Անտիսեքսիզմ, թե՞ քողարկված գրանտակերություն
«Հայաստանում գործ ունենք արմատացած սեքսիզմի, սեռով պայմանավորված՝ վիրավորանքների տարածման հետ, և լռելով՝ մենք ամրապնդելու ենք այդ արատավոր երևույթը Հայաստանում»,- ԱԺ-ում հայտարարությունների ժամանակ հայտարարեց «Իմ քայլը» խմբակցության պատգամավոր Սոնա Ղազարյանը:
Դիմելով կանանց՝ պատգամավորն ասաց. «Բարձրաձայնեք ձեր խնդիրները, և դա թող լինի այդ խնդիրների լուծման առաջին քայլը: Կիսվեք ձեր պատմություններով»: Պատգամավոր տիկնոջ մտահոգությունները վերաթարմացրել էին անցնող շաբաթվա իրադարձությունները: Ղազարյանը նկատել էր, որ անցած շաբաթ համացանցը ողողված էր երկու կանանց նկատմամբ վիրավորական արտահայտություններով, առաջինը հայտնի մոդելի հասցեին, որի ոչ ստանդարտ արտաքինը դուր չէր եկել ֆեյսբուքահայությանը, երկրորդը՝ կին քաղաքական գործչի: Իշխանական պատգամավորուհին անուն չտվեց, ասաց նաեւ, որ նպատակ չունի բովանդակային քննարկում ծավալել, իր խնդիրը երեւույթի մասին խոսելն է:
Առանց անուն հնչեցնելու էլ հասկանալի է, որ խոսքը Արփինե Հովհաննիսյանի մասին է, ով հայտնի երիտասարդների ձերբակալության առիթով իր հրապարակային կարծիքի համար հայտնվել էր իշխանական զանգվածի թնդանոթի տակ: Իշխանականները Արփինե Հովհաննիսյանին ոչ թե քննադատեցին, այլ մինչեւ անգամ ծաղրուծանակի ենթարկեցին:
Կարելի էր կարծել, որ իշխանական պատգամավորուհին, իսկապես, համաձայն չէ թիմակիցների հետ եւ որոշել է բարձր ամբիոնից սթափեցնող կոչ հնչեցնել յուրայիններին եւ ոչ յուրայիններին ուղղված, հորդորել զերծ մնալ անձնական վիրավորանքներից, առավել եւս , երբ դիմացինը կին է:
Սակայն մենք չենք մոռացել, թե ինչպես էին հեղափոխականները՝ կին, թե տղամարդ, հեղափոխության օրերին ոչ միայն տրվել սեքսիզմին եւ ինքնամոռաց քննարկում էին նախկինների վարքն ու բարքը, այլեւ դուրս էին եկել բոլոր բարոյական սահմաններից եւ այդ նույն կանանց բակերում կազմակերպում էին նրանց հուղարկավորությունը: Մենք տեսել ենք այս իշխանության արժեհամակարգը եւ հիմա դժվար է հավատալ, որ դիցուք կան նրանց մեջ այնպիսինները, որոնք իսկապես մտահոգված են այս զազրելի խնդրով, այլ ոչ թե նպատակ ունեն սրտաճմլիկ հայտարարություններով ամբիոններ ճոճել միայն այն բանի համար, որպեսզի շարունակվի իրենց գրանտակերությունը:
Անի Սահակյան
Հետևեք մեզ Viber-ում
