Սկզբում սպանում են, հետո ցավում, հետո ներում․ ցինիզմն էլ սահմաններ ունի

Ոստիկանի սպանության լուրը երկու օր է ցնցել է հասարակությանը։ Իր ծառայողական պարտականությունները կատարելիս, գիշերային հերթապահություն իրականացնելու ժամանակ մահացած ոստիկանն ու իր գործընկերը հետապնդել են հանցանքի մեջ կասկածվող երկու երիտասարդի, սակայն նրանցից մեկին հաջողվել է ոստիկանի զենքը խլել եւ կատարել ոճիրը։ Անշուշտ, այս միջադեպը շատ հարցեր է ծնում՝ գլխավորապես՝ ինչպես է հաջողացրել 16-ամյա անչափահասը տիրանալ զենքին ու կատարել նման հանցագործություն, սակայն փաստն այն է, որ կատարվել է ողբերգություն եւ ծառայողական պարտքը կատարելու ժամանակ ոստիկանը կյանքով է հատուցել։
Երեկվանից ցավ ու ափսոսանք է հնչում կատարվածի առթիվ, երբեմն՝ անկեղծ, երբեմն՝ հերթապահ, բայց մի քանի հայտարարություն, պարզապես, անամոթության գագաթնակետն էին, բարձրագույն ցինիզմ։ Խոսքը բնականաբար Սասնա ծռեր խմբավորման պարագլուխ Վարուժան Ավետիսյանի ցնցման մասին է ․«Ցնցված եմ ոստիկանների նկատմամբ այդ դաժան գործողությունից » երեկ հայտարարեց նա շարունակելով․«Դատապարտում եմ անշուշտ և շատ խիստ եմ դատապարտում։ Այդպիսի անկառավարելի վիճակ ստեղծելու համար մեղադրում եմ այսօրվա գործող իշխանություններին, որոնք բավարար արդյունավետ քայլեր չեն կատարում»։ Պատկերացնում եք Հայաստանում ամենաթողությունն այնքան բարձր աստիճանի վրա է, որ այսպիսի հայտարարություն է իրեն թույլ տալիս

մի քանի ոստիկան սպանած, փոխոստիկանապետերին պատանդա պահած, նրանց շքանշանները պոկած տեռորիստական խմբի պարագլուխը ։ Վարուժան Ավետիսյանը մեղադրվում է 2016թ. հուլիսի 17-ին կազմակերպված զինված խմբի՝ «Սասնա ծռերի» կազմում, զենքի գործադրմամբ, կյանքի և առողջության համար վտանգավոր բռնությամբ ՊՊԾ գունդ մուտք գործելու եւ զավթելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Ստացվում է, որ իրենց կարելի էր ոստիկանի նկատմամբ հանցագործություն կատարել, ապաեւ ներվել հեղափոխական իշխանությունների կողմից, իրենց հանցագործություններից որեւէ մեկը չպետք է ցնցվի։ Ինչ խոսք՝ կրկնում ենք, որ արարքն ավելի քան դատապարտելի է, պետությունը պետք է քայլեր ձեռնարկի համակարգային լուծումների առաջադրման համար, բայց Վարուժան Ավետիսյանը չէ, որ պետք է ցնցվի կատարվածից։ Նույնը վերաբերում է Նիկոլ Փաշինյանին, ով պաթոսախեղդ գրառում էր արել այս կապակցությամբ․«Իմ ցավակցությունն եմ հայտնում այսօր զոհված ոստիկան, ավագ՝ Տիգրան Առաքելյանի հարազատներին, ընկերներին, մտերիմներին:
Հայաստանում ոստիկանների պաշտպանվածությունը պետք է բարձրանա այնպես, որ դա ոչ միայն ու ոչ այնքան ոստիկանների, որքան քաղաքացիների պաշտպանվածության մակարդակը բարձրացնի:
Տիգրան Առաքելյանը կարժանանա պետական պարգեւի՝ անձնուրաց ծառայության համար, իսկ հանցագործները կստանան իրենց արժանի պատիժը»: Հետաքրքիր է՝ իսկ ինչու Ծռերին չտվեցիք իրենց արժանի պատիժը եւ պետական պարգեւներ չշնորհեցիք նրանց զոհերին, որոնք ընդամենը զոհվել էին իրենց մասնագիտական պարտքը կատարելու ժամանակ։ Միգուցե Ծռերին՝ ձեր տված ազատության արդյունքում է, որ նոր հանցանքներ են ծնվում ու դեռ շարունակվելու է։

Անի Սահակյան