Տեռոր եւ անարխիա Թովմասյանների ընտանիքի նկատմամբ

Հրայր Թովմասյանին պաշտոնանկ անելու պայքարում իշխանություններն անցնում են թույլատրելիի սահմանը։ Նախ մերժվեց ԱԺ Իմ Քայլի դիմումը, ակնհայտ է, որ պատգամավոր Արման Բաբաջանյանի դիմումի հիման վրա հարուցված քրեական գործն էլ կկարճվի, քանի որ իրավաբաններն արդեն մանրամասնել են, թե որքան հիմնազուրկ ու իրավական հիմքերից զուրկ գործ է։ Իշխանություններին այլ բան չի մնում, քան ներխուժել անթույլատրելի՝ անձնական տարածք։ Սկզբում գրոհ սկսվեց Թովմասյանի սանիկների դեմ, կան ձերբակալվածներ, ընդ որում՝ առողջական լուրջ խնդիրներով, բայց հոգեբանական այս ճնշում էլ իշխանություններին ցանկալի արդյունք չտվեց։ Թվում էր, թե այսքանով իշխանությունը կդադարեցնի պետական մակարդակով արշավը Թովմասյանի դեմ, բայց այսօր հայտնի դարձավ, որ անցել են ընտանիքի անդամներին։ ԱԱԾ-ից զանգահարել եւ իրենց մոտ են հրավիրել Հրայր Թովմասյանի երկու դուստրերին եւ 75-ամյա հորը, որն առողջական լուրջ խնդիրներ ունի ու կարելի է պատկերացնել, թե վայրագ տրամադրվածությամբ իրավապահների հետ շփումից հետո հոգեբանական ինչպիսի սթրեսի կարող են ենթարկվել առողջական լուրջ խնդիրներ ունեցող հայրը եւ դեռահաս աղջիկները։
Այլեւս կարող ենք փաստել, որ իշխանությունը անարխիայի ճանապարհով է գնում եւ տեռոր է սկսել Թովմասյանների ընտանիքի դեմ։ Այլեւս պետք է արձանագրել, որ Հայաստանում փակված է խնդիրներն իրավական ուղով լուծելու ճանապարհը, որ հեղափոխական իշխանությունը խախտել է բոլոր սահմանագծերը, գերազանցել անգամ նախորդներին, որոնց ժամանակ կար չգրված օրենք՝ անկախ քաղաքական շահերից ու ամբիցիաներից, ընտանիք մտնել չի կարելի
Նիկոլ Փաշինյանն ու նրա հրահանգը կատարողները խախտեցին այդ կանոնը, հատեցին այդ կարմիր գիծը, ինչը չէին անում նախկինները։ Հենց այս պատճառով հեռացավ Արթուր Վանեցյանը, ում հրահանգում էին գիշերով «մասկի շոուներ» անել, ներխուժել ընտանիքներ, ահաբեկել մարդկանց, կյանքի գնով հասնել ուզածին։ Իշխանությանը զոռբայությամբ տիրացած, զավթած Նիկոլ Փաշինյանի համար այդ ճանապարհը դառնում է ձեռագիր, Հայաստանն այլեւս ոչ իրավական եւ ոչ էլ ժողովրդավարական պետություն է, սա մի պետություն է, որտեղ ղեկավարի մակարդակով որդեգրվել է բերիական մեթոդները եւ դրանց կիրառմամբ է ուզում հասնել իր ուզածին։ Սթափվեք պարոնայք, քանի ուշ չէ։ Եթե ձեզ համակել է նախկինների բարդույթը, թե դուք հավերժ եք ու վաղը պատասխան չեք տալու ձեր արածի համար, ապա չարաչար սխալվում եք, ի վերջո, ինքներդ եք համոզվել, որ որեւէ իշխանություն հավերժ չէ եւ վաղը ձեր սրած բիզը ձեզ կարող է ցավեցնել։

Անի Սահակյան