Թափթփուկային տեռոր Հրայր Թովմասյանի ընտանիքի դեմ

Նիկոլ Փաշինյանը որոշել է անցնել բոլոր բարոյական նորմերը` գրված ու չգրված օրենքների, մարդկային և տղամարդկային կանոնների վրայով:

Պետական ռեպրեսիվ մեքենան ողջ թափով աշխատում է Սահմանադրական դատարանի նախագահ Հրայր Թովմասյանի դեմ, ու այդ շրջանակում Փաշինյանն արդեն հատեց կարմիր գիծը` գնալով ընտանիքի վրա: ԱԱԾ են հրավիրվել Թովմասյանի դուստրերը և 75-ամյա, առողջական խնդիրներ ունեցող հայրը: Ընդ որում, որևէ բացատրություն, թե ինչու են կանչվել, որ գործի շրջանակում և ինչ կարգավիճակով, հայտնի չէ:
Նման էժանագին քայլերի դիմելու միակ պատճառը, նպատակն ու շարժառիթը Հրայր Թովմասյանին Սահմանադրական դատարանի նախագահի պաշտոնից զրկելն է:
Փաշինյանը թերևս հասկացել է, որ իրավական ճանապարհով Թովմասյանի պաշտոնանկությանը հասնելը իր ու իր անճարակ իրավաբանների ուժերից վեր է, անցել ակնհայտ ռեպրեսիաների: Սա պետական մակարդակով մարդու ընտանիքի դեմ կատարվող ակնհայտ տեռոր է, որից 37 թվի հոտ է գալիս: 
Միայն իշխանության բոլոր կետերը գրավելու մոլուցքից տարված, անհեռատես «ֆաշիստը» կարող էր իրեն թույլ տալ ԱԱԾ տանել երիտասարդ աղջիկներին և ծեր մարդուն, ովքեր որևէ առնչություն չունեն այս ողջ գործընթացի հետ: Սա թափթփուկին բնորոշ կեցվածք է: Այլ բան Նիկոլից թերևս չէր էլ կարելի սպասել: Բայց նա կրկին և վերստին սխալ հաշվարկ է արել` չհասկանալով, որ սա իր պատկերացրած դեպքը չէ: Դիմացինին սեփական արշինով չափելու խաբկանքը թավշյա տեռորի նշան է, բայց ոչ երբեք տրամաբանված քաղաքական կամ իրավական գործընթացի:
Ի դեպ, Փաշինյանն ինքը երեք դուստր ունի. որևէ իշխանություն հավերժ չէ, իսկ կյանքը բումերանգ է: Սա ի միջի այլոց:
Եթե նիկոլական Հայաստանում երկրի ամենաբարձր դատարանի նախագահի ընտանիքը պաշտպանված չէ պետական տեռորից ու ռեպրեսիայից, եթե ՍԴ նախագահի ընտանիքն է այսպիսի հալածանքի ենթարկվում` միայն այն բանի համար, որ ՍԴ-ն չի կայացրել նիկոլահաճո որոշում և հանդգնել է չդառնալ գործադիր իշխանության կամակատարը, փորձեք պատկերացնել, թե ինչ վիճակում կհայտնվի շարքային քաղաքացին, միջին վիճակագրական պաշտոնյան` իշխանության դեմ դուրս գալու հանդգնություն ցույց տալու դեպքում: Հրայր Թովմասյանի ողջ ընտանիքը, մերձավոր շրջապատը նշանառության տակ է` սանիկներից սկսած, դուստրերով, հորով և քրոջով վերջացրած: Դժվար չէ հասկանալ, թե ինչ վիճակում կհայտնվի սովորական մարդը: Նրան հյուր կգար ԱԱԾ-ն, ՀՔԾ-ն, անկախ պատգամավոր Արման Բաբաջանյանը բողոք կգրեր և այսպես շարունակ:
Ահա այն ամենը, ինչ պետք է իմանալ Նիկոլ Փաշինյանի հեղափոխության և Նիկոլի թվի դեմոկրատիայի մասին:

 Հայկ  Դավթյան