Բաքվում վտանգավոր հավաք է. արդեն քննարկել են իրավիճակը Արցախում

Թուրքիայի նախագահ Ռեջեփ Էրդողանն այսօր ժամանում է Բաքու՝ մասնակցելու Թյուրքալեզու պետությունների համագործակցության խորհրդի 7-րդ համաժողովին:

Թուրքիայի նախագահի աշխատակազմի հաղորդագրության համաձայն, որը մեջբերում են ադրբեջանական լրատվամիջոցները, թյուրքալեզու պետությունների համագործակցության զարգացումը օգուտ է բերելու ամբողջ տարածաշրջանին։ Այսօր թյուրքալեզու պետություններին միմյանց կապում են ոչ միայն ընդհանուր պատմական և մշակութային արմատները, այլ նաև միասնական շահերը, որ ուղղված են ոչ միայն այդ պետությունների, այլ նաև ամբողջ տարածաշրջանի զարգացմանը, հաղորդում է «Ազատությունը»։

Էրդողանի աշխատակազմի տարածած հաղորդագրության համաձայն՝ թյուրքալեզու երկրները շարունակելու են զարգացնել և խորացնել համագործակցությունը բոլոր ոլորտներում, այդ թվում՝ տնտեսության, էներգետիկայի, զբոսաշրջության և ռազմական։ Բաքվում Թուրքիայի առաջնորդը երկկողմ հանդիպումներ կունենա կազմակերպության անդամ երկրների ղեկավարների, այդ թվում՝ Ադրբեջանի նախագահի հետ:
Բայց մինչ այդ, այսօր Ադրբեջանի և Թուրքիայի արտգործնախարարներ Էլմար Մամեդյարովը և Մևլութ Չավուշօղլուն Բաքվում քննարկել են ղարաբաղյան հակամարտությունն ու Մերձավոր Արևելքում տիրող իրավիճակը։ Հանդիպման ժամանակ ընդգծվել է երկու երկրների կողմից իրականացվող քաղաքականության կարևորությունը՝ անվտանգության ապահովման համար, ասվում է ադրբեջանական արտգործնախարարության հաղորդագրությունում:

«Ընդգծվեց երկու երկրների կողմից իրականացվող քաղաքականության կարևորությունը՝ անվտանգության ապահովման համար», - նշվում է Ադրբեջանի արտգործնախարարության հաղորդագրությունում:

Ադրբեջանի մայրաքաղաքում մեկնարկած Թյուրքական խորհրդի 7-րդ գագաթնաժողովի շրջանակներում Բաքու են ժամանում խորհրդի անդամ բոլոր պետությունների ղեկավարները: Գագաթնաժողովը նվիրված է Թյուրքալեզու պետությունների համագործակցության խորհրդի 10-րդ տարեդարձին: Խորհրդի ստեղծման մասին նախիջևանյան համաձայնագիրը 2009 թվականին ստորագրել են Ադրբեջանի, Թուրքիայի, Ղազախստանի և Ղրղըզստանի նախագահները: Թյուրքական խորհրդի նախաձեռնողը Ղազախստանի առաջին նախագահ Նուրսուլթան Նազարբաևն էր:
Հայտնի է, որ Բաքվում 7-րդ գագաթնաժողովի շրջանակում կհայտարարվի արդեն պաշտոնապես Ուզբեկստանի անդամակցության մասին: Խորհրդին միանալու մասին փաստաթուղթը այդ երկրի նախագահ Շավքաթ Միրզիյոևը ստորագրել է սեպտեմբերի 14-ին: Կազմակերպությունում դիտորդի կարգավիճակ ունի Հունգարիան:

Կազմակերպության կենտրոնակայանը Ստամբուլում է, խորհուրդը մտադիր է գրասենյակ բացել նաև Հունգարիայի մայրաքաղաք Բուդապեշտում․ այս հարցը գագաթնաժողովի օրակարգում է: Գագաթնաժողովում նախատեսվում է նաև Նուրսուլթան Նազարբաևին հռչակել խորհրդի պատվավոր նախագահ:

Իսկ վաղը թյուրքալեզու պետությունների ղեկավարները ստորագրելու մի շարք փաստաթղթեր: Ինչպես հայտնում է «Ազատությունը»՝ մասնավորապես, նրանք մտադիր են հիմնել խորհրդի համակարգող հանձնաժողով, թյուրքական ակադեմիա, թյուրքական մշակույթի և ժառանգության հիմնադրամ, ինչպես նաև թյուրքական առևտրաարդյունաբերական պալատ:

Թյուրքալեզու երկրների ղեկավարները վաղը նաև հռչակագիր են ստորագրելու։ Այսօր Բաքվում արդեն կայացել է այդ կազմակերպության արտգործնախարարների հավաքը։
Հիշեցնենք՝ Թյուրքական խորհրդի անդամ երկու երկրներ՝ Ղազախստանը և Ղրղըզստանը, դե յուրե Հայաստանի դաշնակիցներն են ՀԱՊԿ-ի և Եվրասիական տնտեսական միության շրջանակներում, իսկ Ուզբեկստանը արդեն հայտարարել է, որ միանում է եվրասիական տնտեսական միությանը:

Մետաքսյա Շալունց