ՄԻԵԴ-ն էլ, Վենետիկի հանձնաժողովն էլ, Սահմանադրական դատարանն էլ հակահեղափոխական կառույց կհռչակեն

Ազգային ժողովի հաստատումից հետո Սահմանադրական դատարանի նախագահ Հրայր Թովմասյանի լիազորությունների կասեցման հարցն ուղարկվել է ՍԴ: Վերջնարդյունքում ՍԴ-ն է որոշելու` կշարունակի պաշտոնավարել Թովմասյանը թե ոչ:
Հիմնական մեցադրանքը` ուղղված Հրայր Թովմասյանին, այն է, որ նա էական կարգապահական խախտում է թույլ տվել Ռոբերտ Քոչարյանի գործով: Թե կոնկրետ ինչ խախտում` խորհրդարանական մեծամասնության ներկայացուցիչները չկարողացան հիմնավորել, անգամ խելամտություն չունեցան սպասել այս հարցով Վենետիկի հանձնաժողովի և Մարդու իրավունքների եվրոպական դատարանից սպասվող փորձագիտական եզրակացությանը:

ՍԴ-ն, մինչ իր որոշման կայացումն ու հրապարակումը, ինչպես հայտնի է, դիմել է նշված կառույցներին` փորձագիտական կարծիք ստանալու խնդրանքով: Սահմանադրական դատարանը մինչ այդ կարծիքների ստանալը` սեպտեմբերի 4-ին, հրապարակեց իր որոշումը: Հաշվի առնելով, սակայն, այդ որոշման հրապարակումից հետո ստեղծված քաղաքական և հանրային բևեռացումը ՍԴ-ի և հատկապես նրա նախագահի շուրջ` միջազգային հեղինակավոր կառույցներից սպասվող փորձագիտական եզրակացությունները կարող են կարևոր ուղղորդիչ նշանակություն ունենալ ինչպես Սահմանադրական դատարանի որոշումը արժևորելու, այնպես էլ Ազգային ժողովում տեղի ունեցած լիազորությունների կասեցման գործընթացը գնահատելու առումով: Բայց այս գնահատականներն ըստ երևույթին չեն հուզում խորհրդարանին, նրանք չեն ուզում այդ մասին ոչինչ լսել` ունեն իրենց քաղաքական որոշումը և վերջ:
Միջազգային կառույցների եզրակացության հետ իշխանությունն այպես թե այնպես առերեսվելու է, գնահատականները ուզած-չուզած պետք է զուգահեռվեն քաղաքական գործընթացների հետ: Թեպետ իմքայլականներն առանձնակի բարդույթներ չունեն անտեսելու օրենքները, հետևաբար հազիվ թե ներողություն խնդրեն ՍԴ-ից, եթե միջազգային փորձագիտական եզրակացություններում ՍԴ վարքագիծը օրինաչափ որակվի: Մինչ այդ եզրակացությունները տեղ հասնեն, կա'մ ՍԴ-ն վերածված կլինի յուրայինների պալատի, կա'մ էլ հռչակված կլինի հակահեղափոխական կառույց:
Ի դեպ, խորհրդարանում «Իմ քայլը» խմբակցության պատգամավորները իրենց ելույթներում առավելապես կենտրոնացել էին Հրայր Թովմասյանի` «Արմնյուզ» հեռուստաընկերության եթերում ունեցած հարցազրույցի վրա: Այնպիսի տպավորություն էր, որ լիազորությունների կասեցման գործընթաց սկսելու պատճառը հենց այդ հարցազրույցն էր, մինչդեռ խորհրդարանում գործընթացն սկսվել էր շատ ավելի վաղ: Հետաքրքիր է` ինչի մասին էին խոսելու քաղաքական մեծամասնության պատգամավորները, եթե, օրինակ, Հրայր Թովմասյանը ոչ մի հարցազրույց էլ չտար:

Հայկ Դավթյան