Հանձնելու ոչ մի թիզ հող չունենք. Միքայել սրբազան

Ապրիլյան քառօրյա պատերազմը շատ բան սովորեցրեց: Այդ օրերին հայ ժողովուրդն իր լավագույն որակները ցուցաբերեց՝ ապացուցելով, որ հայն իր հույսը միայն իր վրա պետք է դնի: Այս մասին լրագրողների հետ ունեցած ճեպազրույցի ժամանակ նշեց Շիրակի թեմի առաջնորդ Միքայել եպիսկոպոս Աջապահյանը: «Այս օրերին հայ ժողովուրդն իր լավագույն որակները ցուցաբերեց, հան եց այն, ինչը քնած էր ու փոշու տակ էր թաղված: Մաղթենք, որ հետո փոշով չծածկի»,- նշել է Միքայել սրբազանը: Խոսելով տարածքների հետ տալու հնարավորության մասին՝ թեմակալ առաջնորդը շեշտեց՝ իր անձնական կարծիքով հայը հետ վերադարձնելու հող չունի: «Ես կարծում եմ, մենք հանձնելու հող չունենք, անշուշտ, ոչ մի թիզ: Հայ ժողովուրդը դեռ վերցնելիք ունի, տալիք չունի, իսկ դրա համար պետք է լինել միասնական, մաքուր, ազնիվ, պարկեշտ: Ժողովուրդն այսօր ցույց տվեց, որ միասնական է ու հայրենիքն իր համար ամեն ինչից վեր է, մնացածը երկրոդական է: Հայրենիքի համար կարելի է կյանքն էլ տալ ու նահատակվել և հայրենիքի շենացման համար մտածել: Ժողովուրդն իր միասնականություն որ‚ լավագույն որակները ցույց տվեց, մնում է, որ նրանք, ովքեր պատասխանատու պաշտոններ են զբաղեցնում սովորեն, օրինակ վերցնեն և իրենք էլ իրենց վրայից թոթափեն մանր-մունր բաները, ճղճիմ բաները և զբաղվեն այս երկիրը մեծացնելով ու հզորացնելով: Մեր հաղթանակը մեր միասնության ու ուժի մեջ եմ տեսնում: Տկարն ի վիճակի չէ հաղթել»,- հավելել է Շիրակի թեմի առաջնորդ Միքայել եպիսկոպոս Աջապահյանը: