Ինչ փողեր է մսխում հեղափոխական Նիկոլ Փաշինյանը

Այն, ինչ իրենց թույլ են տալիս նոր Հայաստանի հեղափոխական իշխանությունները, հին Հայաստանում նախկին իշխանություններին չէր ներվի:

Նախ հայտնի դարձավ, որ Հայաստանի անկախության 28-ամյակի միջոցառումների նախապատրաստական աշխատանքների համար այս տարի 220 մլն դրամ է հատկացվել առանց մրցույթի` մեկ անձից գնում կատարելու ընթացակարգով: ՀՀ վարչապետի աշխատակազմի ղեկավար Էդուարդ Աղաջանյանի` այս առնչությամբ ներկայացրած պարզաբանումներն ուղղակի ծիծաղելի էին: Նա հայտարարեց, որ մրցույթ հայտարարելու դեպքում հնարավոր չէր լինի միջոցառումների կազմակերպման գործում ներգրավել մեծ թվով տնտեսվարող սուբյեկտների, այլ հաղթող կճանաչվեր մեկ կամ մի քանի տնտեսվարող: Մի քանի ամիսների ընթացքում աշխատանքային խումբը վարել է մի շարք բանակցություններ, որոնց արդյունքում ընտրվել են 75 մեծ, փոքր և միջին բիզնեսի ներկայացուցիչ հանդիսացող տնտեսավարող սուբյեկտներ: <<Եթե միջոցառումը կազմակերպվեր մրցութային ընթացակարգով, ապա մենք կկորցնեինք դրա կառավարման օղակները, այսինքն՝ վերահսկելի չէին լինի միջոցառման թե՛ տեխնիկական, թե՛ բովանդակային հատվածը»,- բացատրել է Աղաջանյանը:
Բովանդակային հատվածի ամենահուզիչ պահը թերևս կիսով չափ մերկ, կանացի կիսաշրջազգեստ հագած տղամարդկանց հայտնությունն էր բեմում: Անճաշակ ու անկախության գաղափարի հետ ոչ մի աղերս չունեցող տեսարան, որին այդքան կարևորություն ու փող էր տվել կառավարությունը: Պարզվեց նաև, որ գեղարվեստական մասի պատասխանտուն եղել էր կառավարության հետ սերտ կապեր ունեցեղ ռեժիսորը: Նախկինում նման քայլի համար իշխանությանը ՖԲ-ում կխաչեին, կոռուպցիայի և պետական թալանի մեջ կմեղադրեին, բայց հիմա այս ամենը կոչվում է ստեղծագործական նորույթ: Եվ սա այն դեպքում, երբ անընդհատ խոսվում է կոռուպցիայի, խնամի-ծանոթ- բարեկամ արատավոր մեխանիզմի բացառման մասին: Գուցե այն միամիտներ, ովքեր համոզված են, որ 220 մլն դրամը առանց մրցույթի նման անճաշակությանը տալու մեջ կոռուպցիա չկա, բայց մենք դրան չենք հավատում:
Նույն օրը հայտնի դարձավ, որ ավելի մեծ գումար էլ ծախսվել է վարչապետ Նիկոլ Փաշինյանի ԱՄՆ կատարած այցի համար: Նա մեր` հարկատուներիս փողերով մասնավոր ինքնաթիռ է վարձել և չարտերային չվերթով մեկնել է ԱՄՆ` իր հետ տանելով մեծ խումբ:
Այս մասին ֆեյսբուքյան իր էջում գրել է ՀՀ վարչապետի մամուլի խոսնակ Վլադիմիր Կարապետյանը։
«Ի պատասխան բազմաթիվ լրատվամիջոցների հարցումների` տեղեկացնում եմ, որ վարչապետ Նիկոլ Փաշինյանի աշխատանքային այցը Ամերիկայի Միացյալ Նահանգներ կատարվել է չարթերային չվերթով, մասնավոր ընկերության միջոցով։ Այցի կազմակերպման համար, ընդհանուր առմամբ, հատկացվող գումարը կարող է հասնել առավելագույնը 165 մլն դրամի, իսկ չարթերային չվերթի կազմակերպման նպատակը պայմանավորված է մի քանի հանգամանքներով:
Վարչապետի օրակարգը Միացյալ Նահանգներում խիստ հագեցած է: Արդեն երկար ժամանակ նախապատրաստվում էր Նիկոլ Փաշինյանի այցը Լոս Անջելես, որտեղ կառավարության ղեկավարը մեկ օրում ունեցել է մեկ տասնյակից ավելի հանդիպումներ և միջոցառումներ, որոնց մասին հանրությանը տրվել է պատշաճ տեղեկատվություն։
Այստեղից վարչապետը կրկին հագեցած գրաֆիկով ուղևորվելու է Սան Խոսե` Սիլիկոնյան հովիտ, և կրկին ընդամենը մի քանի ժամում անցկացնելու է մի շարք հանդիպումներ և բանակցություններ բարձր տեխնոլոգիաների ոլորտի առաջատար ընկերությունների հետ: Այնուհետև վարչապետը մեկնելու է Նյու Յորք, ներգրավվելով ՄԱԿ-ի գլխավոր ասամբլեայի նստաշրջանի աշխատանքներին: ՄԱԿ-ի կենտրոնական գրասենյակում Նիկոլ Փաշինյանն ունենալու է մեկ տասնյակից ավելի հանդիպումներ և միջոցառումներ։
Միաժամանակ հայտնում եմ, որ սեպտեմբերի 28-ին նախատեսված է Սինգապուրի վարչապետի պաշտոնական այցը Հայաստան, և կառավարության ղեկավարը խնդիր ունի մինչ այդ ժամանելու Երեւան։ Առանց հատուկ թռիչքի կազմակերպման` վարչապետի կարևոր աշխատանքային այցը Միացյալ Նահանգներ նման հագեցած գրաֆիկով և սեղմ ժամկետներում անհնար կլիներ կազմակերպել, մանավանդ, որ վարչապետը չէր կարող չմասնակցել սեպտեմբերի 21-ին Հայաստանում նախատեսված միջոցառումներին, այդ թվում՝ «Մեր ժամանակների հերոսը» մրցանակաբաշխությանը: Այսուհետ եւս, նման կարգավորումներն արվելու են այնպես, որ հնարավորինս նպաստեն երկրի ղեկավարի այցի առավել արդյունավետ կազմակեպմանը»,- գրել է նա։
Tert.am-ի հետ զրույցում վարչապետի մամուլի խոսնակը մանրամասնել է, որ միայն 165 մլն դրամ ծախսվել է հատուկ չվերթի համար, իսկ ամբողջ այցի ընթացքում նախատեսվող ծախսերն ավելի մեծ են:

Հայկ Դավթյան