Ժամանակն է վերջապես ընկալել պետության և թերթի խմբագրության տարբերությունը
Համացանցում թոփ թեմա է դարձել Արցախի Հանրապետության նախագահ Բակո Սահակյանի ու ՀՀ վարչապետ Նիկոլ Փաշինյանի հանդիպումը, որտեղ
տեղադրված էր միայն ՀՀ դրոշը, բացակայում էր Արցախի Հանրապետության դրոշը:
Սա եղել է արարողակարգային բացթողում, թե հատուկ նպատակով արված քայլ` դեռևս պարզ չէ:
Ոչ պաշտոնական, աշխատանքային ձևաչափով հանդիպումների ժամանակ Արցախի դրոշը նախկինում ևս Արցախի նախագահի հետ հանդիպումների ժամանակ դրված չի եղել: Այս մասին են վկայում ՀՀ վարչապետի պաշտոնական կայքի արխիվային լուսանկարները: Ամեն դեպքում, կառավարության աշխատակազմը հերթական անգամ օպերատիվ աշխատանքով աչքի չի ընկել ու պարզաբանում չի տվել սոցիալական մեդիայում բարձրացված աղմուկին:
Ըստ ամենայնի, կառավարությունում կա աշխատանքային հանդիպումների սրահ, որտեղ տեղադրված է միայն ՀՀ դրոշը: Բակո Սահակյան-Նիկոլ Փաշինյան հանդիպումն էլ հենց այդ սրահում է տեղի ունեցել: Նույն սրահում Բակո Սահակյանի հետ հանդիպումներ են ունեցել նաև ՀՀ նախկին վարչապետերը, օրինակ` Կարեն Կարապետյանը: Առկա է պաշտոնական կայքում հրապարկված լուսանկար, որտեղ Արցախի նախագահի հետ հանդիպմանն Արցախի դրոշը առկա չէ:
Իշխանության վերջին շրջանի քարոզչական հռետորաբանության մեջ հաճախ է շեշտվում Նիկոլ Փաշինյանի այն հայտարարությունը, թե Արցախը Հայաստան է և վերջ: Որոշ հեղափոխականների կողմից էլ պնդումներ արվեցին, թե Արցախը պետք է հռչակել ՀՀ մարզ: Պաշտոնական այս քարոզչական ֆոնը մեղմ ասած փոխում է Արցախի դրոշի բացակայության ընկալումը: Եթե անգամ այն արարողակարգային բացթողում է, իսկ արարողակարգն, այո', պահանջում էր, որ հանդիպման ժամանակ սրահում պիտի նաև Արցախի դրոշը դրված լիներ, ոչ մի լավ բան չի ասում Փաշինյանի ղեկավարած կառավարության մասին: Ամեն դեպքում, դա չարյաց փոքրագույնն է:
Իսկ եթե կատարվածն ուղղակի քաղաքական մեսիջ էր, որը հղվեց Արցախին այս անփառունակ ժեստի միջոցով, ապա պետք է ընդամենն արձանագրել, որ սա արդեն չափազանց է: Փաշինյանն ու նրա քայլող թիմն ուղղակի պարտավոր են հասկանալ, որ գործ ունեն պետության հետ, և ժամանակն է, որ նրանք վերջապես կարողանան ընկալել պետության և մասնավոր թերթի խմբագրության տարբերությունը:
Վերադառնալով հանդիպմանը` նկատենք, որ Բակո Սահակյանը կարող էր ավագի իրավունքով դիտողություն անել Փաշինյանին` Արցախի դրոշի բացակայության վերաբերյալ, առավել ևս բացառված չէ, որ դրոշը դահլիճում չէր դրվել միտումնավոր` Բակո Սահակյանին ինչ-որ բան հասկացնելու համար: Նիկոլ Փաշինյանի ամբիցիաներն արդեն վաղուց այնքան բարձր են, որ նա իրեն աստված կամ առնվազն կիսաստված է զգում ու թերևս կարծում է, որ իրեն կարելի է ամեն ինչ:
Հայկ Դավթյան
Հետևեք մեզ Viber-ում
