Մարուքյանի գինը.ինչ կստանա մայրուղի դուրս գալու համար

Էդմոն Մարուքյանն այդպես էլ չսովորեց ընդդիմություն գոնե խաղալ: Թե նախկին իշխանության ժամանակ, թե նոր նա անդավաճան է իր միակ առաքելությանը՝ գրպանային ընդդիմություն աշխատելուն: Ամիսներ առաջ Սերժ Սարգսյանի ու հարազատների համար էր այդ ծառայությունը մատուցում, ներկայում՝ Նիկոլ Փաշինյանի: Մեկ-մեկ այս կլասիկ գործիչը իբրեւ ընդդիմադիր բոցկլտումներ է ունենում, բայց սկզբունքային հարցերում խաբել չի կարողանում:

Ահավասիկ, «Լուսավոր Հայաստան» խմբակցությունն այսօր գումարած նիստում որոշում է կայացրել, որ կողմ է քվեարկելու «Իմ քայլը» խմբակցության կողմից առաջարկված «Սահմանադրական դատարանի դատավոր Հրայր Թովմասյանի լիազորությունները դադարեցնելու հարցով Սահմանադրական դատարան դիմելու մասին» ՀՀ ԱԺ որոշման նախագծին: Անշուշտ, առաջին հայացքից դժվար է պատկերացնել՝ ինչպես մեկ օրում, մի քանի ժամում այս կուսակցությունը արմատապես փոխեց դիրքորոշումը: Դեռ երեկ, ԼՀԿ-ականներից շատերը հայտարարում էին, թե չեն կարող կողմ լինել մի նախաձեռնության, որը զուտ քաղաքական է, որ չեն ուզում մի քաղաքականացված անձին փոխարինել մյուսով, որ իրենց համար հասկանալի չէ՝ ինչու են մեկ անդամի լիազորությունները դադարեցնելու գործընթաց սկսել իշխանական գործընկերները, եթե խնդրո առարկա գրությամբ հիշատակվում է երեքի անունը, եւ վերջապես ասում էին, թե Իմ Քայլը հայտնվել է իր լարած թակարդում՝ անդամ-դատավոր հայտնի եզրույթի թմբկահարումից հետո հիմա չի կարող գործընթաց սկսել ՍԴ դատավորի դեմ այն պարզ պատճառով, որ հայտարարվում էր, թե ՍԴ-ում դատավոր չկա, ավելի ճիշտ կան, բայց իշխանության թիրախները՝ անդամներ են: Այս հայտարարություններից հետո հայտարարել, որ կողմ են գործընթացին եւ չպարզաբանել, չհիմնավորել որոշումը, այլ բան չի թողնում, քան կասկածել, որ կամ Էդմոն Մարուքյանն ու կուսակիցներն այս որոշումը կայացրել են հարկադրանքի ներքո, Նիկոլ Փաշինյանն է սպառնացել կատարել իր կամքը, կամ արել են՝ ինչ-ինչ ակնկալիքներով,փոխշահավետ գործարքով:

Որ գործարքը փոխշահավետ է, կարելի է չկասկածել, ամեն դեպքում Մարուքյանը մի երկու գործի համար մայրուղի դուրս չէր գա եւ էժանով չէր վաճառի ընդդիմադիր իր ստատուսը: Եւ այնքան շահավետ է, որ ծառայությունը ծառայության ետեւից մատուցում է: Անցած շաբաթ էլ հանուն իշխանության ներկայացրեցին տխրահռչակ օրենքի նախագիծ ԱԱԾ տնօրենի եւ ստիկանապետի պաշտոնի ցենզի փոփոխության վերաբերյալ:
Մինիմում Փաշինյանը Մարուքյանին մի քանի պաշտոն կարող է այս ամենի դիմաց մատուցել, մաքսիմում՝ տեղ հաջորդ խորհրդարանում:

Անի Սահակյան