Պետծառայողների պարգևավճարից ավագանու նիստերի ուղիղ հեռարձակում. բյուջե 2020
2020 թվականին տնտեսական զարգացման քաղաքականության շրջանակը կառուցվում է ՀՀ կառավարության` 2019 թվականի փետրվարի2-ի, այսինքն` ԱԺ ընտրությունից հետո հաստատված ծրագրի առաջնահերթությունների շուրջ:
Կառավարության գործունեության առանցքային նպատակը 2018 թվականի ապրիլ-մայիս ամիսներին Հայաստանում տեղի ունեցած ժողովրդական հեղափոխության արժեքների ամրագրումն է՝ որպես հանրային և ազգային հարաբերությունների հիմք և հեղափոխության գաղափարների իրագործում, որպես մշտական քաղաքական իրողություն: Այս մասին նշվում է 2020 թվականի բյուջետային ուղերձում: Ըստ այդմ կառավարությունը մտադիր է հանրային քննարկումների արդյունքում ձևավորել տնտեսական քաղաքականության նոր մոդել. <<Կառավարությունը նախատեսում է լայն հանրային քննարկումների ճանապարհով ախտորոշել պետության հանրային միջոցների բաշխմանը կոչված հարկային համակարգը, ինչպես նաև բյուջետային ծախսերի միջոցառումները և նախաձեռնել դրանից բխող անհրաժեշտ գործողությունների իրականացումը>>,- նշվում է ուղերձում:
Տնտեսական զարգացման քաղաքականությունը խարսխվելու է չորս հենասյուների վրա, որոնք, ըստ էության, նաև լավագույնս արտացոլում են ՀՀ մրցակցային առավելությունները: Առաջին հենասյունը արտադրողականությունն ու մրցունակությունն են՝ որպես առանցք ունենալով նորարարական զարգացման իրական հիմքերի ձևավորումը և ընդլայնելով տնտեսության առանձին ոլորտների՝ տեխնոլոգիական առաջընթացի ձեռքբերումներ կլանելու ունակությունը: Հաջորդը ՀՀ-ում ՓՄՁ ոլորտի հզորացումը և մրցունակության բարձրացումն է ֆինանսական ռեսուրսների հասանելիության ավելացման, ՓՄՁ սուբյեկտների կարողությունների և ձեռնարկատիրական մշակույթի զարգացման, ՓՄՁ սուբյեկտների համար շուկաների հասանելիության ապահովման և ՓՄՁ զարգացման համար բարենպաստ ինստիտուցիոնալ և իրավական միջավայրի ապահովման միջոցով։ Մյուս հենասյունը արտահանման շուկաներում ՀՀ տնտեսվարող սուբյեկտների համար շուկաների մատչելիության ապահովումն է՝ առավելագույնս օգտագործելով ՀՀ կառավարության գործիքակազմը: Վերջապես տնտեսական ներառական զարգացման պարտադիր պայման է հանդիսանալու ներդրումային և գործարար միջավայրի շարունակական և կանխատեսելի բարելավումը:
Տեղական ինքնակառավարման ոլորտում որպես նոր քաղաքական մոտեցում, նախատեսվում է 3000 և ավելի բնակիչ ունեցող համայնքների համար պարտադիր ինտերնետային պաշտոնական կայքերի ներդրում՝ օրենքով, 10000 և ավելի բնակիչ ունեցող համայնքներում, ավագանու դռնբաց նիստերը պաշտոնական ինտերնետային կայքում առցանց հեռարձակման ապահովում:
2020 թվականին պետական պաշտոն զբաղեցնող անձանց բազային աշխատավարձի չափը կազմում է 66.140 դրամ: Յուրաքանչյուր մարմնի պետական ծառայողների տարեկան պարգևատրման ֆոնդի միասնական տոկոսային դրույքաչափը կազմում է այդ մարմնի գծով Հայաստանի Հանրապետության 2020 թվականի պետական բյուջեով նախատեսված պետական ծառայողների հիմնական աշխատավարձի տարեկան ֆոնդի 10 տոկոսը:
Հայկ Դավթյան
Հետևեք մեզ Viber-ում
