Թվացյալ խաղաղություն, թե՞ անվստահություն
Թեպետ Ռուսաստանի արտգործնախարար Սերգեյ Լավրովի հայաստանյան այցից հետո իշխանական շրջանակներում արցախյան խնդրի հարցում ակնհայտ հանդարտություն է իջել, այդ մասին են վկայում նաեւ բարձրաստիճանների հայտարարությունները, սակայն ոչ իշխանական օրենսդիրների շրջանում լարվածությունը պահպանվում է։ Ժառանգություն խմբակցության ղեկավար Զարուհի Փոստանջյանը պահանջեց, որպեսզի անվտանգության հարցերի վերաբերյալ խորհրդարանական քննարկումներ անցկացվեն, որին պետք է մասնակցեն ոչ միայն հայաստանյան, այլև ԼՂՀ համապատասխան պաշտոնյաներն ու պատգամավորները․«Մենք պետք է պատրաստ լինենք ավելի լայնածավալ գործողությունների, որովհետև Ադրբեջանը դրան պատրաստվում է»,- ասաց նա՝ հարկ համարելով, որ պատկան մարմինները լսեն պատգամավորների մտահոգություններն ու նրանց հուզող հարցերը: Փոստանջյանն ընդգծեց, որ այժմ նոր իրողություն է, նախկինում տեղի ունեցած բանակցային գործընթացից դուրս եկած վիճակում ենք, և պետք է խոսել այդ նոր վիճակի մասին: ԱԺ փոխնախագահ Էդուարդ Շարմազանովը նեղսրտած ասաց. «Եթե ձեր ելույթը լսեր մի մարդ, ով վերջին քսան օրերին թերթ չի կարդացել, իրեն կթվար, որ Արցախի հանդեպ եղել է ագրեսիա, Ազգային ժողովն էլ պարապ-սարապ նստած է:Այդպես չէ» : Շարմազանովն ասաց, որ իր անձնական կարծիքն այն է, որ նպատակահարմար չէ, որ Արցախի վարչապետն ու ԱԺ նախագահը գան Հայաստանի խորհրդարան ու հաշվետվություն ներկայացնեն: «Եթե ուզում եք, գնացեք Արցախ ու այնտեղ լսեք»։ Հերմինե Նաղդալյանն էլ զոռ տվեց երեւակայությանը, ասելով, թե նոր իրողության ձևաչափ մտցնելը Ադրբեջանի երազանքն էր: «Այն երազանքը, որը շուրջ հինգ տարի Կազանից հետո իրենք փորձում էին իրականացնել՝ ռմբակոծելով Մինսկի խմբի գործընթացները և նաև նախաձեռնելով այս աննախադեպ ագրեսիան»։ Նա ոգեւորությամբ հիշեցրեց 1994 թվականի անժամկետ եռակողմ պայմանագիրը եւ ասաց, թե Մինսկի խումբն ընդունում է, որ այդ պայմանագրի փոփոխության անհրաժեշտություն չկա:«Խոսել նոր իրողության մասին, այս մտքերը ջուր են Ադրբեջանի ջրաղացին»,- ասաց Նաղդալյանը: Զարուհի Փոստանջյանը ՀՀԿ-ական տիկնոջ երեւակայությունը կանխեց՝ հիշեցնելով, որ Մինսկի խումբը նման հայտարարությամբ հանդես չի եկել «Մինսկի խումբը նման որևէ բան չի ասել, և հղում կատարել, որ Մինսկի խումբը հնարավորություն ունի զսպելու Ադրբեջանի կողմից կրկնվող ագրեսիան, դա ուղղակի միամտություն է: Այն, ինչ մենք այս քսան օրերի ընթացքում անում ենք, բավարար չէ, ո՞ւր է, որ ինչ-որ մեկը Ադրբեջանին ագրեսիայի համար մեղադրեց ու սկսեց իրավական գործընթաց: Ունե՞նք նման փաստ, խոսքերով միայն դատապարտելը շատ քիչ է: Այսօր օրակարգում