Հաջորդն ո՞վ է հերթում

Սահմանադրական դատարանի նախագահ Հրայր Թովմասյանի հեռացնելու հարցը իշխանության համար կյանքի-մահու խնդիր է դարձել: Ներքաղաքական օրակարգի առանցքը, ըստ ամենայնի, ձեւավորում է մեկ դատավարությունն ու մեկ պաշտոնյայի հեռացումը:

Իշխանական քարոզչամեքենան գործի է անցել, հատում են նույնիսկ անթույլատրելի սահմանը, միայն թե հասնեն իրենց վերջնանպատակին: Հրայր Թովմասյանի դեմ օրենսդրական նախաձեռնություն, դիմում-բողոքը արդյունք չտվեց, նրա սանիկնեի ձերբակալությունը նույնպես, իշխանությունը նույնիսկ վերջին ստորությանը դիմեց՝ ԱԱԾ կանչելով Թովմասյանի դեռատի դուստրերին եւ ծեր ու առողջական խնդիրներ ունեցող հորը: Հիմա հերթը Թովմասյանի մտերիմներինն ու ընկերներինն է:

Ինչպես հայտնի է ԱԺ «անկախ» պատգամավոր Արման Բաբաջանյանի դիմումի համաձայն ՀՀ հատուկ քննչական ծառայությունում հարուցվել է քրեական գործ ՀՀ քրեական օրենսգրքի 300-րդ հոդվածի 1-ին մասով՝ իշխանությունը յուրացնելու դեպքի առթիվ։ Նախաքննություն է ընթանում։ Հիշեցնենք, որ խոսքն այն գործի մասին է, իբր համաձայն որի Թովմասյանը խախտումներով է դարձել ՍԴ անդամ, ապա դատավոր, որ նախ Գագիկ Հարությունյանը ժամանակից շուտ է հրաժարական տվել, Թովմասյանն էլ մանդատից հրաժարվելու դիմում չի գրել մինչեւ ՍԴ անդամ դառնալը:

Եւ, ահա, այս գործի շրջանակներում երեկ ձերբակալել են ԱԺ աշխատակազմի ղեկավարի նախկին տեղակալ Արսեն Բաբայանին: ՀՔԾ-ն հաղորդեց, որ «հարուցված քրեական գործի նախաքննության ընթացքում փաստական տվյալներ են ձեռք բերվել այն մասին, որ պաշտոնատար անձինք ՀՀ սահմանադրական դատարանի նախկին նախագահ Գագիկ Հարությունյանի կողմից լիազորությունները վայր դնելու գործընթացում, խմբային շահերից ելնելով, անձամբ, ինչպես նաև պաշտոնատար անձ չհանդիսացող աշխատակիցների միջոցով կատարել են պաշտոնեական կեղծիքներ»: Եւ այդ կեղծիքը իբր կատարել է ԱԺ աշխատակազմի ղեկավարի տեղակալ Արսեն Բաբայանը։
Այս ձերբակալությունը ծիծաղելի է բոլոր դրվագներով: Մամուլի տեղեկություններով՝ Արսեն Բաբայանի ձեբակալությունը հնարավոր է դարձել ԱԺ աշխատակազմի աշխատակիցներից մեկի մեկ ցուցմունքի հիման վրա, մի կնոջ, ով չդիմանալով ճնշումներին ցուցմունք է տվել, որ ինչ որ գործողություն է կատարել Արսեն Բաբայանի բանավոր ցուցումի հիման վրա։
Բաբայանը շարքային աշխատակից է եւ նրանից բարձր մի շարք այլ պաշտոնյաներ կային։
Իրավապաշտպան Ռուբեն Մելիքյանի մեկնաբանությամբ` Բաբայանին վերագրվող հանցագործության նկարագրության՝ իրավաբանական բառակույտի հետևում «անզեն աչքը» չի նկատի մի կարևոր հանգամանք. նրան ձերբակալել են այնպիսի հանցակազմով (ՀՀ քրօր 314 հոդված), որով անձը ոչ մի պարագայում չի կարող ազատազրկման ենթարկվել։ Անգամ եթե դատապարտվի դատարանի կողմից։ <<Ինչու՞: Որովհետև բոլոր դեպքերում գործելու է 2018թ. համաներման ակտը։
Իսկ այս պարագայում անձը կարո՞ղ է իրավաչափորեն ձերբակալվել։ Իհարկե՝ ոչ։ Ու այս պայմաններում կարո՞ղ է ողջամիտ կասկած մնալ, որ ձերբակալման բուն նպատակը Հրայր Թովմասյանի նկատմամբ ճնշման «դոզան» ավելացնելն ու նրա դեմ ցուցմունք կորզելն է>>։

Հրայր Թովմասյանի հողի վրա արդեն շիզոֆրենիայի կոլեկտիվ բռնկման հետ գործ ունենք: Նույն օրը առավոտյան վարչապետի խոսնակը հայտարարեց, թե իբր Գագիկ Հարությունյանին պարտադրել են գրել հրաժարական, երեկոյան ՀՔԾ պետը ձերբակալության հրաման տվեց: Հայաստանը այլեւս 37 թիվն է հիշեցնում, որ որ պահին ուզում են ցանկացածի վերաբերյալ դանոս են կազմում ու ձերբակալության սանկցիա տալիս: Իսկ սա նշանակում է, որ Հրայր Թովմասյանի հեռացումը ոչ այնքան անձնավորված է, որքան համակարգային, եւ որ իշխանությանն օր առաջ հարկավոր է սեփական ՍԴ-ն ձեւավորել եւ իրականություն դարձնել Սորոսի հետ իր մութ գործարքները:

Անի Սահակյան