Թրամփը սպառնում է ոչնչացնել Թուրքիայի տնտեսությունը, Էրդողանը հակադարձում՝ երբեք չի համաձայնի զինադադարի

Չնայած սահմանված պատժամիջոցներին` թուրքական բանակը երեկ էլ շարունակում էր հարձակումը Սիրիայի հյուսիսում: Հիմնական մարտերը ծավալվում էին Ռաս ալ-Այն քաղաքում, որը ժամեր շարունակ ենթարկվել է թուրքական բանակի հրետակոծությանը:

Ավելի վաղ սիրիական հեռուստատեսությունը հաղորդել էր, որ քրդական ջոկատներին ժամանակավոր նահանջից հետո հաջողվել էր վերախմբավորվել և կրկին գրավել Ռաս ալ-Այն քաղաքի կենտրոնական թաղամասերը: Օրվա ընթացքում տեղեկություններ էին ստացվում նաև Թել Խալաֆ և Քոբանի քաղաքներում սկիզբ առած մարտերի մասին:

Միացյալ Նահանգների նախագահ Դոնալդ Թրամփն այսօր պատվիրակություն է ուղարկում Անկարա՝ փոխնախագահ Մայք Փենսի գլխավորությամբ, Սիրիայի հյուսիս-արևմուտքում Թուրքիայի ռազմական գործողություններում հրադադար պահանջելու համար, մինչդեռ Թուրքիայի նախագահ Ռեջեփ Էրդողանը հայտարարել է, թե «երբեք» չի համաձայնի զինադադար հաստատել։ Փենսին ուղեկցում են պետքարտուղար Մայք Փոմփեոն և Ազգային անվտանգության հարցերով խորհրդական Ռոբերտ Օ՛Բրայենը: Հիշեցնենք, որ Միացյալ Նահանգները Սիրիա ռազմական ներխուժման համար արդեն իսկ պատժամիջոցներ է սահմանել Թուրքիայի դեմ։ Թուրքիան ռազմական գործողությունները Սիրիայի տարածքում սկսել է հոկտեմբերի 9-ին:

Միացյալ Նահանգները պատժամիջոցներ է սահմանել Թուրքիայի նկատմամբ և պահանջում է անհապաղ դադարեցնել թուրքերի ռազմական ներխուժումը Սիրիա: «Այս պահից սկսած պատժամիջոցների են ենթարկվում Թուրքիայի պաշտպանության, ներքին գործերի և էներգետիկայի նախարարներ Հուլուսի Աքարը, Սուլեյման Սոյլուն և Ֆաթիհ Դոնմեզը: Պատժամիջոցներ են գործելու նաև պաշտպանության և էներգետիկայի նախարարությունների նկատմամբ», - ասել է ԱՄՆ ֆինանսների նախարար Սթիվեն Մնուչինը:

Վաշինգտոնը վստահեցնում է, որ բացահայտ, կամ էլ լռելյայն հավանություն չի տվել թուրքերի իրականացրած «Խաղաղության աղբյուր» գործողությանը: «ԱՄՆ-ը Թուրքիայի առաջ կանաչ լույս չի վառել Սիրիա ներխուժելու համար: Նախագահի առարկությունները շատ հստակ են, այսօր հայտարարված պատժամիջոցները կշարունակվեն և էլ ավելի կխստացվեն, քանի դեռ Թուրքիան անհապաղ չի ընդունի հրադադարը, չի դադարեցնի բռնությունը և չի համաձայնի բանակցել Թուրքիայի և Սիրիայի սահմանին առկա հարցերի երկարաժամկետ կարգավորման շուրջ»,- ասել է փոխնախագահ Մայք Փենսը:
Դոնալդ Թրամփը նախօրեին զրուցել էր թուրք պաշտոնակից Ռեջեփ Թայիփ Էրդողանի հետ: Թվիթերում տեղադրած գրառմամբ Թրամփը նախազգուշացրել է պատժամիջոցների մասին, նշելով, որ թուրքերի գործողությունները մարդասիրական ճգնաժամ են ստեղծում և նույնիսկ կարող են որակվել որպես պատերազմի հանցագործություն:

