Պուտինն ու Լավրովը չեն սաստում Ալիևին. մտածեք դրա մասին

Ինչպես արդեն տեղեկացրել ենք, Սոչիում Պուտին-Ալիև հանդիպման նախաշեմին՝ «Վալդայ» համաժողովին ղարաբաղյան հակամարտության թեմայով խոսեց Ռուսաստանի արտգործնախարար Սերգեյ Լավրովը: Նրա հայտարարություններն առավել քան ուշադրության են արժանի:

ԵԱՀԿ Մինսկի խմբի համանախագահող պետության՝ Ռուսաստանի արտաքին գործերի նախարարը, նախ նշեց, որ Ղարաբաղում ռազմական գործողությունների վերսկսման ռիսկեր չկան: Հավելեց նաև, որ Ռուսաստանը Ղարաբաղի հարցում տարաձայնություններ չունի Մինսկի խմբի համանախագահ մյուս երկրների՝ Ֆրանսիայի և Միացյալ Նահանգների հետ, ամեն ինչ կանի, որպեսզի ռազմական գործողություններ Ղարաբաղում տեղի չունենան:

«Վերջին շրջանում իրավիճակը շփման գծում բավական հանգիստ է, միջադեպերը քիչ են և դրանք շատ խոշոր չեն», - ասել էր Լավրովը՝ միաժամանակ հայտարարելով, որ առաջխաղացում էլ բանակցություններում չկա: «Կարող եմ ասել, որ ներկայումս իրավիճակն ավելի հանգիստ է, քան մեկ տարի առաջ, սակայն քաղաքական գործընթացն արգելակված է, և չի հաջողվում այն հանել այդ վիճակից», - ասել է Ռուսաստանի արտգործնախարարը:

Ապա, ոչ ավել, ոչ պակաս Սերգեյ Լավրովը բողոքել էր, որ կողմերը լուրջ հայտարարություններ են անում, որոնք չեն նպաստում քաղաքական գործընթացի համար բարենպաստ մթնոլորտի ձևավորմանը: Նա հիշատակեց, մասնավորապես, «Արցախը Հայաստան է» Փաշինյանի հայտնի հայտարարությունը: «Կողմերը հայտարարություններ են անում, բավականին լուրջ, այդ թվում հնչել են բառեր, թե «Ղարաբաղը Հայաստան է», ինչպես Տիրանայից Ալբանիայի վարչապետն էր հայտարարում՝ «Կոսովոն Ալբանիա է»: Նման հայտարարություններն, իհարկե, չեն նպաստում քաղաքական գործընթացը վերսկսելու համար համապատասխան մթնոլորտի ձևավորմանը», - Սոչիում ասել էր Ռուսաստանի արտգործնախարարը:

Փաստացի, պաշտոնական Մոսկվան բաց ու հաստակ պատասխանեց Փաշինյանի՝ Ստեփանակերտում արած հայտարարությանը, հասկացնելով, որ ընդունելի չէ նրա նշյալ գնահատականը:

Ի՞նչ դիրքորոշում է արտահայտել Լավրովը... Միանշանակ՝ ադրբեջանահաճո:
Ի՞նչ քայլեր ունի հայկական դիվանագիտությունն այս առիթով: Ինչու՞ է Մոսկվան պաշտպանում Ադրբեջանի դիրքորոշումը: Ո՞վ է պատասխանատու այս հարցում: Ո՞ւր են իշխանության պաշտպանները, ինչու՞ չեն բացատրություն պահանջում Փաշինյանի իշխանությունից:

Իսկ առիթը միայն Լավրովը չէ...

Ադրբեջանի նախագահ Իլհամ Ալիևը Սոչիում՝ «Վալդայ» համաժողովի ընթացքում արձագանքել է դեռևս մեկ ամիս առաջ Հայաստանի վարչապետ Նիկոլ Փաշինյանի արած «Արցախը Հայաստան է և վերջ» հայտարարությանը՝ նշելով. «Հայաստանն ինքը չի ճանաչում այդ ապօրինի կազմավորումը, Ղարաբաղը պատմական ադրբեջանական տարածք է, այնպես որ Ղարաբաղն Ադրբեջան է և բացականչական նշան»։

Ալիևը խոսում էր՝ Պուտինի հետ բեմում նստած: Հակադարձե՞ց Պուտինը Ալիևին... Ո՛չ: Մինչ այսօր ռուսական կողմից եղե՞լ է մի սաստող հայտարարություն Ալիևի հայտարարություններին ի պատասխան, ինչպես Լավրովը պատասխանեց Ստեփանակերտում Փաշինյանի հայտարարությանը: Չի եղել, ու ըստ ամենայնի՝ չի էլ լինի:

Հետևաբար, Հայաստանի ներսում լրատվամիջոցներին, առանձին գործիչներին «թշնամի» որակելուց առաջ Հայաստանի իշխանություններն ու նրան պաշտպանող հեղափոխականները ճիշտ կլինի, եթե իրենց էներգիան ուղղեն իսկապես Հայաստանի ու Արցախի դիրքերի ամրացմանն, այլ ոչ թե լռություն պահպանեն, երբ Մոսկվան ու Բաքուն համահունչ նույն դիրքորոշում են բռնել Լեռնային Ղարաբաղի հարցում:

Մետաքսյա Շալունց