Մենք բոլորս Անդրանիկ Քոչարյան ենք

Անդրանիկ Քոչարյանի սկանդալային հայտարարությունը երկու օր է փոթորիկ է բարձրացրել հայ հանրության բանականությունը չկորցրած զանգվածների շրջանում:

Հայտարարությունն այդ դատապարտում են
քաղաքական ներկա եւ նախկին գործիչներ, սակայն իշխանականներից որեւէ մեկը բացառությամբ Սասուն Միքայելյանի համարձակություն չունեցավ՝ դատապարտելու թիմակցի արարքը: Այն դեպքում, եր ներկայիս իշխանություններից շատերը ոչ վաղ անցյալում գերհամարձակ իրավապաշտպաններ էին, մարդու եւ հատկապես կանանց իրավունքների պաշտպանության առաջամարտիկներ: Նրանց հայտարարություններ-արդարացումները մեզ տեղափոխեցին նախկին իշխանության ժամանակաշրջան, ճիշտ նույնպես էին ՀՀԿ-ական այսպես կոչված ինտելեկտուալներն արդարացնում Շմայսի դասին պատկանողների մտքի գոհարները:

ԱԺ փոխխոսնակ Լենա Նազարյանը մի անչափ համեստ ստատուս գրեց, բայց վերջնարդյունքում կատարվածի մեղքը բարդեց նախկինների վրա. «Անձնական կյանքը, արտաքինը, կինը, տղամարդը, ծնողները քաղաքական կատեգորիաներ չե՛ն: Ափսոսում եմ, որ դեռ ամբողջությամբ չկա այս գիտակցումը մեր քաղաքական խոսակցություններում: Նոր մշակույթի հաստատումը անհատական ջանք է պահանջում բոլորի՛ց: Ու սա վերաբերում է նաև նախկին պաշտոնյաներին, հակաիշխանական լրատվականներին ու սոցիալական ցանցերի որոշ օգտատերերին: Ձեր ձեռամբ այնքան ատելություն, կնատյացություն, անձնական կյանքի ոտնահարում է տեղի ունեցել, որ լավ կլինի խոսելու փոխարեն բացեք ձեր էջերը կարդացեք»,- գրեց Լենա Նազարյանը:

Իմ Քայլի օդիոզներից Նիկոլայ Բաղդասարյանին լրագրողները հարցրեցին՝ երբ ասում են՝ ձեր հոր եւ անհայտ հոր, այստեղ վիրավորանք չկա՞. «Հիմա մամային ճանաչում ենք բոլորս, ի՞նչ վիրավորական բան կա, եթե ես ձեր լրագրողներից մեկին ասեմ՝ ձեր մամային ճանաչում եմ, բայց պապային չեմ ճանաչում» ,-մաքուր հայերենով ասած՝ կրուտիտ արեց Բաղդասարյանը:

Բաղդասարյանը երկար տարիներ է, ինչ ճանաչում է Անդրանիկ Քոչարյանին եւ չի կարծում, որ նա կարող էր նման վիրավորանք հնչեցներ, ինչպես ընկալել են որոշ մարդիկ. «Հիմա, եթե ես հայտնեմ, որ ձեր մամային լավ ճանաչում եմ, պապային էլ, իսկ մյուսինը չեմ ճանաչում ու չգիտեմ, թե որտեղից ձեզ այդքան գումար, այստեղ արդեն ոչ թե վիրավորանքի, այլ քաղաքական խնդիր է։ Մարդն ուզում է հասկանալ՝ Արփինե Հովհաննիսյանն էլ ունի բնակարան, տուն, ֆինանսական միջոցներ, եւ մարդն էլ բարձրաձայնում է խնդիրները, ուզում է իմանալ, թե որտեղից այդ ֆինանսական միջոցները: Արփինե Հովհաննիսյանի մամային ճանաչում ենք, նոտար է աշխատել, պապային չենք ճանաչում, ուզում ենք հասկանալ՝ էդ ֆինանսական միջոցները, որ Արփինե Հովհաննիսյանի մոտ են կուտակվել, դրանք որտեղի՞ց են եկել»:

Առավել նողկալին այն էր, որ Անդրանիկ Քոչարյանին աջակցում էին ու գոտեպնդում իշխանական կանայք: Քրիստինե Պողոսյան անուն-ազգանունով բառի բուն իմաստով անհայտ պատգամավորը, որը չգիտես ինչպես եւ ոնց է հայտնվել խորհրդարանում, այսօր հոգու մաղձը թափում էր լրագրողների վրա, որպեսզի արդարացնի իր հայտարարությունն առ այն, թե ինչու պիտի Քոչարյան Անդրանիկը ներողություն չխնդրի.« Ո՞ւր էին լրագրողները, երբ ԱԺ ԲՀԿ-ական պատգամավոր Գևորգ Պետրոսյանն ասում էր, որ կանանց ու երեխաներին պետք է դաստիարակչական ապտակ տալ»: Այս մասին լրագրողների հետ խոսել է իմքայլական պատգամավոր Քրիստինե Պողոսյանը՝ խոսելով Արփինե Հովհաննիսյանի հասցեին Անդրանիկ Քոչարյանի հայտարարության մասին. «Ո՞ւր էիք դուք, երբ Նաիրա Զոհրաբյանը, լինելով մարդու իրավունքների հանձնաժողովի պաշտպան, մարդկանց դուրս էր հրավիրում դահլիճից (հավանաբար նկատի ունի հայտնի տրանսգենդերի հետ կապված միջադեպը): Ես ուզում եմ, որ հավասարազոր արձագանք լինի»: Քաղաքական քուղերում դեռեւս չթրծված աչոնիկն այնքան խառնվեց իրար, որ խառնեց թացը չորին,կարեւորն անկարեւորին. «Ինչի՞ համար: Նա հասուն տղամարդ է, եթե գտնի, որ պետք է ներողություն խնդրի, կանի դա, ես չէ, որ պետք է դա ասեմ»:

Լուսինե Բադալյանն էլ Քոչարյանի հետ լուսանկարի հրապարակմանը կից գրեց «Իմ քայլը» խմբակցության պատգամավոր Անդրանիկ Քոչարյանին վիրավորողների ինքնավստահությունից ու սեփական անձը գերագնահատելու կարողությունից եմ ուզում»: Մինչդեռ Անդրանիկ Քոչարյանի գարշելի արարքն իրականում բարոյական դաշտում էր ու հեղափոխական իշխանությունը մի ներողությամբ կարող էր ցույց տալ, որ չի գնալու նախկինների ետեւից ու եթե նույնիս թյուրիմացաբար կամ ենթագիտակցությամբ արվում են այդպիսի փորձեր, դրանք պետք է խեղդվեն հենց օրորոցում: Իսկ իրականությունն այն է, որ Անդրանիկ Քոչարյանն այս իշխանության իրական դեմքն է:

Անի Սահակյան