Նիկոլ Փաշինյանը կատարվածի համար պետք է պատասխանատվություն պահանջի

 Սահմանադրական դատարանը մերժել է ԱԺ միջնորդությունը` Հրայր Թովմասյանի լիազորությունները դադարեցնելու վերաբերյալ գործի քննությունը վարույթ ընդունել: Որպես որոշման հիմնավորում մատնանշվում է ընթացակարգային խախտումը:

Մենք նախկինում արդեն գրել ենք, որ Ազգային ժողովը Հրայր Թովմասյանի լիազորությունները դադարեցնելու վերաբերյալ դիմումը ներկայացրել է բովանդակային և ընթացակարգային ակնհայտ խախտումներով։ Այսպես` ՍԴ մասին օրենքի 12-րդ հոդվածի 3-րդ կետը հստակ սահմանում է, թե ինչ է նշանակում ՍԴ դատավորի էական կարգապահական խախտում, որի հիմքով, հիշեցեննք, ԱԺ-ն ներկայացրել էր իր հիմնավորումը:
Դատավորի էական կարգապահական խախտում է համարվում ՍԴ դատարանի նիստերից առանց հարգելի պատճառի մեկ տարվա ընթացքում 3 և ավելի անգամ բացակայելը, 2 նկատողություն կամ 1 խիստ նկատողություն ունեցող ՍԴ դատարանի դատավորի կրկին կարգապահական խախտում կատարելը, երրորդ` ՍԴ նախագահի այնպիսի արարք կատարելը, որը վարկաբեկում է ՍԴ հեղինակությունը կամ որը անհամատեղելի է դատավորի պաշտոնի հետ:
Միաժամանակ` ԱԺ կանոնակարգ սահմանադրական օրենքի 109-րդ հոդվածի 4-րդ մասը սահմանում է, որ ԱԺ-ն կարող է ՍԴ դատավորի լիազրությունների կասեցման որոշման նախագիծ ներկայացնել խախտումը հայտնի դառնալուց հետո` երկշաբաթյա ժամկետում:
Կարգապահական խախտումը հայտնի է դարձել հունիսի 21-ին, այսինքն՝ ավելի քան 3 ամիս առաջ, երբ ՍԴ-ն հրապարակեց աշխատակարգային որոշում, ըստ որի` Հրայր Թովմասյանը մասնակցելու է Քոչարյանի գործի քննությանը:
Եթե Ազգային ժողովը գտնում էր, որ Հրայր Թովմասյանը Քոչարյանի գործով անկողմնակալ լինել չի կարող և մասնակցելով գործի քննությանը` կատարել է կարգապահական խախտում, ապա երկշաբաթյա ժամկետում պետք է սկսեր լիազորությունների կասեցման գործընթաց, ինչը տվյալ դեպքում չի արվել: Ազգային ժողովը ՍԴ նախագահի լիազորությունների կասեցման գործընթացը սկսել է սեպտեմբերի 6-ին, երբ այդ ժամկետները վաղուց արդեն անցել էին: Հետևաբար Ազգային ժողովի միջնորդությունը այս տեսքով ուղղակի չէր կարող դառնալ բարձր դատարանի քննարկման նյութ: Սահմանադրական դատարանն այս իմաստով գտնվել է իր բարձրության վրա` պահելով սահմանադրական կարգի պահանջները, տուրք չտալով օրվա քաղաքական շանտաժներին:
Օրվա իշխանության համառ ջանքերի շնորհիվ Հայաստանում ակամայից ստեղծվել է մի վիճակ, երբ Սահմանադրական դատարանը ինքնաբերաբար դառնում է ազատ և բարձր դատարան, որը չի ենթարկվում քաղաքական ճնշումների, գործում է բացառապես օրենքով: Հայաստանն այժմ ունի բացառիկ շանս` ունենալու իշխանության թևերի տարանջատում: Դատարանները կարող են դառնալ գործադիր և օրենսդիր իշխանության հակակշիռ, մի բան, որի մասին միշտ խոսվել է որպես երանելի տեսություն:
Վերադառնալով Ազգային ժողովի կողմից ՍԴ ուղարկված Թովմասյանի լիազորությունների կասեցման նախագծին` նշենք, որ իրականում այն շատ թույլ և խոցելի իրավական հիմքեր ուներ ի սկզբանե: Սա հերթական արջի ծառայությունն էր Նիկոլ Փաշինյանին ու հեղափոխությանը: Նիկոլ Փաշինյանը պետք է կատարվածի համար պատասխանատվություն պահանջի այս նախագծի կոմբինատորներից և վերջապես հասկանա, որ պետք է փոխել իշխանության իրավաբաններին, հավաքել ավելի գրագետ ու բանիմաց թիմ:

 Հայկ  Դավթյան