Փաշինյանը խուսափում է հանդիպել Սորոսի հետ, որ ի՞նչ ապացուցի

Երեկ լոսանջելեսյան ասուլիսում Փաշինյանը պատմել է, որ իր Դավոսյան այցի ընթացքում միլիարդատեր Ջորջ Սորոսը ցանկություն է հայտնել հանդիպել իր հետ, սակայն ինքը՝ Փաշինյանը, «ժամանակ չի ունեցել նրա հետ հանդիպելու համար»: Այդ խոսքերից անմիջապես հետո Փաշինյանը անգիր արտասանել է այն միտքը, թե իբր 2018-ի ապրիլյան հեղափոխությունը դրսից աջակցություն չի ստացել և այն եղել է մաքուր «հայաստանյան բնույթի»:

Այստեղ է, որ առաջ է գալիս մի շարք հարցադրումների ժամանակը:

Ինչո՞ւ է Փաշինյանը խուսափում հանդիպել Սորոսի հետ, եթե «բոլորը գիտեն, որ ինքը կապ չի ունեցել հայկական հեղափոխության հետ»:

Ինչպես ասում են, ըստ Ֆրեյդի, Փաշինյանը ակամայից բացահայտում է, որ Սորոսի աջակցությունը այդ դեպքում զգալի է եղել:

Երբ մարդը անընդհատ նշում է, որ իրեն դրսից չեն աջակցել, ապա դա նշանակում է, որ իրեն աջակցել են, այն էլ՝ մեծ մասշտաբներով:

Կա՞ արդյոք որևէ այլ հեղափոխական գործիչ, ով խոստովաներ, որ այո, իրեն աջակցել են դրսից, և դրա համար էլ նրան հաջողվել է իշխանության գալ:

Ոչ Սաակաշվիլին, ոչ Յուշչենկոն, ոչ Պորոշենկոն չեն խոստովանել, որ իրենց աջակցել են դրսից: Նրանց կարծիքով էլ այդ հեղափոխությունները կատարվել են բացառապես «ներսից»:

Ինչպես և բոլշևիկները երբևէ չեն խոստովանել, որ 1917-ին իրենց աջակցել են գերմանացիները:

Միայն որոշ ժամանակ անց է պարզ դառնում, թե ովքեր և ինչպես են նրանց աջակցել այդ հեղափոխությունները իրականացնելու համար:

Ակնհայտ է նաև այն, որ եթե այդ երկրներում պարարտ հող չլիներ, ապա ոչ մի հեղափոխություն էլ չէր իրականացվի:

Այսինքն, առանց պատկառելի պատճառների մեծ դժգոհության ոչ մի երկրում հնարավոր չի լինի հեղափոխություն իրականացնել, դա ակնհայտ է, սակայն դա ճշմարտության միայն մի կողմն է:

Մյուս կողմ այն է, թե ովքե՞ր և ինչո՞ւ են աջակցում այս կամ այն երկրում «հաջող հեղափոխություն իրականացնելու համար»:

Այս տեսանկյունից Փաշինյանին իմաստ չունի խուսափել հանդիպելու իր հեղափոխական գործընկերներից մեկին՝ Սորոսին: Իհարկե վերջինս դրանից չի նեղանա, բայց ինչպես ասում են, «նստվածք կմնա»:

Իսկ արժե՞ մարդու մոտ այդպիսի նստվածք թողնել, մանավանդ, որ բոլորը ամեն ինչի մասին արդեն գիտեն:

Սա է իրականությունը:

Դավիթ Մկրտչյան

zham.am