Որքա՞ն հոնորար է ստացել Նիկոլ Փաշինյանը հայտնի պաստառի համար

 Նիկոլ Փաշինյանի` «Հայաստանն իմ օջախն է։ Ժողովուրդն իմ ընտանիքն է» ձեռագիր գրառումը, որը նա հրապարակել էր ֆեյսբուքում և առաջարկել նման գրառումներով ֆլեշմոբ իրականացնել, որպես արտաքին գովազդ` փակցվել է Երևանի տարբեր հատվածներում: 

Այնպիսի տպավորություն է, թե մենք վերադառնում ենք բրեժնևյան ժամանակներ, երբ առաջնորդի մատի յուրաքանչյուր շարժումը, փռշտոցը պատահաբար կամ նպատակային արտաբերած միտքը հանրային սրբադասման է ենթարկվում: Պարզվում է` պետական բյուջեից ոչ ավել-ոչ պակաս` 48 մլն 900 հազար դրամ՝ ավելի քան հարյուր հազար դոլար գումար են հատկացրել վարչապետի գիրքը հրատարակած ընկերությանը, որպեսզի վերջինս հիմա էլ վարչապետի երկտողը տարածի Հայաստանով մեկ: Ընդ որում, գումարը հատկացվել է առանց մրցույթի: Այս մասին ֆեյսբուքյան իր էջում գրառում էր կատարել «Քաղաքացու որոշում» սոցիալ-դեմոկրատական կուսակցության անդամ Միքայել Նահապետյանը: 

Համացանցում արդեն հրապարկվել և թեժ քննարկումների առիթ է դարձել նաև կառավարության որոշումը, որով գումարն առանց մրցույթի հատկացվել է Նիկոլ Փաշինյանի գիրքը հրապարակած ընկերությանը` «Անտարես»-ին: Գովազդային վահանակների թիվն այս պահին 70-ի է հասնում, սակայն հետագայում դրանց թիվը կավելանա: Factor.am-ին Երևանի քաղաքապետերանից հայտնել էին, որ պաստառներն իրենց են ներկայացվել «Իմիջ Մ.Գ.», «Մեդիա Գրուպ» և «Նուշիկյան Ասոցիացիա» գովազդային գործակալությունների կողմից: «Նուշիկյան Ասոցիացիա»-ից էլ հայտնել են, որ գովազդային պաստառներն իրենց պատվիրել է «Անտարես հոլդինգ»-ը։

Ահա այսպիսի թավշյա, ոչ բռնի, սիրային կոռուպցիա: Հավանաբար, կոռուպցիայի դեմ անխնա պայքար մղող հեղափոխական Նիկոլ Փաշինյանը լրջորեն ժողովրդին համարում է իր ընտանիքը, իրեն էլ թերևս այդ մեծ ընտանիքի հայրը: Այդ տրամաբանությամբ էլ որոշել է ժողովրդի փողերի հաշվին ձևավորվող բյուջեն տնօրինել սրտի ուզածի պես. մի օր 500 հազար դոլարանոց ավտոմեքենա է առնում, մի օր մասնավոր ինքնաթիռ է վարձում և 168- միլիոնանոց թռիչք կատարում, մյուս օրը 100 հազար դոլար է վճարում, որպեսզի իր ձեռագիր-գրառումը դառնա արտաքին գովազդի մեծ պաստառ: 

Տեղեկացման կարգով նշենք նաև, որ օրենքով արտաքին գովազդի տեղադրման համար անհրաժեշտ է Երևանի քաղաքապետարանի թույլտվությունը. գովազդային պաստառի էսքիզը նախապես ուղարկվում է համաձայնության Երևանի գլխավոր ճարտարապետին կամ դիզայներին: Ի վերջո թույլտվությունը տրվում է Երևանի քաղաքապետի կողմից: Ի դեպ, տեսնես ինքը` Փաշինյանը, որպես արտաքին գովազդի տեքստի և դիզայնի հեղինակ այդ 49 միլիոնից որքա՞ն հոնորար է ստացել:

Հաջորդաբար Երևանի փողոցներում կարող է հայտնվել նոր պաստառ, ասենք` «Աննան իմ սերն է» գրառմամբ:

 Հայկ  Դավթյան