Արթուր Դավթյանը դժգոհ է Փաշինյանից. ցածր աշխատավարձով, առանց կաշառքի

 Կառավարությունը հաստատել է դատաիրավական բարեփոխումների ռազմավարությունը, որով, բացի իրավական ու կառուցվածքային բարեփոխումներից, նախատեսվում է նաև դատական համակարգում աշխատավարձերի բարձրացում։

Այս փաստը, սակայն, առանձնապես չի ոգևորում գլխավոր դատախազ Արթուր Դավթյանին: Կառավարության նիստում նա հայտարարեց, որ ՀՀ դատախազությունը մի քանի վերապահում ունի դատաիրավական ռազմավարության վերաբերյալ։ Դատախազը դժգոհ է, որ անընդհատ բարձրացնում են դատավորների աշխատավարձերը, մինչդեռ դատախազների աշխատավարձը ցածր է. «Ակնհայտ տարբերակված մոտեցում է ցուցաբերվում դատավորների նկատմամբ։ Իմ կարծիքով` դա արդարացված չէ։ Քրեական արդարադատության ոլորտը սկսվում է հետաքննիչից, հետքքննությունից, մինչև հասնում է դատարան։ Եթե շատ պարզ ասեմ` դատավորն արդեն իսկ հետաքննիչից այսօր մի 4 անգամ ավելի աշխատավարձ է ստանում, 2-3 անգամ ավելի է ստանում քննիչից, դատախազից»,– հայտարարեց Դավթյանը և ավելացրեց, որ նման անհամարժեք մոտեցումները բացասական հետևանքների կհանգեցնեն։

Նիկոլ Փաշինյանը համաձայնեց, որ դատավորների հարցն առաջին պլան է եկել` հայտնի հանգամանքների բերումով և օբյեկտիվորեն, որովհետև, ըստ էության, դատավորները դատաիրավական համակարգի այսբերգի վերևում են: Դատախազի ասածների մեջ, անշուշտ, ճշմարտություն կա: Հատկապես հեղափոխությունից հետո քննիչների գործն անասելի բարդացել է: Տասնյակ հազարավոր գործեր են հարուցվում` սկսած ամենասովորական դպրոցի պահակի վրա դուրս գրված աշխատավարձից, վերջացրած ամենախոշոր գործերով: Հեղափոխությունից հետո բողոքների և դիմումների մի անասելի տարափ սկսվեց` տեղից վեր կացողը անմիջական վերադասի, հարևանի, բարեկամի, գործընկերոջ ու ընկերոջ դեմ կա'մ բողոք էր գրում, կա'մ Թեժ գիծ զանգում:

Բողոքները շատ դեպքերում անգամ, առանց կարդալու, ուղարկվել են դատախազություն: Մի առիթով ինքը` Նիկոլ Փաշինյանը, խոստովանեց, թե քննիչներն աշխատում են գրեթե շուրջօրյա` առանց հանգստյան օրերի, բայց էլի չեն հասցնում, քանի որ կոռուպցիոն բնույթի գործերը շատ-շատ են: Թեպետ այդ գործերի մի մասը հետագայում հասնում է դատարան, մի մասը կարճվում, սակայն ամեն դեպքում քննչական գործողություններ կատարվում է, ըստ ընթացակարգի` գործերը կազմվում են, այսինքն` քննիչն իր գործն անում է: Այս առումով հարցն ունի նաև բարոյական կողմ` ի վերջո դատավորները որոշումներ են կայացնում` հիմնվելով քննիչների կազմած գործի, հատաքննությամբ ձեռք բերված և գործում ներառված ապացույցների հիման վրա: Հետհեղափոխական Հայաստանի կոռուպցիայի դեմ պայքարի դատական գործերի համար իշխանությունն ու Նիկոլ Փաշինյանը պետք է ինչ-որ կերպ գնահատեն քննիչների աշխատանքը: Արթուր Դավթյանը հենց դրանից էր նեղված ու թերևս հենց այս մասին էր ակնարկում. Ինչո՞ւ պիտի քննիչը կատարի գործեր սարքելու, իշխանության քաղաքական մահակը գործողության մեջ դնելու խիստ անշնորհակալ գործը, երբ դրա դիմաց նրան առաջարկվում է ցածր աշխատավարձ և պահանջ է դրվում` աշխատել առանց կաշառքի:

Հայկ  Դավթյան