է ապրել: Սրա նմանի հասկացողությանը հասու չէ, որ մարդը կարող է սկզբունքներ և արժեքներ, պատասխանատվություն և արժանապատվություն ունենալ ու գործել սեփական խղճի և համոզմունքների շրջանակում:

 Ի դեպ, Ֆակտոր.ամ-ի հարցազրույցը նախապես հրապարակվել էր. «Ոչ մի տարբերություն չկա Նաիրի Հունանյանի և Հրայր Թովմասյանի միջև․ Արման Բաբաջանյան» վերնագրով, որն ավելի ուշ փոխվել է, սակայն համացանցի որոնողական համակարգում պահվել է նախկին վերնագիրը: Սա իմիջիայլոց:

Մարդ պետք է զուրկ լինի պետականության զգացումից և բարոյական տարրական նորմերից, որ իր երկրի ամենաբարձր դատական ատյանի` Սահմանադրական դատարանի նախագահին նույն հարթության մեջ դնի պետականությունը գլխատած ոճրագործի հետ: Սա որևէ կապ չունի Հրայր Թովմասյանի անձի հետ, ոչ մի կապ չունի, թե ով ինչ վերաբերմունք ունի, ինչքան է ատում կամ սիրում Հրայր Թովմասյանին: Խոսքը պետական կարևորագույն ինստիտուտի մասին է, տվյալ պարագայում ՍԴ նախագահը, անկախ անձից, խորհրդանշում է այդ ինստիտուը: Եվ եթե նման բառապաշարով խոսում է ԱԺ պատգամավորը, նշանակում է մենք խորհդրդարան ենք տարել հակապետական տարրի, ով գործում է ընդդեմ պետության:

Հայկ  Դավթյան