Ռուս-թուրքական զորքերը մտան Սիրիայի հյուսիս. «Փոխշահավետ գործարքի» գինը

Նախագահներ Վլադիմիր Պուտինի և Ռեջեփ Էրդողանի՝ Սոչիում կայացած բանակցություններից, պլանի համաձայնեցումից անմիջապես հետո ռուսական և թուրքական զորամիավորումները շտապեցին զբաղեցնել յուրաքանչյուրին հասնող քաղաքների և տարածքների վերահսկողությունը:

Ռուսական ուժերը, զրահամեքենաները, ռազմական այլ մեքենաները, որոնցից շատերի վրա նաև Ռուսաստանի դրոշներն էին ամրացված, մտան Սիրիայի հյուսիսում գտնվող առանցքային նշանակություն ունեցող բնակավայրերը՝ Քոբանի, Մանբիջ քաղաքները:
Թուրքական ուժերը երեկվանից սկսեցին պարեկություն իրականացնել սիրիական Թել Աբյադ քաղաքում: Ըստ ռուս-թուրքական համաձայնության՝ քրդական ուժերը պետք է հեռանան Սիրիայի հյուսիսարևելյան շրջաններից: Ռուսները քրդերին զգուշացրել են, որ եթե նրանք չկատարեն այդ պայմանները, նորից թուրքական բանակի հետ բախումների մեջ կընկնեն:

Ռուսական ուժերի զբաղեցրած քաղաքներում նախկինում տեղակայված էին ամերիկյան զորքերը: Նրանք հիմա հեռանում են դեպի Իրաք: Իրաքի բարձրագույն հրամանատարությունն ասել է, որ ամերիկյան զորքերին ժամանակավորապես է ընդունում՝ պայմանով, որ նրանք հետո պետք է հեռանան Իրաքից: ԱՄՆ պաշտպանության նախարարը երեկ Բաղդադում էր՝ քննարկելու այդ հարցերը:

Քրդական ուժերը Միացյալ Նահանգների դաշնակիցներն էին «Իսլամական պետության» ահաբեկչական խմբավորումների դեմ պայքարում: Սակայն Դոնալդ Թրամփը որոշեց ամերիկյան զորքերը դուրս բերել Սիրիայից, և քրդական ուժերը մենակ մնացին Սիրիա ներխուժած թուրքական բանակի դեմ: Շուրջ տասնօրյա բախումներին հաջորդեցին թուրք-ամերիկյան, ռուս-թուրքական բանակցություններ, որոնց արդյունքում հրադադար հաստատվեց և որոշվեց, որ քրդական ուժերը պետք է հեռանան Սիրիայի հյուսիսարևելյան շրջաններից՝ այդ տարածքների վերահսկողությունը հանձնելով թուրքերին և ռուսներին:

Այսպես, ռուսական զինվորական մեքենաները, որոնց մի քանիսի վրա ամրացված էր Ռուսաստանի դրոշը, մտան սիրիական Քոբանի քաղաք, որտեղ նախկինում տեղակայված էր ամերիկյան զորախումբը։

Ռուսները քրդական ուժերին զգուշացրել են, որ Թուրքիայի հետ կրկին բախումների մեջ կընկնեն, եթե չկատարեն ռուս-թուրքական համաձայնության պահանջները և չհեռանան այդ տարածքներից: Ստացվում է, որ ռուսները զբաղեցրեցին ամերիկյան ուժերի տեղը:
Գործարքը, առավել քան պարզ է: Դրա արդյունքում մեծացավ տարածաշրջանում Ռուսաստանի ազդեցությունը, որից գոհ է Անկարան: Այսինքն, համատեղ փոխշահավետ ռուս-թուրքական գործարք:

Ուշագրավն այն է, որ Սոչիում կայացած բանակցություններում չէր քննարկվել Սիրիայի հյուսիս-արևելքում թուրքական «անվտանգության գոտում» թուրքական զորքերի մնալու ժամկետը: Համենայն դեպս, Ռուսաստանի պաշտպանության նախարար Սերգեյ Շոյգուն բանակցություններից հետո լրագրողների հարցերին պատասխանելով ասել է, որ չի քննարկվել:

Պաշտոնական Մոսկվան համարում է, որ այդ բանակցությունների շնորհիվ հնարավոր կլինի խուսափել նոր կործանիչ պատերազմական գործողություններից: Ռուսաստանի արտգործնախարար Սերգեյ Լավրովը, մասնավորապես բանակցություններից հետո ասել էր, թե Պուտինի և Էրդողանի միջև ձեռք բերված պայմանավորվածությունները, ըստ էության, ապահովում են Սիրիայում թուրքական գործողությունների դադարեցումը: Լավրովը նաև կարևորել է այն, որ սիրիական սահմանապահները կսկսեն վերահսկել սահմանը:

Մետաքսյա Շալունց