Ներիշխանական ռազբորկա

Չնայած Նիկոլ Փաշինյանի հավաստիացումներին եւ հոխորտանքներին, թե իշխանության ներսում թեւեր չկան, եթե լինեն մի վայրկյանում դրանք կկտրվեն, իրականությունը օրեցոր Փաշինյանի խոսքի հակառակ պատկերն է ապացուցում: Այսօր հերթական դիմակայությունը ցուցադրվեց ԱԺ-ում, այս անգամ Արարատ Միրզոյան-Նիկոլ Փաշինյան տիրույթում:

Հայտնի է, որ Իմ Քայլի պատգամավոր Նարեկ Զեյնալյանը Արարատ Միրզոյանի մտերիմներից է, նա եւ եւս մի քանի պատգամավոր են համարվում ԱԺ նախագահի ամենավստահելի մարդիկ խորհրդարանում, հայտնի է նաեւ Միրզոյանի քաղաքական հավակնությունների մասին: Խորհրդարանում քննարկվում էր «Մաշկաբանության և սեռավարակաբանական գիտաբժշկական կենտրոնը» մասնավերացման ցանկից հանելու Զեյնալյանի նախաձեռնությունը՝այդ պրոֆիլով հանրապետությունում միակը լինելու հիմնավորմամբ։ Նախագծին նախարարությունը բացասական եզրակացություն է տվել, «Իմ քայլը» քվեարկելու է ազատ։

Անդրադառնալով «Մաշկաբանության և սեռավարակաբանության բժշկագիտական կենտոնի» հողատարածքի գնի վերաբերյալ պատգամավորների դիտարկումներին,առողջապահության փոխնախարար Հովհաննես Հարությունյանն ասաց, որ այդ հարցերը պատգամավորները պետք է ուղղեին Պետգույքի կառավարման կոմիտեին։
«Այդ գույքը ներկայումս պետական գույքի կառավարման ներքո է գտնվում: Դրա համար էլ համարում ենք, որ մինչև այս նախագիծը շրջանառելը՝ պետք էր Պետական գույքի կոմիտեի հետ շփվել ու հասկանալ՝ արդյոք հողի գնի և մրցույթների պայմանների մասով բոլոր գնահատականները բավարարո՞ւմ են մտահոգություն արտահայտած մեր գործընկերներին»,- ասաց փոխնախարարը:

Նրա այս պատասխանը դուր չեկավ ԱԺ նախագահ Արարատ Միրզոյանին. նա կոչ արեց ԱԺ-ին աշխատելու ձևը ցույց չտալ։ «Հասկանում եմ, որ նախարարի տեղակալը վաղուց արդեն քաղաքական, ոչ թե հայեցողական կամ մասնագիտական պատրաստվածություն պահանջող պաշտոն է, այնուամենայնիվ, կառաջարկեի այսուհետ քիչ փորձել Ազգային ժողովին իր տեղը ցույց տալ կամ աշխատանք սովորեցնել: Թող գործադիրն իր աշխատանքն անի, ԱԺ-ն կպատկերացնի՝ ոնց ինքն աշխատի»,- ասաց ԱԺ նախագահը:

ԱԺ-կառավարություն հարցուպատասխանի ժամանակ Արարատ Միրզոյանի յուրային պատգամավորներից Սուրեն Գրիգորյանը շարունակեց ռազբորկան՝ այս հարցի վերաբերյալ հետաքրքրվելով նախարար Արսեն Թորոսյանի կարծիքը: Վերջինս ավելորդ չէ հիշեցնել, որ վայելում է Փաշինյանի հովանավորչությունը եւ անգամ վարչապետի տիկինը չկարողացավ ամուսնուն համոզել ազատվել Թորոսյանից: Թորոսյանը պարզաբանեց
, թե ինչու է իր ղեկավարած նախարարությունը դեմ նախաձեռնությանը։
«Նախ, եթե ասվում է մասնավորեցում, դա նշանակում է կենտրոնի վերադարձ Առողջապահության նախարարության ուղիղ ենթակայություն, այսինքն՝ ես պետք է լինեմ այդ կենտրոնի տնօրեն նշանակողն ու հաստիքացուցակը հաստատողը, հետևաբար այդ պարագայում առնվազն տարօրինակ է, որ գոնե իմ կարծիքը հաշվի չի առնվում»,- ասաց Թորոսյանը:

«Մենք կոչ ենք անում նման նախագծերի պարագայում առնվազն ինֆորմացիայի տիրապետելու մակարդակով մեզ հետ համագործակցել, չնայած դրան ի պատասխան ստանում ենք հորդորներ, որ չսովորեցնենք ԱԺ-ին ինչպես աշխատել»,- ասաց Թորոսյանը՝ նկատի ունենալով Արարատ Միրզոյանի դիտողությունը։

Նախարարը նշեց, որ ի տարբերություն «Այրվածքաբանության և Ուռուցքաբանության ինստիտուտների»՝ «Մաշկաբանության և սեռավարակաբանական գիտաբժշկական կենտրոնը» ռազմավարական նշանակություն չունի, ինքը պնդում է, որ ճիշտ կլինի այդ կենտրոնը մասնավորեցնել, բայց եթե ԱԺ-ն հարկ համարի, որ այդ կենտրոնը կառավարի ինքը, ապա դա նա կանի բարձր մակարդակով։

Արարատ Միրզոյանը շտապեց պատասխանել Արսեն Թորոսյանին և հիշեցրեց, որ նրա տեղակալին հորդոր հղողը եղել է ինքը։«Ի գիտություն Ձեզ, պարո՛ն Թորոսյան, էդ որ ասում եք հորդորել են, էդ հորդորողը ես եմ եղել, և դա եղել է ԱԺ-ին դիմելիս ոչ անհրաժեշտ կոռեկտության սահմանների համար. Խնդրում եմ տեղեկացեք մանրամասներին»,- ասաց ԱԺ նախագահը։

Ինչ վերաբերում է Արարատ Միրզոյանի եւ Զեյնալյանի շահագրգռվածությունը այս հարցով, դա այլ նյութի թեմա է: Չի բացառվում, որ Միրզոյանն ու Զեյնալյանը հույս ունեն, որ այդ հաստատությունում կնշանակեն իրենց մարդուն:

Անի Սահակյան