Սերժ Սարգսյանի,թե Նիկոլ Փաշինյանի Կոլոտ Հովոն

Էժանագին սերիալների արքա Հովհաննես Ազոյանի՝ Կոլոտ Հովոյի մոտ նոր սրացումներ են։ Վերջին շրջանում նա ստատուսների տեղատարափ է կազմակերպել, մեկը մյուսից՝ քծնալից, մեկը մյուսից արհեստական։ Նրա ստատուսներից տպավորություն է, որ Կոլոտ Հովոն ոստիկանապետ կամ ԱԱԾ պետ դառնալու մեծ ախորժակ կամ երազանք ունի։ Եւ ամենեւին էլ պետք չէ քրքջալ ասվածի վրա, ի վերջո, Նիկոլ Փաշինյանը հո հենց այնպես օրենք չի փոխում, ԱԱԾ պետի եւ ոստիկանապետի պաշտոնների ցենզի փոփոխությամբ նա նպատակ ունի այդ պաշտոններում տեսնել նրանց, ում ցանկանում է, նրանց, ովքեր ավելի կրքոտ, ինքնամոռաց ու կուրորեն կծառայեն իրեն։ Խրախուսվող հատկանիշն էլ՝ ինքան հեռու իրավաբանությունից, այնքան՝ լավ։

Անցած շաբաթ Ազոյանը գուժեց քրեական գործերի սպասվող տեղատարափի մասին, հոխորտաց՝ թեժ աշուն էիք ուզում, կստանաք։ Այդպես էլ չհասկացանք, թե միմոսությամբ զբաղվող այս կիսաքաղաքական կործչին, կիսադերասանին որտեղից այդ ինֆորմացիան, բայց դա կարեւոր չէ․Փաշինյանի իշխանությունում այդ որ արարքն է տրամաբանված, որ այս պերսոնի ու իր գրառումների կապն էլ տրամաբանված, շաղկապված լինի։
Եւ ուրեմն նրա երազանքների տիրույթում է պետք դիտարկել Ազոյանի վերջին գրառումը, աջակցությունը Նարեկ Մութաֆյանի ու Սարգիս Օհանջանյանի կալանավորման վերաբերյալ որոշմանը․«Նրանց կռիվը, ոչ, թէ «համար է», այլ դեմ է…… դեմ է օրինական երկիր դարձնելուն..... որովհետև իրենցը, Ձերը կամ ձերը «կռիվ է», այլ ոչ թէ «Պայքար»…... իսկ կռվարարները պետք է պատասխանատվության ենթարկվեն… անխտիր ու բոլորը. ամեն դեպքում կոնկրետ ես պայքարել եմ դրա «Համար»…… », - ճամարտակել է Փաշինյանի մտերիմը։

Կոլոտ Հովոն պատգամավոր դառնալու ցանկություն էլ ուներ, քանզի չէր զիջում իմքայլական մանկամսուրին։ Բայց ՆիկոլՓաշինյանը չիրականացրեց հեղափոխության սիմվոլ Ազոյանի երազանքը։ Նա էլ քիչ էր մնացել նորից վերադառնալ արմատներին եւ «սեւերի» հետ պայքարել ժողովրդի վարչապետի դեմ։ Հասցրեց անգամ «նախազգուշացնող» նամակներ ուղղել վարչապետին․«Ինչո՞ւ մեր նոր Հայաստանի՝ ժողովրդին պատկանող իշխանության տակ գտնվող ոստիկանությունը, չի կարողանում պաշտպանել ժողովրդին, ձեր ասած Սևերից: Մի գուցե ոստիկանությունում սևեր կան, կամ սպիտակ ոստիկանները ունեն սև բարեկամներ, կամ սպիտակ ոստիկանները ունեն սպիտակ բարեկամներ՝ ովքեր ունեն սև ընկերներ, կամ ունեն սպիտակ ընկերներ՝ ովքեր ունեն լավ սև ախպոր ախպերներ: Էդ լավ ախպոր ախպեր պատմությունը ինձնից լավ գիտեք»:

Դժվար թե Նիկոլ Փաշինյանը հիմա էլ տրվի ուժային ղեկավար դառնալու ազոյանական մղումներին, բայց մյուս կողմի համար՝ տեսակի հարց է, մարդը սովոր է քծնել , բոլոր ժամանակներում կերտել սեփական կուռքին եւ երկրպագել նրա առջեւ։ Կար ժամանակ, երբ նույն անձը դերասանություն էր անում, փող աշխատում Սերժ Սարգսյանի մերձավորների մեդիատաշտում, բայց երբ զգաց, որ նավը խորտակվում է ու մոտ ապագայում ինքն այլեւս տեր չի ունենալու, սահուն անցում կատարեց հեղափոխական դաշտ ու հիմա էլ զբաղվում է իր սիրած՝ քծնելու գործով։

Անի Սահակյան