«Խփելու եմ քեզ». սպառնում են Անժելա Թովմասյանին. հաղորդում հանցագործության մասին

Ինչպես հայտնի է երեկ՝ հոկտեմբերի 5-ին, իշխանամերձ 4 անձ՝ Դավիթ Հովհաննիսյանը, Սարգիս Մանուկյանը, Արտակ Մարգարյանը և Հայկ Ստեփանյանը հարձակվել են «Հայելի» մամուլի ակումբի և նույն հասցեում գործող Hayeli.am կայքի խմբագրության վրա, կատարել խուլիգանական արարք` ձվեր նետել և հանդես եկել հայտարարությամբ, որ կայքն ու ակումբը պետք է փակել, քանի որ կայքի հրապակումներից մեկը իրենց սրտով չէ, իսկ գլխավոր խմբագիր և ակումբի նախագահ Անժելա Թովմասյանը Սահմանադրական դատարանի նախագահ Հրայր Թովմասյանի քույրն է:

«Հայելի» մամուլի ակումբը և Hayeli.am կայքի խմբագրությունը այս առթիվ հրապարակային հաղորդում են ներկայացրել իրավապահ մարմիններին` ոստիկանապետի պաշտոնակատար Արման Սարգսյանին, գլխավոր դատախազ Արթուր Դավթյանին, Հատուկ քննչական ծառայության պետ Սասուն Խաչատրյանին` անհապաղ իրավական գնահատական տալ կատարված խուլիգանական արարքին, պատժել խուլիգաններին և նրանց թիկունքում թաքնված պատվիրատուներին, քանզի սա համարում ենք քաղաքական հետապնդում, անձի ազատության և ընտանիքի դեմ ուղղված քայլ, իսկ ակումբի և խմբագրության նկատմամբ կատարված արարքը` խոսքի ազատության դեմ ոտնձգություն: Մինչ իրավապահները կուսումնասիրեն դեպքի հանգամանքները, թեեւ մեր կարծիքով առանձնապես ուսումնասիրելու բան էլ չկա, տեսանյութեր կան, որոնցում պարզ երեւում է կատարվածի ողջ ենթատեքստն ու խուլիգանական ակնհայտ գործողությունները, և Անժելա Թովմասյանը նոր սպառնալիքներ է ստանում համացանցային տիրույթում:

Anul Ginosyan անուն-ազգանունով օգտատերը արձագանքել է հայտնի միջադեպին եւ վերջում անթաքույց սպառնալիք հնչեցրել՝ չխուսափելով ընդգծել, որ այո, ինքը սպառնում է ակումբի նախագահին.<<Հա, ես ձեզ ահաբեկում եմ, քանի որ հենց էս օրվանից որտեղ բռնեմ 100000 տեղից խփելու եմ>> լատինատառով գրել է օգտատերը: Ընդունեք մեր այս հրապարակումը հաղորդում հանցագործության մասին եւ անհապաղ միջոցներ ձեռնարկեք: Դիմում ենք հատկապես պաշտոնակատար Արման Սարգսյանին, գլխավոր դատախազ Արթուր Դավթյանին, Հատուկ քննչական ծառայության պետ Սասուն Խաչատրյանին, գտնել եւ պատասխանատվության ենթարկել սույն անձին: Ի վերջո, Նիկոլ Փաշինյանն ինքն էր ամիսներ առաջ հրահանգել, որ հայտնաբերեն սպառնալիք տարածքող բոլոր ֆեյքերին ու պատասխանատվության ենթարկել: Սա ֆեյք չէ, կոնկրետ անձ է՝ իր անուն-ազգանունով, որը անթաքույց սպառնալիք է հնչեցնում Անժելա Թովմասյանի կյանքին եւ առողջությանը: