Ձեր տեղը կանանց դեմ պատերազմի դաշտն է

Իշխանությունը կեղտոտ արշավ է սկսել Արցախի հերոս, գեներալ Վիտալի Բալասանյանի դեմ: Նրանք ըստ ամենայնի չեն կարողանում նայել իրականությանը բաց աչքերով, որին առերեսում է հերոս Բալասանյանը՝ ժամանակ առ ժամանակ իր սթափեցնող հայտարարություններով: Գեներալը պարբերաբար իշխանության առջեւ հայելի է պահում, որպեսզի տեսնեն՝ ովքեր են իրենք, իսկ քանի որ առանձնապես հիանալու բան չունեն, ցավագին, հիվանդագին են ընդունում այդ ամենը: Այս օրերին էլ ասպարեզ են նետում Վիտալի Բալասանյանի դեմ արտահայտվել ցանկացողներին , իսկ քանի որ նորմալ մարդիկ գեներալ Բալասանյանի դեմ ասելիք չեն կարող ունենալ, իշխանությունը հավաքագրում է թափթփուկների ու փոքր խմբաքանակներով պարբերաբար բաց թողնում: Հերթը հանրահայտ Քոչարյան Անդրանիկինն է, ով աչքի է ընկել իր սանձարձակ հայտարարություններով: Հանրությունը չէր մարսել Արփինե Հովհաննիսյանին ուղղված նրա անպարկեշտ վիրավորանքները, բայց նա նոր զառանցանքներով է աչքի ընկել: Ասել է, որ Վիտալի Բալասանյանը ապրիլյան պատերազմի ժամանակ իրավունք չուներ հրամաններ տալու, նա ընդամենը PR –ով է զբաղվել:

«Չնայած նա բազմիցս հայտարարել է, որ ինքը ապրիլի 2-ին գնացել է համապատասխան պաշտպանական շրջան եւ հրամաններ է իջեցրել, որի իրավունքը չունի եւ ես համոզված եմ, որ այդպես չէր կարող լինել, պաշտպանական շրջանի հրամանատարին, հրետանին հանելու, կրակ բացելու եւ այլն։ Դա ավելի շատ նման է PR գործողությունների, որ բանակի կառավարման հետ որեւէ աղերս չուներ»։ Ուստի ըստ Քոչարյանի իմաստ չունի նրան կանչել ապրիլյան քննիչ հանձնաժողովի նիստերին:
Նախ ով չգիտի, տեղեկացնենք, որ Քոչարյանի հորինած այդ հանձնաժողովը բառի բուն իմաստով ժամավաճառությամբ է զբաղված, մարդիկ հավաքվում են, փորձում կեղտեր գտնել նախկինների վրա, բայց ամիսներ շարունակ ու ցայսօր ոչինչ չի ստացվում, դրա ապացույցն է, որ նույնիսկ նախկին կամ ներկա բարձրաստիճան պաշտոնյաների չեն կարողանում հրավիրել մի պարզ պատճառով՝ հրավիրեն, որ ինչ անեն, ամեն ինչ այնքան պարզ է, եւ անգամ նույն հհանձնաժողովի անդամներն են հասկացել, որ իրենք ուղղակի անելիք չունեն եւ Քոչարյանն այսպիսով զբաղմունք է գտել իրեն,որոշակի խորհրդավորություն ստեղծել փակ նիստերով, որպեսզի կարեւորված անձ ներկայանա: Ուստի Վիտալի Բալասանյանն, իսկապես, անելիք չունի այդ հանձնաժողովում, քանզի նա իր գործը հերոսաբար արել է քառօրյայի օրերին:
Այստեղ են ասում՝ ում ինչ բացատրես, Անդրանիկ Քոչարյանին կարելի է բարեկամաբար խորհուրդ տալ մեկնել Արցախ ու երեխաներին է անգամ հայտնի Բալասանյանի այդ օրերի աշխատանքը, որի շնորհիվ է նաեւ, որ ապրիլյան պատերազմ անդառնալի հետեւանքներ չունեցավ մեզ համար: Իսկ ընդհանրապես պարոն Քոչարյանը ճիշտ կանի չմտնի այնպիսի տարածք, որտեղ ինքն առհասարակ անելիք չունի: Իր առաքելությունը կանացի դաշտում է, նրանց հետ բանավեճի, լեզվակռվի պատերազմում, որը նա անում է առանձնակի հպարտությամբ եւ պատվով:

Անի Սահակյան