Չափներդ ճանաչեք ու մի ինքնահաստատվեք հերոսի հաշվին
Արցախի հերոս, գեներալ Վիտալի Բալասանյանի հարցազրույցը մեծ զայրույթ է առաջացրել իշխանական ու իշխանամերձ շրջանակներում: Խոցվել են հատկապես հերոսի այս արտահայտությունից՝ պատրաստ են ոչնչացնել այն ուժերին ովքեր զենք կկիրառեն քաղաքական խնդիրների մեջ, ուղերձը Սասնա ծռերին է ուղղված «2016 թվականին ներեցինք այդ ահաբեկիչներին, հիմա հայտարարում եմ, որ ֆիզիկապես ոչնչացնելու ենք նրանց, ովքեր կփորձեն ոտնձգություն անել իմ, մեր ժողովրդի, մեր պետության, պետականության, սահմանների, Արցախի իշխանությունների նկատմամբ»,- ասում է Վիտալի Բալասանյանը:
«Նիկոլ Փաշինյանն ու այդ ահաբեկչական խմբավորումը մեկ ամբողջություն են, դա մեկ ահաբեկչական խմբավորում է, մեկը՝ զենքով, մյուսը գրիչով իշխանությունը բռնազավթել են: Բարձրաձայն եմ ասում, թող Նիկոլի հպարտ քաղաքացիները լսեն, համայն հայությունն էլ լսի և րոպե առաջ քայլ անի»: Հասկանալի է, թե ինչ նկատի ունի Բալասանյանը, քանզի Նիկոլ Փաշինյանի ու Ծռերի՝ Արցախի հարցում ունեցած դիրքորոշումը հայտնի են բոլորին: Այս ամիսներին մենք լսել, իրենք՝ արցախցիները՝ հաճախ զգացել են իրենց մաշկի վրա, թե ինչպես են իրենց հերոսներին հողին հավասարեցնում, դավադիր պատերազմ հրահրողներ հռչակում, ինչպես են պարտադրում նրանց հրաժարականներ, ինչպես են խրախուսում Արցախի նախագահի գլուխը քարով ջարդելու հայտարարությունները, ինչպես են Արցախը հռչակում հակահեղափոխության որջ ու այսպես շարունակ:
Իսկ Սասնա ծռերն ուզում են արհամարհել արցախցու կամքը՝ այն հռչակել հայաստանի մարզերից մեկը: Հիմա, երբ դանակը հասել է ոսկորին ու Արցախի կարգավորման հարցի բանակցությունները մտել են փակուղի, երբ այլեւս կանգնած են ինչ-որ առումով վտանգավոր եզրագծին, հերոսները հենց հերոս են նրանով, որ չեն վախենում սթափեցնող խոսքից, թեկուզ քաջ գիտակցելով, թե ինչ է հաջորդելու դրան; Բայց միեւնույն է չեն երկնչում, որ կդառնան իշխանությունների եւ նրանց երկրպագող հպարտ քաղաքացիների թշնամին, չեն նահանջում, ոչ թե իրենք են հարմարվում ստեղծված իրավիճակին, այլ ճիշտ հակառակը՝ այն հարմարեցնում են պետության ու ժողովրդի շահին: Այդպիսին են իրական հերոսները՝ թեկուզ փոքր-ինչ էմոցիոնոլ, հախուռն իրենց ասելիքի մեջ, բայց նրանք ազնիվ են իրենց մղումներում: Գեներալի հարցազրույցը, սակայն, հավսար-զգաստի է բերել ՀՀ հպարտ քաղաքացիներին, ով չի ալարում փորձում է ինքնահաստատվել Բալասանյանի հաշվին՝ հերոսին հակահերոս հռչակելով: Բալասանյանի հարցազրույցը հերթական անգամ լյուստրացիա դարձավ նաեւ իշխանության իրական դեմքը պատռելով, իսկ այս իշխանությունը զբաղված է հերոսի ոչնչացմամբ: Թեեւ անթույլատրելի ենք համարում մեջբերել ամենազիլ զառանցանքներից տողեր, բայց Հայաստանի ԱԱԽ քարտուղար Արմեն Գրիգորյանը, որը հայտնի է իր երիտասարդ անփառունակ կենսագրության էջերով, չափն ուղղակի անցել է. «Վիտալի Բալասանյանն իրեն պահում է որպես խուլիգան, այլ ոչ թե Արցախի նախագահի թեկնածու:
Ամեն անգամ Ստեփանակերտում Սերժ Սարգսյանի հետ խմբակային հանդիպումներից հետո Վիտալի Բալասանյանի մոտ սրացումներ են սկսում, որոնք ավելի շատ շեղումներ են հիշեցնում: 2016 թվականից իր քաղաքական կարիերան Սերժ Սարգսյանի հետ կապած Բալասանյանը հայտնվելու է քաղաքական աղբանոցում, որտեղ գտնվում է իր առաջնորդը»։
Ու այսքանից հետո այս իշխանությունը պսեւդոհայրենասերի դիմակ հագած կարող է հարկ եղած պահի հորջորջել հայրենասիրության, ժողովրդասիրության մասին, երբ Ադրբեջանում մարդասպան Սաֆարովից հերոս են կերտում, իսկ մեզ մոտ փորձում ոչնչացնել իրական հերոսներին: Ցինիզմն այսքանով չի ավարտվում, գլխավոր դատախազությունից հայտնեցին, որ Բալասանյանի հայտարարությունները կստուգի ԱԱԾ-ն, մեկը հարցնի՝ իսկ Նիկոլ Փաշինյանի հայտարարություններն ով պետք է ստուգի, ով ամեն օր կամ փռում է ասֆալտին, կամ ծեփում պատերին, կամ գլուխներ է ջարդում ու այսպես շարունակ:
Անի Սահակյան
Հետևեք մեզ Viber-ում
