Աշնանային նոր սրացումներ` ընդդեմ Հայաստանի ու Արցախի
Արցախի նախագահ Բակո Սահակյանն այսօր ընդունել է ԵԱՀԿ Մինսկի խմբի համանախագահներին և ԵԱՀԿ գործող նախագահի անձնական ներկայացուցիչ Անջեյ Կասպշիկին: Նրանք քննարկվել են ադրբեջանա-ղարաբաղյան հակամարտության կարգավորմանը, Արցախի ու Ադրբեջանի սահմաններում տիրող իրավիճակին առնչվող հարցեր: Բակո Սահակյանը վերահաստատել է պաշտոնական Ստեփանակերտի հավատարմությունն ադրբեջանա-ղարաբաղյան հակամարտության խաղաղ կարգավորմանը ԵԱՀԿ Մինսկի խմբի շրջանակներում՝ վերստին շեշտելով բանակցային լիարժեք ձևաչափի վերականգնման և հակամարտության կարգավորման բոլոր փուլերին Արցախի մասնակցության անհրաժեշտությունը, տեղեկացնում է Արցախի նախագահի աշխատակազմը:
Համանախագահները տարածաշրջանում են, իսկ Ալիևի մոտ աշնանային սրացումներ են...
Ինչպես տեղեկացրել ենք, Բաքվում անցկացվում է Թյուրքալեզու պետությունների համագործակցության խորհրդի 7-րդ համաժողովը, որի շրջանակներում խորհրդի նախագահությունը ստանձնել է Ադրբեջանը: Ադրբեջանի նախագահ Իլհամ Ալիևը համաժողովում ելույթի ժամանակ հիմա էլ հիշել է Զանգեզուրը՝ հերթական անգամ հայտարարելով, որ դա ադրբեջանական տարածք է:
«Ինչպես գիտեք Նախիջևանն առանձնացվել է Ադրբեջանի ցամաքային հատվածից: Նրանց միջև ընկած է Զանգեզուրը՝ հնագույն ադրբեջանական տարածք: Զանգեզուրի հանձնումը Հայաստանին աշխարհագրորեն պառակտել է թյուրքական աշխարհը»,-ասել է նա: Ալիևը հերթական անգամ Հայաստանին մեղադրել է «օկուպացված տարածքներում Ադրբեջանի պատմամշակութային ժառանգությունը ոչնչացնելու» մեջ՝ հայտարարելով, որ Հայաստանն իբրև թե անտեսում է միջազգային կազմակերպությունների որոշումները և չի կատարում դրանք:
Սա դեռ ամենը չէ, նրան է միացել Թուրքիայի նախագահը՝ հերթական առիթն օգտագործելով՝ «օկուպացված տարածքների մասին» բարձրաձայնելով: «Մենք հնարավորը կանենք Ադրբեջանի տարածքային ամբողջականությունը ապահովելու համար»,- նույն նիստին հայտարարել է Թուրքիայի նախագահ Ռեջեփ Էրդողանը՝ հավելելով․- «Ադրբեջանական տարածքների օկուպացիայի հետևանքով մեկ միլիոնից ավելի մարդ այսօր փախստականի կյանքով է ապրում»:
Ադրբեջանի իշխանությունների պահվածքը լիովին տեղավորվում է վերջին օրերի նրա պահվածքի հետ: Համանախագահների տարածաշրջանային այցի օրերին՝ նա ձգտում է հայկական կողմի վրա բարդել բանակցություններում փակուղային իրավիճակը:
Մյուս կողմից, նա միջազգային հանրության նախապատրաստում է ընդդեմ Հայաստանի ու Արցախի ավելի սադրիչ քայլերի համար հող նախապատրաստելու առումով:
Թամար Բագրատունի
Հետևեք մեզ Viber-ում
