Ռուսական «մահակը» մնացել է Հայաստանի իշխանության «գլխին»

Հայաստանի վարչապետ Նիկոլ Փաշինյանն ու Ռուսաստանի նախագահ Վլադիմիր Պուտինը քննարկել են նաև Հայաստան մատակարարվող գազի գինը։

Լրատվամիջոցներին այս տեղեկությունը երեկ հայտնել է՝ վարչապետի խոսնակ Վլադիմիր Կարապետյանն ու ընդգծել, որ գազի գինը կորոշվի բանակցությունների արդյունքում:
«Գազի թեման չէր կարող շրջանցվել: Բնականաբար, տնտեսական համագործակցության որպես բաղկացուցիչ մաս, շոշափվել և քննարկվել է առաջնորդների կողմից, բայց ես կարծում եմ, որ վերջնական որոշումները, կոմերցիոն որոշումները կայացվելու են տնտեսվարող սուբյեկտների կողմից», - ասաց Կարապետյանը:
Հիշեցնենք, որ Հայաստան մատակարարվող գազի գինը բարձրացել է այս տարվա հունվարի 1-ից. Հայաստանը հիմա «Գազպրոմին» հազար խորանարդ մետր գազի դիմաց վճարում է ոչ թե 150 դոլար, այլ 165 դոլար։

Երեկ երկու հանդիպումներին Փաշինյանն ու Պուտինը անդրադարձել են հայ-ռուսական տնտեսական համագործակցության այլ հարցերի ևս։ Երկու երկրների ղեկավարները քննարկել են նաև ռազմաքաղաքական գործընկերության հետագա ամրապնդման, տարածաշրջանային նշանակության հարցեր: Առաջին հանդիպումից հետո Փաշինյան-Պուտին երկրորդ հանդիպումն է կայացել, արդեն «Զվարթնոց» օդանավակայանում։
Վարչապետի մամուլի խոսնակ Վլադիմիր Կարապետյանի խոսքով, այդ հանդիպումը ևս մոտ 1 ու կես ժամ է տևել ու ավելի անկաշկանդ մթնոլորտում է ընթացել․ - «Որոշում կայացվեց, որ արժե շարունակել զրույցը, որը շատ լավ, ջերմ մթնոլորտում էր անցնում, և կարիք զգացին առաջնորդները շարունակելու»:

Հայտնի է, որ Վլադիմիր Պուտինը Նիկոլ Փաշինյանին պաշտոնական այցով հրավիրել է Ռուսաստան։ Վարչապետի մամուլի խոսնակն ասում է, որ Փաշինյանի այցը հնարավոր է արդեն հաջորդ տարի կայանա։

Փաշինյանի մամլո խոսնակից հայտարարություններից կարելի է ենթադրել, որ ամենևին էլ բանակցությունները շարունակվում են, որ որոշում կայացված չէ:
Այսինքն, միանշանակ, կարելի է ասել, որ գազի գինը մնում է ռուսական օրակարգում որպես մահակ՝ Հայաստանի իշխանության գլխին: Հարկ եղած դեպքում այն կդառնա ուժեղ հարված իջեցնող գործիք:

Եթե անգամ գազի գինը մնա նույնը, կամ նույնիսկ իջնի, պետք է հասկանալ, թե ինչի դիմաց:

Թամար Բագրատունի