ԱԱԾ-ն Թովմասյաններով է զբաղվում, ադրբեջանական հաքերները` Նիկոլ Փաշինյանի պաշտոնական կայքով
Մինչ հայրենի ԱԱԾ-ն զբաղված էր ՍԴ նախագահ Հրայր Թովմասյանի ընտանիքին` հորն ու երկու դուստրերին, հարցաքննելու պետական և կառավարման անվտանգության տեսանկյունից կարևորագույն գործով` ադրբեջանցի հաքերները կոտրել են ՀՀ վարչապետի պաշտոնական կայքը և այնտեղ տեղադրել Իլհամ Ալիևի ելույթը։
Ելույթում Ալիևն ասում է, որ Արցախն Ադրբեջանի մաս է: Տեսանյութը ՀՀ վարչապետի կայքում մնացել է ավելի քան 2 ժամ: Նման դեպք, ի դեպ, վերջին տարիներին չէր եղել:
Այսինքն` 2 ժամ շարունակ մեր թիվ մեկ պաշտոնական կայքը հակառակորդի տրամադրության տակ է եղել` դրանից բխող բոլոր հնարավոր հետևանքներով: Փորձեք պատկերացնել, թե այդ ընթացքում ինչ հայտարարություններ կարող էր տարածվել և ինչ ներքին խուճապ կարող էր մտցվել հայ հասարակության մեջ:
Ինչպես հայտնի է, պետական կայքերի անվտանգությունն ապահովում է ԱԱԾ-ն: Փաստորեն իր այդ անմիջական գործառույթի իրականացման փոխարեն` մեր փառապանծ հատուկ ծառայությունները գերզբաղված են Հրայր Թովմասյանի ընտանիքին հարցաքննելով, ռեսուրսներ են ծախսում Թովմասյանի հայրական տան տանիքում չափումներ և նյութագիտական հետազոտություններ կատարալու նպատակով: Ավելի ուշ ԱԱԾ-ն հաստատեց, որ տանիքը դիտարկվում է որպես ենթադրյալ հանցանքի վայր: Պարզվեց նաև, որ Փաշինյանը անձնական վրեժ է լուծում Թովմասյանից, որովհետև բանտում եղած ժամանակ հավելյալ հանգստի օրեր չի ստացել բանտի ղեկավարությունից: Կատարվածն առնվազն նշանակում է, որ սովորական քաղաքացիները ևս հաստատապես հայտնվել են թիրախում և առաջիկայում կարող են կոտրվել քաղաքացիների էլփոստերը, էջերն ու պրոֆիլները: ԱԱԾ-ն պետք է զբաղվի այս հարցով: Ի դեպ, Ադրբեջանի գալիք տարվա պետբյուջեի նախագծով պաշտպանական և անվտանգության ոլորտի ծախսերը նախատեսված է 20%-ով ավելացնել: Հետևանքների նախնական գնահատական է պետք կազմել, և սա ԱԱԾ-ի գործն է:
ԱԱԾ-ն պետք է նաև մտահոգվի տարածաշրջանային հարցերով` թե արդյոք հարևան Սիրիայից առանձին գրոհայիններ չեն ներխուժում Հայաստան: Հարևան երկրի մամուլում գրվել էր, որ քուրդ ահաբեկիչ-գրոհայինները Սիրիայի քաղաքացու անձնագրերով հայտնվում են Հայաստանում և այստեղ բուժծառայություններ անցնում: ԱԱԾ-ն պարտավոր է այս թեմայի հետ կապված լուրջ ուսումնասիրություն կատարել: Բայց մարդիկ այս գործերի համար, ինչպես հասկանում ենք, ժամանակ չունեն: Հիմնական ռեսուրսները կենտրոնացրել են Հրայր Թովմասյանից սպասվող դիմակայությունը չեզոքացնելու ուղղությամբ:
Հայկ Դավթյան
Հետևեք մեզ Viber-ում
