Երևան ժամանելուց հետո Պուտինը կշտապի խոսել Ալիևի հետ
Ռուսաստանի նախագահը հոկտեմբերի 3-ին կհանդիպի Ադրբեջանի նախագահին Սոչիում՝ երեկ հայտարարել է Կրեմլի խոսնակ Դմիտրի Պեսկովը: Վերջինիս խոսքով, հանդիպումը կկայանա «Վալդայ» ակումբի նիստի շրջանակներում, որին Ալիևից բացի մասնակցելու են նաև Հորդանանի թագավորը, Ղազախստանի նախագահն ու Ֆիլիպինների առաջնորդը:
«Վալդայ»-ը վերլուծական քննարկումների հարթակ է, որը հիմնադրվել է Ռուսաստանում 15 տարի առաջ: Այս տարվա նիստին Ադրբեջանի նախագահը հանդես է գալու ելույթով:
Այսինքն, Իլհամ Ալիևի հետ հանդիպումից երկու օր առաջ Վլադիմիր Պուտինը ժամանելու է Հայաստան՝ Եվրասիական տնտեսական միության գագաթնաժողովին: Փաշինյանի հետ «ոտքի վրա» անցկացվող հանդիպումից հետո Պուտինը նաև կհանդիպի Ալիևի հետ:
Ըստ ամենայնի ռուսական կողմը ընտրեց պահը, թե երբ խոսի Ադրբեջանի նախագահի հետ սպասվող հանդիպման մասին: Մինչ Հայաստանում քննարկում են, որ Երևանում Փաշինյան-Պուտին առանձին բանակցություններ չեն կայանալու, ընդամենը կկայանա միմյանց ողջունելու արարողություն, ահա, Մոսկվան բացում է՝ Պուտին-Ալիև առաջիկա հանդիման մասին տեղեկությունը:
Պուտին-Փաշինյան, Պուտին-Ալիև հանդիպումներից առաջ, նկատենք, որ Բաքվում էր Ռուսաստանի Անվտանգության խորհրդի քարտուղար Նիկոլայ Պատրուշևը:
Նշյալ հանդիպմանը քննարկվել էին ռուս-ադրբեջանական փոխգործակցության, անվտանգության, տնտեսական համագործակցության, մշակութային և հումանիտար կապերի զարգացման, ՄԱԿ-ում, ԵԱՀԿ-ում և միջազգային այլ կազմակերպություններում համագործակցության հարցեր:
Նշվում էր, որ Ռուսաստանի Անվտանգության խորհրդի քարտուղար Նիկոլայ Պատրուշևի՝ Ադրբեջանի այցի օրակարգում են անվտանգության հարցերի շուրջ ռուս-ադրբեջանական կոնսուլտացիաները՝ Ադրբեջանի Անվտանգության խորհրդի քարտուղար Ռամիլ Ոոսուբովի և երկու երկրների մի շարք նախարարությունների ու գերատեսչությունների ներկայացուցիչների հետ:
Այլ մանրամասներ Պատրուշևի այցից հայտնի չեն: Չի բացառվում, որ Բաքվում քննարկած լինեն վերջերս ռուսական կողմի ակնարկները, որ Ադրբեջանի համար Մոսկվան բաց է պահում ՀԱՊԿ-ի ու առհասարակ՝ ԵԱՏՄ-ի դռները, թեև Բաքվից նշեցին, որ այս պահին Ադրբեջանը չի դիտարկում ՀԱՊԿ-ում դիտորդի կարգավիճակ ստանալու հեռանկարները:
Թամար Բագրատունի
Հետևեք մեզ Viber-ում
