Կառավարությունից «ատչոտ» կպահանջեն

Վարչապետ Նիկոլ Փաշինյանի գաղտնի հանձնարարականով նախարարների, փոխնախարարների եւ գլխավոր քարտուղարների աշխատավարձը կրկնապատկելու մասին որոշումը իրար էր խառնել ԱԺ թե իշխանական, թե ընդդիմադիր խմբակցությունների պատգամավորներին։ Հանձնարարականը տրվել է հուլիս ամսին, սակայն հայտնի դարձավ երեկ։ Այսօր պատգամավորները բուռն արձագանքեցին այդ որոշմանը։ «Լուսավոր Հայաստան» խմբակցության ղեկավար Էդմոն Մարուքյանը․ ով դեմ չէ պարգևավճարներին, սակայն այս հարցում ասում ՝ դա պետք է արվի բաց ու թափանցիկ։
Ազգային ժողովը համապատասխան քայլեր կձեռնարկի, որպեսզի բացահայտի գաղտնի ընթացակարգը, որով պետական պաշտոնյաների աշխատավարձեր են բարձրացվել, և այն կներկայացնի հանրությանը․«Չի կարող ժողովրդին պատկանող գումարը գաղտնի ընթացակարգերով ծախսվել, եթե խոսքը չի գնում պաշտպանական և ազգային անվտանգության ծախսերի մասին»։
«Իմ քայլը» խմբակցության ղեկավար Լիլիթ Մակունցը ուղղակի շփոթահար հայտարարեց, որ առաջիկայում գործադիրի հետ կքննարկեն, թե ինչ է տեղի ունեցել, ինչ հանգամանքներում։
«Բարգավաճ Հայաստան» խմբակցության պատգամավոր Գևորգ Պետրոսյանն էլ կարծում է, որ վարչապետը չի կարող միանձնյա որոշում կայացնելով պետական պաշտոնյայի աշխատավարձ բարձրացնել. «Ժողովուրդը պետք է իմանա, թե իր վճարած հարկերի հաշվին կերակրվող պետական պաշտոնյան ինչի համար է աշխատավարձ ստանում: Այն, ինչը պետք է գաղտնի անեն, չեն անում ինչը որ պետք չէ՝ անում են: Նախաքննական մարմինը մեկին կանչում է, ամբողջ հայ ազգը իմանում է: Այսինքն, այն, ինչը գաղտնի է, գաղտնի չեն պահել: Իսկ ինչը հրապարակման ենթակա է, ասում են՝ գաղտնի է: Ես այստեղ գաղտնիություն չեմ տեսնում»:

Նշենք, որ այսօր վարչապետ Նիկոլ Փաշինյանը չմեկնաբանեց այդ որոշումը, իսկ նրա մամուլի խոսնակ Վլադիմիր Կարապետյանը հայտարարել է, որ վաղը՝ կառավարություն-ԱԺ հարցուպատասխանի ժամանակ վարչապետն այդ թեմայով հանդես կգա հայտարարությամբ։
Պատգամավորների մեկնաբանություններից պարզ դարձավ, որ խնդիրը ոչ այնքան աշխատավարձեր բարձրացումն է, նրանք չդատապարտեցին, որ աղքատ երկում մեղմ ասած բարոյական չէ որ հաշվված մարդիկ միլիոնանոց աշխատավարձ ստանան ու առաջնահերթությամբ բարձրանա նրանց աշխատավարձերը, այլ դեմ էին, որ դա արվել է գաղտնի ու պահանջում էին համապատասխան օրենքի նախագիծ ներկայացնել ԱԺ։

Անի Սահակյան