Սիրիայի հարցով Ռուսաստանի նախագահի ներկայացուցիչ Ալեքսանդր Լավրենտևը նշել է, որ Մոսկվան անընդունելի է համարում թուրքերի իրականացրած գործողությունը: Նա ասել է, թե օպերացիայի անցկացման վերաբերյալ Մոսկվայի համաձայնությունը ստանալու մասին Էրդողանի հայտարարությունն իրականությանը չի համապատասխանում:

Թրամփը երեկ նշել է, որ առաջիկայում կարձակի Անկարայի հետ 100 միլիարդ դոլարի առևտրի շուրջ բանակցությունները դադարեցնելու հրաման և 50 տոկոսով կավելացնի թուրքական պողպատի մաքսատուրքը: «Ես լիովին պատրաստ եմ ոչնչացնել Թուրքիայի տնտեսությունն այն դեպքում, եթե նրանք շարունակեն գնալ այդ վտանգավոր և ավերիչ ճանապարհով», - նախազգուշացրել է ԱՄՆ նախագահը:

Իսկ պաշտոնական Մոսկվան հայտարարել է՝ թույլ չի տա, որ բախումներ տեղի ունենան թուրքական և սիրիական ուժերի միջև՝ Սիրիայի հյուսիսում քրդական ուժերի դեմ Թուրքիայի գործողությունների պատճառով: Սիրիայի հարցով Կրեմլի հատուկ բանագնաց Ալեքսանդր Լավրենտևն ասել է, որ նման բախումներն անթույլատրելի են: «Մենք թույլ չենք տա, որ դա տեղի ունենա», - հայտարարել է նա:

Լավրենտևը հավելել է, որ թուրք և սիրիացի պաշտոնյաների միջև շփումներ կան՝ նման բախումներից խուսափելու համար: Միևնույն ժամանակ, Ռուսաստանի պաշտպանության նախարարությունը հայտնել է, որ իր զինծառայողները պարեկություն են իրականացնում սիրիական և թուրքական զորքերի շփման գծի երկայնքով՝ Եփրատ գետից արևմուտք գտնվող հյուսիսային Մանբիջ քաղաքի մոտակայքում։

ՄԱԿ-ի Մանկական հիմնադրամի՝ ՅՈՒՆԻՍԵՖ-ի գնահատականներով, Սիրիայի հյուսիս-արևելքում ընթացող վերջին շաբաթվա ռազմական գործողությունների հետևանքով գրեթե 70 հազար երեխա է տեղահանվել: Այս մասին հայտարարել է ՅՈՒՆԻՍԵՖ-ի գործադիր տնօրեն Հենրիետա Ֆորը: «ՅՈՒՆԻՍԵՖ-ը հաստատում է, որ առնվազն 4 երեխա սպանվել է և 9 վիրավորվել Սիրիայի հյուսիս-արևելքում: Ըստ զեկույցների, ևս 7 երեխա սպանվել է Թուրքիայում», - ասված է հաղորդագրությունում, որը տարածել է կազմակերպության հայաստանյան գրասենյակը: - «Հարձակման են ենթարկվել երեք առողջապահական հաստատություններ, շտապ օգնության մեքենաներ և մեկ դպրոց: Ա՛լուքի ջրակայանը, որը ջուր է մատակարարում Հասաքեյի մոտ 400 հազար մարդկանց, այլևս չի գործում»:

«Մենք մտահոգված ենք, որ առնվազն 170 հազար երեխա այժմ հումանիտար օգնության կարիք ունի այդ տարածքում շարունակվող բռնությունների հետևանքով: ՅՈՒՆԻՍԵՖ-ն աշխատում է իր գործընկերների հետ, որպեսզի անհապաղ աջակցություն տրամադրի տուժածներին», - հայտարարել է ՅՈՒՆԻՍԵՖ-ի գործադիր տնօրենը: Կազմակերպությունը նաև շարունակում է մաքուր ջուր և առողջապահական ծառայություններ մատուցել Ալ-Հոլ ճամբարում ապաստանած մոտ 64 հազար երեխաների ու կանանց:

Մետաքսյա Շալունց