ընդգրկված են տարածքներ հանձնելու ու խաղաղապահներ բերելու հարցերը, այս հարցերի շուրջ պետք է քննարկում անենք ու թույլ չտանք: Սա մեզ պարտադրվում է, ո՞վ չգիտի, որ այդ հարցերն օրակարգում են, նախքան Լավրովի գալը Հայաստան ռուսական մամուլը ողողված էր այս ամենով: Սա չքննարկելը հանցագործություն է, ով լռում է, միջոցներ չի ձեռնարկում, հենց նրանք են Ադրբեջանի ջրաղացին ջուր լցնում»,- ասաց Փոստանջյանը: Հերմինե Նաղդալյանը փրփրեց, թե որևէ մեկը մեր երկրում նման մտադրություն չունի. «Ձեր անհանգստությունը, որ եթե դուք ձեր ձայնը չբարձրացնեք, որևէ մեկն այդ տարածքները հանձնելու է, բոլորովին անտեղի է»: Խաչատուր Քոքոբելյանն էլ հայտարարեց, որ Նալբանդյան-Լավրով քննարկումների ողջ ընթացքում Հայաստանում ինֆորմացիա ավելի շատ ստանում էինք ռուսական մամուլից․«Դրա պատճառը մեր արտգործնախարարության աշխատանքն է»,- ասաց նա։ Քոքոբելյանը պահանջեց, որպեսզի ԱԺ նախագահության առաջարկությամբ արտաքին գործերի նախարարն առնվազն երկու թեմայի վերաբերյալ տեղեկատվություն ներկայացնի: «Առաջինը, Հայաստանի և Լեռնային Ղարաբաղի միջև փոխօգնության պայմանագրի հետ կապված, որի մասին խոսեց Սերժ Սարգսյանը, պետք է տեղեկատվություն տրամադրվի: Երկրորդը, նա պետք է շատ հստակ տեղեկատվություն ներկայացնի բանակցային գործընթացի հետ կապված, որպեսզի մենք ստիպված չլինենք այլ երկրների լրատվություններից կամ պաշտոնական տեղեկատվությունից տեղեկանալ»,- ասաց Քոքոբելյանը: Էդուարդ Շարմազանովն էլ հայտարարեց, որ Նալբանդյանը մշտապես ներկայացրել է Հայաստանի դիրքորոշումը և տեղեկատվություն է տրամադրել հանրությանը: ՀԱԿ խմբակցության պատգամավոր Հրանտ Բագրատյանն էլ հորդորեց հրավիրել զինված ուժերի շտաբի պետ Խաչատուրովին, ՊՆ ղեկավարությանը ԱԺ, որ տեսնեն՝ այդ ինչպե՞ս են ծախսվում բանակին հատկացված միջոցները, որ զինվորը 20.00-ից հետո անգամ չի տեսնում, գիշերային սարք չկա: Շարմազանովն ի պատասխան՝ առաջարկեց, որ կազմակերպի առանձին հանդիպում Սեյրան Օհանյանի եւ Բագրատյանի հետ, իրեն հուզող հարցերի պատասխանները ստանա: Բայց մի շարք պատգամավորներ հակադարձեցին՝ դա բոլորիս հուզող հարց է եւ թող ՊՆ ղեկավարությունը գա ԱԺ, պատասխանի բոլորի հարցերին: ԲՀԿ խմբակցության ղեկավար Նաիրա Զոհրաբյանի խոսքերով՝ «ԱԺ-ում տեղի ունեցած փակ նիստը չի բավարարել պատգամավորների մտահոգությունը: Կան հարցեր, որ լուրջ քննարկում են պահանջում եւ հարցեր կան, որ թույլ չենք տա ԶԼՄ-ների առջեւ բարձրաձայնել ու չենք ցանկանում կառավարության հետ հարցուպատասխանի ժամանակ հարցնել: Հարցեր կան, որ ուզում ենք ուղղել անձամբ վարչապետին, անձամբ ՀՀ արտգործնախարարին եւ անձամբ ՊՆ նախարարին»: Անի Սահակյան