Պուտինն ու Էրդողանը կրկին հանդիպում են՝ Թրամփի իմփիչմենթի ֆոնին

Այսօր Սոչիում սիրիական ճգնաժամն են քննարկում Ռուսաստանի և Թուրքիայի նախագահներ Վլադիմիր Պուտինը ու Ռեջեփ Էրդողանը: Թուրքիայի նախագահը Սոչի է ժամանել մեկօրյա աշխատանքային այցով: Այցի որոշ մանրամասներ երեկ հայտնեց Պուտինի օգնական Յուրի Ուշակովը: Նրա խոսքով՝ Սիրիայից բացի, Ռուսաստանի և Թուրքիայի նախագահները քննարկելու են նաև երկկողմ հարաբերությունները:

Հնարավոր է՝ Պուտինն ու Էրդողանը նաև առանձնազրույց ունենան, ասել է Ուշակովը՝ հավելելով, թե նախատեսված են բանակցություններ ոչ շատ մեծ կազմով, որոնց հետևելու է աշխատանքային ճաշը:

Ռուսաստանի նախագահի օգնականն ընդգծել է, որ ռուս-թուրքական հարաբերությունները լավ են զարգանում, երկու երկրների միջև ապրանքաշրջանառությունն աճում է: Հիմնականը այսօրվա բանակցություններում, իհարկե, սիրիական ճգնաժամն է:

Պաշտոնական Անկարան չի բացառում, որ թուրքական բանակի հարձակումը Սիրիայի հյուսիսում կարող է շարունակվել արդեն առաջիկա օրերին: «Այժմ Սիրիայի հյուսիսում 120 ժամ տևողությամբ հրադադար է հաստատվել: Այդ հրադադարի զգալի հատվածն արդեն անցյալում է: Վաղը ես մեկնում եմ Սոչի: Նախագահ Պուտինի հետ մենք կքննարկենք ծավալվող պրոցեսները, ինչից հետո, Աստված տա, կդիմենք անհրաժեշտ քայլերի», - երեկ հայտարարել էր Էրդողանը:

Պաշտոնական Մոսկվան, իր հերթին, այսօր կայանալիք բանակցությունների նախօրեին իր դժգոհությունն է հայտնել Թուրքիայի գործողությունների առնչությամբ: Մասնավորապես, Ռուսաստանի պաշտպանության նախարար Սերգեյ Շոյգուն նախօրեին Պեկինում Սյանշանյան համաժողովում իր ելույթում ասել է, թե Թուրքիայի գործողությունների հետևանքով Սիրիայում արտասահմանցի գրոհայիններով 12 բանտ մնացել են առանց պաշտպանության, ինչը կարող է բերել ահաբեկիչների «հակադարձ գաղթի իրենց պատմական հայրենիք»: Ռուսաստանի ռազմական գերատեսչության ղեկավարը միջազգային հանրությանը կոչ է արել համախմբել ջանքերը՝ ահաբեկիչների մարտահրավերներին, նրանց գաղափարախոսությանը և քարոզչությանը դիմակայելու համար:

Իսկ ավելի վաղ ՌԴ նախագահի մամուլի քարտուղար Դիմիտրի Պեսկովը հայտարարել էր, որ Թուրքիայի գործողությունները Սիրիայում կարող են վնաս հասցնել այդ երկրում քաղաքական կարգավորման գործընթացին, հավելելով, թե Սիրիայի հյուսիս-արևելքում տեղի ունեցող զարգացումները չափազանց անհանգստացնում են Ռուսաստանի ղեկավարությանը: Էրդողանը երեկ հայտարարել է նաև, որ քրդական ուժերի հետ բանակցությունները բացառված են: Մոսկվան էլ, հիշեցնենք, պարբերաբար հայտարարում է, որ պետք է բացառել բախումները Սիրիայի կառավարական բանակի և թուրքական բանակի միջև:

Էրդողանը ճեպազրույցում Սոչի մեկնելուց առաջ անդրադարձել է թեմային, թե որ դեպքում Թուրքիան կվերսկսի ռազմական գործողությունը Սիրիայում: «Եթե Միացյալ Նահանգները չկատարի մեր երկրին տված խոստումը, մենք կշարունակենք օպերացիան՝ ավելի վճռական կերպով»,-ասել է Թուրքիայի նախագահը: Խոսելով խոստումների մասին՝ Էրդողանը նկատի ունի 120 ժամվա ընթացքում քրդական միավորներին Սիրիայի հյուսիս-արևելքից դուրս բերելու Միացյալ Նահանգների հայտարարությունը: Այս հարցի շուրջ Անկարան և Վաշինգտոնը պայմանավորվել են հոկտեմբերի 17-ին: Միևնույն ժամանակ քրդերը քննադատել են Սիրիայում 30 կիլոմետրանոց խորությամբ անվտանգության գոտի ստեղծելու գաղափարը: Էրդողանի խոսքով՝ Թուրքիան ահաբեկիչներից մաքրել է ավելի քան 2000 քառակուսի կիլոմետր տարածք, ոչնչացվել է 775 գրոհային: Նա վստահեցրել է, որ Ռուսաստանի նախագահի հետ համաձայնեցրել է «ահաբեկչության դեմ պայքարի յուրաքանչյուր կետ»:

Ինչևէ, Վաշինգտոնը` երկու ճգնաժամերի արանքում. Մեկը ԱՄՆ նախագահին իմփիչմենթի ենթարկելու գործընթացն է, մյուսը Սիրիան: Սիրիայից ամերիկյան ուժերը դուրս բերելու որոշումը ԱՄՆ-ի նախագահն արդարացնում է, ասելով, թե այդ ուժերն այնտեղ պիտի մնային երեսուն օր, սակայն մնացին տասը տարի: Ինչ վերաբերում է իր դեմ սկսված իմփիչմենթի գործընթացին, Թրամփն ասում է, թե ինքը նախկինում երբեք չէր կարող մտածել, որ այդ բառը կօգտագործվեր իր անվան հետ կապված: «Դա շատ տհաճ բառ է», ասում է Թրամփը:

Իմփիչմենթի ենթարկվելու վտանգի տակ հայտնված նախագահի մասին էլ դեմոկրատ սենատոր Ստեյնի Հոյերն ասում է. «Ես ծառայել եմ հինգ նախագահների օրոք, մեծ թվով հանդիպումներ ունեցել նրանց հետ: Սակայն երբեք չեմ հանդիպել որևէ նախագահի, որն այսքան անհարգալից վերաբերվեր Միացյալ Նահանգների կառավարության հավասարազոր մյուս ճյուղի հետ», հաղորդում է «Ամերիկայի ձայնը»:

Նախագահին անվստահության քվե հայտնելու ուղղությամբ իրականացվող աշխատանքների ընթացքում ավելի է կրճատվում նրան աջակցողների թիվը: Վերլուծաբան Ուիլյամ Գալստոնի խոսքերով, հիմա հանրապետականները պիտի ցուցաբերեն զգուշություն, որպեսզի չստեծվի տպավորություն, թե պաշտպանում են սխալականին: «Ու նրանք, ովքեր շարունակեն պնդել, որ նախագահն անսխալական է, կկորցնեն կապը ժողովրդի հետ», ասում է նա:

Թրամփն ամենասկզբից էր իրեն ներկայացնում որպես քաղաքական խանգարիչ ուժ: Եվ դա ավելի կխորանա իմփիչմենթի գործընթացին զուգահեռ: Այս կարծիքն է հայտնում վերլուծաբան Բարբարա Էնն Փերրին: «Մինչ այժմ նա ռմբակոծել է նախորդ բոլոր 44 վարչակազմերի չափանիշները: Եվ այս հարցում սահմաններ չեն էլ երևում նրա համար», ասում է վերլուծաբանը: Իսկ անկախ այն հանգամանքից, թե ինչպես կավարտվի իմփիչմենթի հարցով սկսված ճակատամարտը, մի բան պարզ է, որ դրանից հետո կուսակցական տարանջատումն ավելի կխորանա: «Դրանից հետո երկրում հակառակ բևեռներն ավելի կհեռանան, կնկատվի ավելի մեծ բաժանվածություն հասարակության շրջանում, այնպես, ինչպես 1999թ. Բիլ Քլինթոնին իմփիչմենթի ենթարկելու փորձերից հետո», ասում է վերլուծաբան Թոմաս Շվարցը ու հիշեցնում 2000թ. ընտրությունները, ժողովրդի խորը մասնատվածության պայմաններում: Կարծես ամեն ինչ հիմա կրկնվում է նույնությամբ, երբ մոտենում են 2020-ի ընտրությունները:

Մետաքսյա Շալունց